بەڕێز د. ئیبراهیم جەعفەری لە ئانی تەشریفهێنانی ئەمجارەیدا بۆ هەولێر، دەڵێ: لە دەستوری عێراقدا باسی (ئینفیساڵ) نەكراوە، جارێ ئامانج لە پڕۆژەی سەربەخۆیی كوردستان، ئیستیقلالە، ئینفیساڵ نییە، بەكارهێنانی ئەو عیبارەتە ئستیفزازییە نەفەسیێكی شۆڤێنیستانەیەو ئیمتیدادی كەلتووری بەعسییەكانە لە دژی مافەڕەواكانی كورد، دیارە ئەمڕۆ یەكێ لە برا شیعە دەستەڵاتدارەكانی بەغدا دەیەوێ بەبەرگوێماندا بداتەوە!.
كورد لە سەر خاكی خۆی ئیعلانی دەوڵەت دەكات، نەك لە سەر خاكی عەرەب، ئەم خاك و خێروبەرەكەتەش مەرحەمەتی باووپاپیرانی عەرەب نییە بەمیرات بۆمان مابێتەوە! بۆیە جێی گومانە سەید جەعفەری، پڕۆژەی سەربەخۆیی كوردستان بە ئینفیساڵ ناودەبات!؟
ئەگەر هەر حەزیش دەكەن بزانن كوردەكان چی دەكەن، ئەوە دەڵێین، ئینفیساڵ ناكەن، تەوحید لە گەڵ خاك و ڕۆڵەكانی نەتەوەی خۆیان دەكەن.
سەرباری هەموو ئەوانەش، تەنانەت ئەگەر هیچ پاساوێكیش نەبێت بۆ ڕاگەیاندنی سەربەخۆیی كوردستان و دابەشكردنی عێراق، ئەوا هەر لەدیباجەی ئەو دەستورەی جەعفەری باسی دەكات هاتووە: عێراق دەوڵەتێكی فیدراڵی ئارەزوومەندانەیە. هەروەها لەبڕگەیەكی تردا هاتووە: مانەوەی عێراق بەیەكگرتوویی، بەندە بە جێبەجێ كردنی ئەم دەستورەوە.
هەریەك لەو دوو بڕگەیە ئازادی تەواو دەدەن بەكورد بۆ ئەوەی هەركات"ئارەزووی كرد" ڕیفراندۆم بۆ سەربەخۆیی بكات، چونكە لەبنەڕەتدا پێكەوە بوونمان لەعێراقدا بەپێی دەستور "ئیختیارییە، ئیجباری نییە". هاوكات خودی دەستورەكە دەڵێت: مانەوەی عێراق بەیەكپارچەیی بەندە بەجێبەجێ كردنی ئەم دەستورەوە. كەواتە لەدوای دوانزە ساڵ چاوەڕوانی، یەك بڕگەی دەستور جێبەجێ نەكراوە، نەمادەی 140 جێبەجێ كرا، نە مافەكانی تری كورد دابین كران. تەنانەت لەفیدراڵیەتەكەی كوردستانیش پەشیمانن و كاری جیدیان دەست پێكردوە بۆ گەڕاندنەوەی مەركەزییەت. هاوكات هەموو پێشكەوتنە ئابوورییەكانی كوردستانیان بە نوكە قەڵەمێك وەستاندو تەنانەت دەستیان بۆ بڕینی موچە و قوتی منداڵانی كوردستان برد. ئایا ئەوە لەدەستوردا هاتووە كە موچەی خەڵكی كوردستان ببڕێت؟ كوان مافە دەستورییەكانی كورد؟.
ئەگەر دەستور نەتوانێت بەغدا پابەند بكات بە تەنانەت پێدانی موچەی خەڵكەوە كە تاكو ئێستاش بەداخەوە لەژێر ئاڵای داگیركەری عێراقیدا خزمەتی مەدەنی دەكەن. ئایا چۆن دەستور دەتوانێت بەوحاڵه شپرزەیەوە كە هیچ پێكهاتەیەك حسابی بۆناكات، ڕێگربێت لەسەربەخۆیی میللەتێك كە 2700 ساڵە چاوەڕوانی هەلی بەدەوڵەت بوون دەكات؟.
بەداخەوە پێدەچێ ئێوەش بە هەمان بیانووئاوازی لاواز دیكەی داگیركەری دیكەی كوردستان لە بارەی سەربەخۆیی كوردستان بخوێنن، پاساوی بێ ئەرزشتان ئەوەیە؛ سەربەخۆیی كوردستان، سەقامگیری ناوچەكە تێكدەدا! ئاخر كامە (سەقامگیری؟) ئەو سەقامگیرییەی لە سایەیدا كورد ئەنفال و كیمیاباران كراوە؟ ئەوە (سەقامگیرییە) ڕۆژانە دەیان لاوی كورد لە ئێران لەسەر كوردبوون دەخرێنە بەر پەتی قەنارە؟ لە توركیا و سورییەش كورد مافی هاوڵاتیبوونی نییە، زمانی دایكیان لێ قەدەغەیە، ناسنامەیان نییە.
ئاخر لەو ڕۆژەوەی كە نەخشەی سەقەتی ڕۆژهەڵاتی ناوەڕاست كێشراوە و دەوڵەتی عێراق دامەزراوە، زوڵمی مێژوویی دژ بە میللەتی كورد دەستی پێكردووە، یەك ساتیش ڕۆژهەڵاتی ناوەڕاست ئیستیقراری بەخۆووە نەدیووە.!