حکومەتە شیعەگەریەکەی بەغدا هەر کاتێ بیەوێ کێشە بۆ کورد درووست بکات، یان سنوور بۆ خواستە نەتەوەیی و داوا رەواکانی کورد دابنێ، ئەوا پەنا بۆ دەستوور دەبا و دوو تا سێ لاپەڕەی لێهەڵدەداتەوە و دەڵێ: ئەو ئەو هەنگاوەی کورد نادەستوورییە، بەڵام مووچە بڕین و خولانەوە لەناو فتوای مەرجەع و هەڕەشە کردن لە کورد و خۆ دزینەوە لە جێبەجێ کردنی ماددەی ١٤٠و زۆر هەنگاوی تری شیعەگەریانەی خۆیان بە دەستووری دەزانن، کورت و کرمانجی ئەوەی بۆ خۆیانی بە باش بزانن دەستووری بۆ پێشێل دەکەن و ئەوەی زیان بە بەرژەوەندیە مەزهەبیەکانیان بگەیەنێ هەوڵدەدەن بە دەستوور پێشێلی بکەن.
ئەو گەمە دەستووریەی بەغدا لە ئێستا و رابردووداشدا کردوویەتی و دەیکات، سرووشتی مەزهەب بینی شیعەیە و جێگای هیچ سەرنج و توانجێکی سیاسی نییە، بەڵام ئەوەی جێگای سەرنج و تێبینییە کوردبینی دژبەرانی سەربەخۆیی هەندێ کەس و دەستە و گرووپی کوردییە کە هەمان سرووشتیان وەرگرتووە، ئەو کەس و دەستە و گرووپانەی مالیکی و فەتلاوی دەیانجووڵێنن هەر هەنگاوێک بە ئاڕاستەی سەربەخۆیی کوردستان بێ، یان لەگەڵ حەز و خولیای سیاسی و مەزهەبی مالیکی و فەتلاوی یەکنەگرێتەوە بە نادەستووری ناو دەبەن، تەنانە لە مالیکی و فەتلاویشیان تێپەڕادووە و سەربەخۆیی بە پیلانگێڕی دژ بە یەکپارچەیی خاکی عێراق دەزانن و دەیدەنە بەر نەشتەری دەستوور و دادگای فیدراڵی عێراق، یان نەتەوەپەروەری و خواستی سەربەخۆیی کورد بە ناسیۆنالیزمی توندڕەو و شەڕانی تاوانبار دەکەن.