دونیا پێویستی بە شۆڕشێكی مەزن هەیە، ڕۆژهەڵاتی ناوەڕاستیش لە سەروبەندی گۆڕانكارییەكی خێرادایە، لەناو ئەم بارودۆخەدا، كوردستان دەرفەتێكی گەورەی مێژوویی بۆ هاتووەتە پێشەوە. هاوكات هاوسۆزییەكی نێودەوڵەتیش بۆ باشووری كوردستان بوونی هەیە، هەر بۆیە سەرۆك بارزانی داوای كردووە ئامادەباشی بۆ ئەنجامدانی ڕیفراندۆم بكرێت، بەڵام وێڕای ئەمانەش كۆمەڵێك هەڕەشە ڕووبەڕووی كوردستان بووەتەوە و دەبێت ئامادەكاری بۆ ڕووبەڕووبونەوەیان بكرێت، لەلایەكی دیكەوە پرسی كورد لەسەر ئاستی هەموو كوردستان جۆرێك لە جووڵە و ئەكتیڤبوونی بە خۆیەوە بینیوە. ئەو دەرفەتە زێرینەی كە سەرۆكی هەرێمی كوردستان بۆ سەربەخۆیی و دەوڵەتی كوردستان ئاماژەی پێدەكات، دەرفەتێكی لەبارە، خۆزگە هەموو كوردستانی گەورەی دەگرتەوە، بەڵام لە ئێستادا ئەم دەرفەتە تەنیا بۆ باشووری كوردستانە، ئەگەر سەرنجی بارودۆخی كوردستان بدەین بە روونی هەست بەوە دەكەین و دەبینین سەرۆكی هەرێمی كوردستان ڕابەرایەتی پرۆسەی سەربەخۆیی دەكات و كاریگەرییەكی زۆر گەورەی لەسەر بەنێودەوڵەتی بوونی پرسی كورد هەیە، لەسەر ئاستی هەر چوار پارچەی كوردستانیش هیچ سەركردەیەكی كورد نییە، هێندەی جەنابی مسعود بارزانی لە سەر ئاستی نێوخۆیی و نێودەوڵەتی بەهێز بێت، دەكرێت بڵێین وجوودی بەڕێز مسعود بارزانی فاكتەرێكی بەهێزە بۆ ئەكتیڤبوونی پرسی كورد، لێدوان و هەوڵەكانی جەنابی سەرۆك مسعود بارزانی، لەپێناو سەربەخۆیی كوردستان خوێندنەوەیەكی واقیعییانەیە بۆ ڕەوشی سیاسی كوردستان، عێراق، ناوچەكە و خستنەڕووی چارەسەری گونجاوە بۆ پرسەكان، بە تایبەت پرسی ڕیفراندۆم بۆ ڕاگەیاندنی سەربەخۆیی كوردستان، ئەم هەوڵانەی سەرۆك بارزانی لەم كاتەدا بایەخی زۆری هەیە، ئەمڕۆ كە بە سەردەمی ڕزگاری و ئازادیی نەتەوە چەوساوەكان لە ژێردەستەیی و دیكتاتۆریەت ناسراوە، كاتی ئەوەیە بە شێوازێكی ئاشتیانە، دوور لە هەموو ئاریشە و كێشەیەك، جیابوونەوە ڕابگەینین، بە جیابوونەوەمان لە ڕووی یاساییەوە پرسی كورد دەچێتە قۆناخێكی دیكەوە، نابێت پرۆسەكە لەبەر هیچ هۆكار و بیانووێك دوابخرێت، هەنووكە هەلومەرجێكی هەرێمی و نێودەوڵەتی، هاوكات دەرفەتێكی گرنگ بۆ كورد دروست بووە و نابێت لەدەست بدرێت. من لەوە نیگەرانم ئەگەر پێش كۆتاییهاتنی شەڕی داعش سوود لەم دەرفەتە وەرنەگرین، ئەو هەڵوێستەی كە سەركردایەتی كورد و شەقامی كوردی لەهەمبەر سەربەخۆیی دەینوێنن مافێكی یاسایی و دەستووری تاك بەتاكی كوردستانیانە، مانەوە لە دەوڵەتێك كە ڕێز لە مافی هاونیشتیمانیانی نەگرێت و پارێزگاریان لێ نەكات، شایەنی مانەوە نییە، بەڵكو جیابونەوە لێی، بەر لەوەی ماف بێت، ئەركێكی ئایینی و نەتەوەییە، وەك كورد هەر لە سەرەتای دروستبوونی دەوڵەتی عێراقەوە (1921) تا ئێستا، مێژوویەكی تاڵ و ڕابردوویەكی پڕ لە ناخۆشیمان لەسەر خاكی عێراقدا هەیە، وا باشترە ببینە دوو دراوسێی باش، لێرە بەولاوە ئیتر كاتی سەربەخۆیی و دروست بوونی دەوڵەتی كوردستانە. دەوڵەتی كوردستان لە هەمووان پیرۆز بێت.