حزب لە كوردستان وەك دەروازە و ئامرازێكی كۆمەڵگە دەركەوتووە، بەو رەنگە كە رێگەی بۆ ئەوە خۆشكردووە، كەناڵی پەیوەندی بە دەوروبەر و گەلان رێكبخات، كۆمەڵگە لە پەرتبوونەوە بەرەو یەكخستنەوە ببات، وەك ئامرازێك بێت بۆ خەبات و گەیشتن بە ئامانج، هۆیەك بووە بۆ نەهێشتنی ئاسەواری داگیركاری و چەوساندنەوەی نەتەوایەتی و چینایەتی، حزب ئەركێكی گەورەی وەئەستۆ گرت، بە جۆرێك كۆمەڵگە قۆناغ بە قۆناغ چاوی لە دەستی حزب بووە ئاخۆ چیی بۆ دێنێ، بەو پێیەی بانگەوازی حزب تەواوی لایەنەكانی ژیانی گرتەوە، ئیدی دەبوو كۆمەڵگە چاوی لە دەستی حزب بێت، چۆن خۆی پێش بخات؟ لە كوێوە دەست پێبكات؟
لەبەرئەوەی كۆمەڵگەی كوردستان حزبی قبوڵكرد، زەمینەیەكی گونجاو بۆ حزبایەتی سەریهەڵدا، تەنانەت بە جیابوونەوە و دروستبوونی حزبی نوێشەوە، بەڵام هاتنەمیدانی حزب و جێكردنەوە لە گۆڕەپان، هۆیەك بووە بۆ گەڕان بەدوای شێوازی جیاجیای كاری حزبایەتی، راستە كوردستانیش لە ژێر كاریگەریی رەوتە فیكری و سیاسییە جۆراوجۆرەكانی جیهان بەدەرنەبووە، لێ ململانێی حزبی و ئەو ناكۆكییەی بەهۆیەوە دروستبوو، زیاتر پاڵنەری هێنانی بیرۆكە و كۆپیكردنی تیوری نوێ بوو، ئەو جۆرە تیورانە هاوردە دەكران و دەرخواردی كۆمەڵگە دەدران، وەك ئامراز بۆ شكاندنی حزب و تاوانباركردنی رابەر و سەركردەی دیار بە خێڵەكی و رێگر لەبەردەم پێشكەوتندا.
ئێستا ئەو حزب و گرووپانەی لە سەر میراتی هاوردەكردن و كۆپیكردن ماون، كارێك دەكەن تەواو پێچەوانەی ئەو رۆژگارەی تیورە كۆپیكراوەكانیان وەك كاڵایەكی نوێ نمایش دەكرد، بۆ هەر عەشیرەت و تیرە و ناوچەیەك رۆژێك دیاریكراوە، لەو رۆژەدا بە جۆش و خرۆشێكی زۆرەوە، هەستی خێڵگەرایی دەبزوێندرێ، ئاپۆڕایەكی گەورەی خڕبوونەوەی خەڵك دروست دەكرێت، لە ناو كەشی گەرمكردنی ئینتیمای خێڵ، حزب كە ئەو ئاپۆرایەی بەرهەمهێناوە، چەند كەسێك بۆ ناو گردبوونەوەكە رەوانە دەكات، لە ناكاو ئاپۆڕای جۆشدراو دەبێتەوە گوێگری حزب، ئیدی زۆر نابات، خزم و قەوم و قیلەی یەكتر بەچاوی حزبایەتییەوە سەیری یەكدی دەكەن، هەر لەو روانگەیەشەوە هەندێ لەو حزبییانە گلەیی لە حزبی خۆیان دەكەن، بۆچی رێگەتان دا حزبی دی ببنە شەریكتان لە بەڕێوەبردنی كەڕنەڤاڵی خێڵگەرایی، خۆ لە ئەسڵدا داهێنانەكە هی حزبی ئێمەیە نەك حزبی دی. ئەمە لە كاتێكدایە حزبی دیكەش لە هەمان خێڵ و ناوچەن.
لەو قسەیە پەشیمان نیم كە ناكۆكیی حزبی، هۆكارێكی پەنابردن بووە بۆ كۆپیكردنی شێوازی حزبایەتی، دەنا ئەگەر وانەبێت، بۆچی لەوكات كە رێگری كۆمەڵایەتی زۆریش هەبوون، داوای گۆڕینی كۆمەڵگە و دووركەوتنەوە لە خێڵ و ناوچەگەرێتی دەكرا؟ ئەدی لە ئێستای سەدەی بیستەمدا پاڵنەری زیندووكردنەوەی خێڵگەرایی چ سوودێكی هەیە؟ كە سەیری پەیڕەو و پڕۆگرامی ئەو حزبانە دەكەی، وادەزانی لە كۆمەڵگەیەكی ئەوروپایی، هەمووی بەرنامەی مۆدێرنە بۆ ژیان، ئاخر ئەو ناكۆكییەی لە بیركردنەوە و تێڕوانین بۆ كاری حزبی و سیاسی هەبووە و هەیە، بەپێی دەرفەت و بەرژەوەندیی قۆناغەكان، كاری حزبیی لەسەر كۆمەڵگە كردووە و دەكات، بۆیە هەمیشە تاكێكی ئامادەكراو بۆ تێكشكاندنی بەرامبەر بەرهەمهێندراوە، بەم جۆرە خوێنی یەكتریش حەڵاڵكرا، هەموو ئەوانەش وەك دیاری بۆ خەڵك لە قەڵەمدراون.
لە تەمەنی منداڵی و هەرزەكاریدا، زۆرجار گوێم لە گەوران دەبوو، بۆ ئەوەی منداڵەكانیان نەخزێنە ناو ناكۆكیی بەرهەمی حزب، بە سادەیی و ساكارییەوە دەیانگوت حزبایەتی درۆ و دەلەسەیە، لە نێوان ئەو قسەیە و ئەو هەموو دیارییانەی حزب بۆ كۆمەڵگە گیرم خواردووە، فریام بكەون كامەیان هەڵبژێرم؟!