عەلی وەردی قۆناغا "نەخەلافەتا عۆسمانی" ب پیسترین قۆناغێن ژیانا جڤاکییا دەڤەرێ دزانیتن، لێ فەرە بھێتەگۆتن، قۆناغا دەستھەلاتا بەعسا فاشیستی، و مەزنترین ھۆلاکۆ و چەنگیزخان و ھیتلەرێ وێ، سەدامێ گۆڕ ب گۆڕ ب نەخۆشترین و تەحلتیرن و پیسترین قۆناغێن ھەمی ژیانا کوردستانیان، بۆ ھەمی تەخ و چین و ئایین و نەتەوە و جوینان، دھێتەھژمارتن. ناسیۆنالیزما شۆڤینییا عەرەبی، ھزرێن ناسیۆنالیستی و پیرۆزییا نەژادێ سامی و نەتەوەیێ عەرەبی و زمان و کەلتوورێ وێ و پێدڤیاتییا بالادەستبوونا وێ بسەر کورد و کوردستانی و جیھانییان، کرە د پرۆگرامێ وێ رَژێمێ، و کەسێن ئایینی یێن دەمارگیر و مەژی ھشک، وەکی عەلی وەردی دبێژیتن، بلویلا ئایینی بۆ بەعسێ لێدا، و بەلگە ژی تاوانێن ئەنفال و زێدەکرنا وشەیەک ئایینی بی د ئالایێ ڕزی و نەپیرۆزێ ڤی وەلاتی دا و گەلەک تشتێن دیتر، و ئەکادیمی و پەروەردەکاران ژی ئەو ھزرێن ڕزی و دەمارگیر ئینانە ناڤ سیستەمێ پەروەردەیی، و جاش و خۆفرۆشان ل کوردستانێ ڕە و ڕیشالێن وێ پترتر و کویرتر داھێلان. ھەمیان ھاریکارییەک کر، تاکیچ وێ پارچا کوردستانێ، چ ئەوێن تێدا و چ ئەوێ ڕەڤی و ئاوارە، چ خۆەش و تامەک ژ ژیانێ نەدیت و ژیانا کوردستانیان ل وی ماوەی ژیانەک بی ل دۆزەخێ. ب کوردی و کۆرتی ڤێ ڕژێما ڕوویڕەش بھایێن جڤاکی و پەروەردەیی و سیاسی و ئایینی و مرۆڤی ل کوردستانێ وەسا تێکدان و شێواندن و خاپاندن و گھۆڕین، کە ھەمی ئەو کەرت و لایەن ھەتا نۆکە و بەلکۆ ژی سەدان سالێن دیتر ژی پەنجەشێرا مێنتالیتەیا شۆڤینیی-عەرەبی- بەعسییا ھنگی وی بەرنەدەتن و بسەرخۆڤە نەئێتن و ھەتاکۆ گەلەک ژ ڕەفتار و ھزر و کریارێن کریت و نەشارستانی یێن نۆکە لنک تاکێ کوردستانێ، و ھەمی تەخ و چین و ئایین و نەتەوە و پیشەیان، دا دھێنە دیتن بەرھەمێ ڕزیێ وێ قۆناغێ و کەلتوورێ شۆڤینییا ئەبوجەھلیانەیا بەعسێ یە، بەلێ خەلک نزانیتن. تاکێ کوردستانێ، ژ ھەمی تەخان، و ژبەر ھنگی، ھێشتانێ شەلالییە ( سەقەتە ) و دەست ئێشە، و نەشێتن بسانەھی و وەکی کوردەکێ ئاسایی و ڕەسەن ھزر و ڕەفتار بکەتن و بڕیاران بدەتن.
ژ ڤێ چەندێ داخوازێ ژ یەزدانێ ئەھوەرامەزدایێ مەزن دکەین ھەمی وان کەس و لایەن و وەلاتێن لدویڤ ڕێبازا ناسیۆنالیستییا عەرەبی فاشیتسی، بینە ئەگەرێ تەحلییا ژیانا کوردستانیان و ھزاران تاوانان، نەئێخیتە بەر دلۆڤانییا ترازییا خۆ، و نەخاسمە ئەوێن ژیێ کۆرتێ بەعسێ درێژترکری، و ھەکەر خۆشمێر و جامێرێن وەکی ئەمریکییان نەبانە، ئەڤرۆکە و ل سالا ( ٢٠١٧ ) تشتەک بناڤێ کوردستان و کورد ل ڤێ دەڤەرێ نەدما و دا بێژنە ھەمیان "عەرەب "! ھزاران مرۆڤ سەخمەراتی وێ دەستھەلاتا ڕزی چەندەھا سالە نەخۆش و پەککەفتیێن دەروونی و جەستەیینە، و ئەڤە تنێ چپکەکە ژ دەریایا تاوانێن وێ ڕژێمێ و ڕەشەکێن وێ یێن ھەمەجۆر دژی کوردستانیان کرین، ڤێجا چەوا کوردستانی و تەخ و چین و ئایین و نەتەوەیێن وێ، د ھەمی نڤێژێن خۆ دا و پشتی دۆعایێن باش بۆ مرۆڤێن باش ژ ھەمی ئایین و نەتەوە و وەلات و لایەنان، دەستێن خۆ بلندکەن و نفرینان ل مایی و نەمایی یێن ڤێ ڕژێمێ بکەن. ئەو ڕۆژێن دژوار و تەحلێن ھنگی و دۆھی و ئەڤرۆنە، مە نەچار دکەن بۆ دەرمانکرنا برینێن کوردستانیان، ھەمی دەرگەان بقۆتین دا ڕیفراندۆم و بھێتەکرن و کوردستان ببیتە دەولەت، چونکی ناسیۆنالیزما عەرەبی ژ جاران جھێ باوەریێ نینە و نەبوویە و نابیتن. ھەر ڕۆژەکا ژ دەستێن وێ بھێتن دێ وان کارەساتان دووبارە کەتن و بۆ ڤان مەرەمێن بێھنگەنی ڕەشەکێن وێ ھەمی دەمەکی ئامادەنە و گۆھێ وان ل دەرگەھییە دا گازی وان بھێتەکرن دا جاشاتییا وان بکەن و وێ قۆناغا پیسا، دیرۆک و کوردستان چ جاران ژبیر ناکەتن، زیندی بکەن، لێ ئەڤێ جارێ خەونە، چونکی شێرەکۆڕەک ل کوردستانیان پەیدا بوویە، دڤێتن ڤێ ئالایێ ب ھەر ڕەنگەکێ ھەبیتن ل ھەمی چیایێن کوردستانێ بچەقینیتن. ئەڤە بکۆراھییا چاڤێن پەقی دێ چێبیتن. *بسپۆرێ زانستێن پێداگۆگی و پەروەردەیی/فاکۆلتییا پەروەردە/ زانینگەھا زاخۆ