لیستی(دەوڵەتی یاسا) بە سەرۆکایەتی، (نووری مالیکی)، لەهەوڵی ئەوەدایە، دووبارە بێتەوە سەر دەسەڵات، لایەنگرانی رەوتی (موقتەدا سەدر) و (حەیدەر عەبادی) سەرۆک وەزیرانی عێراق، لەگەڵ ئەوەدانین مالیکی بێتەوە سەر دەسەڵات، چونکە هەردووکیان ئەزموونێکی تاڵیان لەگەڵی هەیە، هەربۆیە ئێستا ئێران و مالیکی، لەهەوڵی جددی دان بۆ ئەوەی حەشدی شەعبی وەک قەوارەیەکی سیاسی بناسێنرێت و باڵێکی سیاسی بۆ دروست بکرێت، تا لە داهاتوو لەژێر چەتری نووری مالیکی، کاری سیاسی بکەن، ئەمەش پێچەوانەی بیرکردنەوەی (سەدر و عەبادیە)، بۆیە هەوڵەکانی موقتەدا سەدر، بۆ یەکلاکردنەوەی پرسی حەشد و بێ دەنگ بوونی (عەلی سیستانی)، گەورە مەرجەعی ئایینی شیعەکان لە عێراق لە هەوڵەکانی حەیدەر عەبادی، بۆ هەڵوەشاندنەوەی حەشد و پێکهێنانەوەی سوپای عێراق، نیشانەی ئەوەیە شیعەکان نایانەوێت، جارێکی دیکە رابردووی نووری مالیکی دووبارە ببێتەوە، ئەگەر ئەمە کاردانەوەی سیاسی بێت لەدژی مالیکی لە عێراق، ئەوە لەئەگەری گەڕانەوەی نووری مالیکی، دوو ئەگەریش لەبەردەم هەرێمی کوردستان دروست دەبێت، یەکەم: (نووری مالیکی)، ئامادەیە بۆ جوڵاندنی هێز بەڕووی هەرێمی کوردستان، چونکە خۆی یەکلاکردوەتەوە لەوەی دەبێت پێشمەرگە و ئیدارەی هەرێمی کوردستان لە ناوچە کێشە لەسەرەکان بکشێنەوە، لە ئێرانیشەوە ئەو پەیامەی راگەیاند، ئەگەری دووەم: ئەگەر مالیکی، نەیتوانی دەسەڵات وەرگرێتەوە، هەندێک کارت تاقی دەکاتەوە، یەکێک لەوانە دەستخستنە ناوکارووباری هەرێمی کوردستان، لەوانە پشتیوانیکردنی (پەکەکە) لە شەنگال و خانەسۆر و مەخموور، دروستکردنی حەشدی شەعبی لە سنووری کوردستان، بەتایبەت لە (هەڵەبجە، خانەقین و کەرکووک)، لە خەلیفان سەر بەقەزای سۆرانیش ئەم هەوڵە هەیە.
لە هەردوو ئەگەردا پرسیارێک دێتە پێشەوە، پرۆژەی بارزانی لەبارەی سەربەخۆی کوردستان چی لێدێت؟ لە راستیدا ئێستا دەوڵەتی یاسا گەیشتوەتە ئەو باوەڕەی کە یەکێتی و گۆڕان لەگەڵ پرۆژەکە نین، هەڵبەتە لە ئاستی راگەیاندنی یەکێتیش، ناوە بەناوە، نوقوورچەی (نامانەوێت) لە پرۆژەکە دەدرێت، بزووتنەوەی گۆڕانیش لە نێوان هاوپەیمانی داهاتووی مالیکی و پرسی پرۆژەکە خۆی یەکلا نەکردووەتەوە، بەڵام لە هەموو ئەگەرێکدا لەگەڵ یەکێتی یەکهەڵوێستە، هێشتا دیار نییە گۆڕان دەیەوێت لەگەڵ پارتی رێککەوێت یان بەم دۆخە درێژە بە سیاسیەتی خۆی بدات، یەکێتیش دەیوێت لەسەر هەموو پرسەکان قسەی هەبێت، بەس ناتوانێت بریار بدات، بۆیە لەوە دەچێت سیاسەتی مانەوەی گۆڕان و یەکێتی بەم شێوەیە وەک کارتێک بێت لەبەرانبەر پشتیوانی پرۆژەکەی بارزانی و چوونەوە بۆ بەغدا.
گەورەترین گرفتی گۆڕان و یەکێتی لەوە دایە، هەردووکیان نایانەوێت قسەی کۆتایی خۆیان رایگەیەنن، لەوەش دەچێت جمووجۆڵەکانی دروستکردنی حەشدی شەعبی لە کوردستان سیاسەتی تازەی (مالیکی) بێت، کە بەڵێنی دابێت بە (یەکێتی و گۆڕان) پشتیوانیان دەکات و پارەیان پێ دەدات تا کادیری خۆیان ناونووس بکەن بۆ ناو ڕیزەکانی حەشدی شەعبی، هەربۆیە لە ئاستی کادیرانی یەکێتی و گۆڕان ئەم پرسە دەورژێنرێت، بە نمونە(لە هەڵەبجە خانەنشینکراوێکی یەکیێتی و لە خەلیفان هەڵسوڕاوێکی گۆڕان)باس لە دروستکردنی هێزی حەشدی شەعبی دەکەن، سەرجەم ئەم جوڵانەوانە دوو پەیام دەگەیەنن، یەکەم بە خەڵکی کوردستان بڵێن ئەوە دۆخی کوردستانە کاتی دەوڵەت نییە، دووەم: زوومی حزبەکان لەسەر سەربەخۆی دوور بخەنەوە.
جیا لەمانە حزبەکان تووشی دوورکەوتنەوەی سیاسی هاتوون، بەشێکیان لەژێر هەر فشارێکدابن ئەوەیان بەلاوە گرنگە کە هەرحزبەو بۆ خۆی ئیدارەی شارێک بدات، بۆنمونە قسەکانی ئەم دواییەی (ئەبوبەکر هەڵەدنی)، ئەندامی سەرکردایەتی یەکگرتوو، بۆ ئەوەی کە یەکێتی نەوت و گاز لەسەر شاری هەولێر بگرێتەوە و وەک کارتی فشار بەکاری بهێنێت، لەهەمان کاتدا هەوڵەکانی یەکێتی بۆ دەست بەسەراگرتن کۆمپانیای نەوتی باکوور و قسەکردن لەسەر ئەوەی دەبێت یەکێتی هێزی لە کێڵگە نەوتییەکان هەبێت، دەرخەری ئەو راستییەیە کە هەوڵێک هەیە، بۆ ئەوەی پرسی سەربەخۆی کوردستان، پارچە، پارچە بکرێت، خەڵک فێری ئەوە بکرێت کە باشترین چارەسەر بۆ پرسی کوردستان، دابەش بوونە، لەوەش دەچێت پرۆژەی پەکەکە بەلای یەکێتی و گۆڕانەوە پەسەند بێت، کاتێک داوای سیستەمی کانتۆن بۆ شارەکان دەکات، کانتۆنەکانی پەکەکە وەک بەدیلێکە بۆ پرۆژەی سەربەخۆی کوردستان و بەئاشکراش ئەوەیان گوتووە.
لێرە پرسیاری گرنگ دێتە پێشەوە، هەوڵەکانی گەڕانەوەی نووری مالیکی بۆ سەر دەسەڵات و هەڵوێستەکانی گۆڕان و یەکێتی و جوڵانەوەکانی پەکەکە دەتوانن رێگری لە پرۆژەی بارزانی بکەن؟ بێ گومان وەڵامێکی زۆر هەڵدەگرێت، بەڵام لە هەموو گرنگتر ئەوەیە کە خەڵکی کوردستان دەبێت تەحەدای ئەم جوڵانەوانە بکەن، چونکە بریار دراوە دەبێت ڕفیراندۆم بکرێت و خەڵکی کوردستان چارەنووسی خۆی یەکلا بکاتەوە.