دەیبابێن نیشتمانپەروەر حکومەتا ھەرێما کوردستانێ یا ب دەست و باسکێن ھەوە و باب و باپیرێن وە و خوینا ھزاران شەھیدان ھاتیە ئاڤاکرن و یادگارێ زەحمەتا وە ھەمیانە، نە ب چاڤنقاندنەکێ و گۆپالەکێ جادووگەرانە. کی ھەیە ڤان ھەمی زەحمەتا ب ئاڤێ دا بەردەتن، تنێ شێت و دین و ھارەک نەبیتن؟ بەلێ مخابن ھندەکان دڤێتن ھەمی وێ چەندێ ب ئاڤێ دا ببن و خۆ کرییە بەردەستکێ دوژمنان و بۆ دلێ وان ڤێ کەشتییا ئاراما کوردستانێ ب بزماران کۆن بکەن. ھەکەر کۆن بی ھەمی پێکڤە دێ تێچین و خەندقین، و دوژمن ژ دویرڤە " تلیق تلیق " ب مە کەنە کەنی و یارییا ب مە کەن، و بەری ھەمیان ژی ناسیۆنالیزما عەرەب، یا کۆ مە ھزاران سالا خزمەتا وان و زمانێ وان کری. ئەرێ تو نابینی و ئاگەە ژ ھندێ ھەیە ھندەک کەسێ ڤێ چەندێ ب کۆڕ و کچێن تە یێن قوتابی بکەتن و ل شوینا ھندێ وان فێری ڤیانا ھەوە و ماندیبوونا بابۆکالێن خۆ، و یا کوردستان و پێشمەرگەی و نەتەوە و ئاخ و نیشتمان و سەرۆکێ خۆ یێ پێشمەرگە و دیپلۆماسی و وێرەک و خۆدان دیرۆک و " ێعوید" بکەتن، بەردەوام ب ڕێکێن جۆدا و ب وشە و تێگەھێن وەکی " گەندەلی، پارێ گۆمرکێ و پەترۆلێ، ... ھتد"، مەژیێ وان تژی دکەن و وان فێری ھلگرتنا کەرب و کینە و نەڤیان و ھەلچۆنێن دەروونی و ڕکگرتنێ ژ کەس و لایەنان دکەن؟ تو دزانی ئەو قوتابیێنە و پێدڤی ب مەژییەکێ پاقژ و سادەنە دا بخوینن و فێر ببن، نەک دەمێ خۆ ل ھزرکرنا ڤان تشتان ببەنە سەر، یێن کۆ ھەمی بابەتێن سیاسینە، و سیاسەتکرن لڤی وەلاتێ تێر دوژمن نە یا بسانەھییە و تشت نەوەسانە وەکی ھندەک بەحس دکەن و ڤەدگێڕن و خەلکێ پێ دخاپینن.
باش بزانە ئەڤ شێوازێ پەروەردێ مەزنترین گۆرزە دژی زەحمەت و ماندیبوون و مەزاختنا ھوین بۆ وان دکەن، و پاشی ژی کارتێکرنا نەرێنی لسەر وەرار و گەشەیا دەروونییا وان دکەتن و ل داھاتووی دا ئاستێ خۆڕاگرییا ( مەناعە) سایکۆلۆژیا وان کێم دبیتن و نەشێتن خۆ لبەر گەلەک کاودانێن سۆزداری و جڤاکی بگرن، و ھێدی ھێدی دێ ڕێک لبەر مەرجیبوونا وان بڤی شێوازێ ڕەفتاران خۆش بیتن و تووشی ھزران جۆرێن ئێش و ئازار و نەساخیێن گرانێن دەروونی بن، و پاشی تو ڤیابا مەلیۆنەھا پارەی ل چارەسەری و دەرمانێن وی بمەزێخی. ئەرێ تە ئەڤ چەندە پێخۆشە.
ل بیرا ھەوە بیتن چەند ئەرکێ پەروەردەکرنا وان زارۆکان خەما تەیە ھند ژی دویر ئێخستنا وان ژ وان کەس و لایەنێن بۆ خۆ یارییان ب تە و ژیان و داھاتوویا زارۆکێن تە و ڤێ کوردستانێ دکەن ئەرکەکێ گران و بەرپرسیارەتییا ڕەوشتی و نیشتمانییا تەیە و تو ل ئاییندەی بەرامبەر ئەنجامێن وێ پەروەردا شاش دێ ھزار لۆمەھی و نفرینان لخۆ کەی. لەوڕا ھشیاری زارۆکێن خۆ بن ! ئەم بۆ دەولەتا کوردستانێ پێدڤی ب مرۆڤێ ئەڤیندارین نەک یێ تژی کەرب و کینە و دلمری و ھێجەتگر. *بسپۆرێ زانستێن پێداگۆگی و پەروەردەیی/فاکۆلتییا پەروەردە/ زانینگەھا زاخۆ