حەسویدی ئێکە ژ فاکتەرێن پیسبوونا سایکۆلۆژی، و نیشان و ڕەنگەکێ نساخیێن دەروونی/جڤاکییە. ل گۆندی گاڤا کەسەکێ ددیت ئێک ژ وی ڕێنجبەرتر یان زەنگینترە، دا ب شەڤێ ئاڤێ بەردتە سەر زەڤیا وی یان سەرکێ سپیندارێن وی ب داس و شالۆکێ فڕینت، یان بۆ مرنێ و ب دزیکیڤە بەرەکی ل چێلا وی دەتن، و ل باژێڕی دێ گلێشێ خۆ کەتە بەر دەرگەھێ وی یان سرکێتێ کەھرەبا وی دگەل یێ خۆ نائینیتە سەری و گەلەک ڕەفتارێن دیتر کەتن وەک دەبڕینەک ژ وێ حەسویدیا خۆ یا نەخۆشییا دەروونی. بۆچی؟ چونکی ترۆمبێل یان خانیێ وی ش یێ ڤی باشتر و خۆشترە یان خەلک ب باشی بەحسێ ڤی دکەتن یان ش پارتەک دیترە یان مووچەخۆرە و ڤی مووچە نینە. ئەڤ ڕەفتارە بەرھەمێ پەروەردەیەکا شاش و خەلەتا جڤاکێ و مالباتێیە.

حەسویدییا ھۆسا کەسۆکی و جڤاکییە، لێ حەسویدییا نەتەوەیی و ئایینی و سیاسی ژی یا ھەی. عەلی وەردی ڤەدگێڕیتن " محەمەد عەلیێ مەزن " ئێکەم پاشایێ مسرێ ژ ھەمی نەتەوەان، و ژ کوردان، زەلام ژێگرتن دا ب کارێ بڕێڤەبرنا پاشاتییا وی ڕابن، بەلێ مسری ( و عەرەب ) ژێنەگرتن. وی وەسا ھزر دکر مسری تنێ بکێر " باری " دھێن نەک وەلاتداریێ.

دبێژن " پیرێ باوەر نەدکر دێ شوی کەتن بەحسێ بەلبیک و فلان و بێھڤانی دکر ". ڤێجا ناسیۆنالیزما شۆڤینیا عەرەبی وەسا ھزر ناکەتن، بەلکۆ حەسویدیێ چاڤێن وان یێن تاری کرین. ژ بیابانەکێ ھشک بینە خۆدان چەند وەلات. کوردستان خۆدانێ سێ تەخێن زێڕینە: ئاڤ و ئاخ، و پەترۆل. چەوا حەسویدیێ پێ نەبەن و نەچنە پال ڕەشەکێن خۆ یێن تۆرانی و سەید و مەلایێن شێعە و پارس؟ بلا ! مافدارن ! " حەقێ قەنجیێ خرابیە"!
ئەنفال و کێمیباران و گەرمیان و حەلەبچە و ... و داعش و ھەمی جۆرێن ( حەشدێ ) و ... و داگرتنا ئالایێ پیرۆزێ کوردستانێ ...، ھەمی بەلگەنە ڤێ حەسویدیێ دسەلمینن. وێ چەندێ ئەم ھەمی کرینە بەرەیەک و ب سەرکرداتییا جەنابێ سەرۆک بارزانی گەھاندینە وێ باوەرێ تنێ پێژانێ قۆرتالبوون ژ وێ حەسویدییا سیاسی یا د ئاڤاکرنا " دەولەتا کوردستانێ " دا نەک چ تشتەک دیتر. ھەکەر نەوەسایە پا ھوین چ چارەیەک دیتر پێدحەسن؟ *بسپۆرێ زانستێن پێداگۆگی و پەروەردەیی/فاکۆلتییا پەروەردە/ زانینگەھا زاخۆ