بۆ ھندەکان پرسیارەک بێ ڕامانە، چونکی ئەو ژی پشکەکن ژ جێبەجێکرنا پرۆسێسا ب کێم زانین و کرێتکرنا نەتەوە و باوەر و ئایینێ کوردان، ئەوا ل دەڤەرێ بڕێڤە دچیتن، و ھەمیشە، وان و خەلکەکێ بچاڤەکێ کێم تەماشەی باوەرێن کەڤنارێن خۆ و خەلکێ و نەخاسمە کوردان کرینە، لدەمەکی کە ئایینێ کەڤنێ کوردان ئێکە ژ وان ئایینێن کەڤنار، باوەری ب خۆدایەکێ ئێکانە و ھەبوونا جیھانەکا دیتر و دۆزەخ و بەھشت و سزا و پاداشتکرنێ و نڤێژێن پێنجکانی و قەنجیکرن ب ھزر و کریار و زمانی و خۆپاراستن ژ دەمارگیریێ تێدا سەر ھەمی باوەران بوویە و پێشی گەلەک ئایینان ھاتیە، و پترتر ژ ٤٠٠٠ سالان و بەلکۆ ژی کەڤنترە.
نەڤرۆزا، کۆ ل ڤان چەند سالان بوویە بۆنەیەک جیھانی، ئێکە ژ سیمبۆلێن باوەرێن ئایینەکێ کەڤنارێ کوردان، و تێدا، ئەو پشکا زەردەشتی بناڤێ " فرەوەھەر " ددەتە نیاسین، و ب پشکەک ژ ستراکتوور و پێکھاتا سایکۆلۆژیا مرۆڤان دزانیتن، و بڤی ڕەنگی زەردەشت ب ئێک ژ کەڤنترین و مەزنترین زانایێ دەروونناسیێ دھێتە ھژمارتن، بدیتنا وی ژ ئەسمانان دھێنە خوارێ داکۆ سەرەدانا کەس و کارێن خۆ لسەر ئەردی بکەن و پاشی بزڤڕنە جھێ خۆ، و ئاریایی ل جەژنا نەڤرۆزێ ب ھەمی ڕەنگانڤە و ب شاھی و ئاھەنگان و ئاگرھلکرنێ ڤە، دچنە دەرڤەی مالان و ناڤ سروشتی دا پێشوازیێ ژ وان بکەن. ئاریایان چ جاران حەز ژ خەم و کۆڤانان نەکرییە و پترتر بۆ ئاسوودەیی و ئارامییا گیان و دەروونێ خۆ بزاڤا گێڕانا ئاھەنگان کریە.
بھایێن د ئایینێ زەردەشتی، و یاکۆ ئێزدیاتی وێنەیەکە ژ وی ئایینی، ژ جوانترین بھایێن مرۆڤاتیێ دھێنە ھژمارتن، بەلێ پا بزاڤا نەشرینکرنا وێ ب سەدان سالان ھەمی لایەن و ھەتاکۆ سایکۆلۆژیایا تاکێ کوردی و ستایل و شێوازێ ھزرکرنا وی ژی شێواند و گھۆڕی. لدەمەکی ئەو تاک سەردەمەکێ درێژ ب ھۆشیاری و زیرەکاتی و زانایی و بھایێن خۆ یێن جوان " شاھینشاھییەکا " مەزن ل دەڤەرێ ھەبی و ھەتا نۆکە ژی کەربێن د ناخێ ھندەکان یێن وی سەردەمێ زێڕینن ئەڤرۆکە خۆ د بزاڤێن وەکی داعشێ دا دبینیتن.
بژی نەڤرۆز و بژی ئەو سەرکردەیێ وەسا ھزر دکەتن و باوەری ب " ئێکسانی و پیرۆزی و برایەتییا ھەمی مرۆڤان ژ ھەمی ئایین و نەتەوە و نەژادان ھەی، و بدیتنا وی مرۆڤ ئازادە چەوا د خۆدایێ خۆ بگەھیتن و وی بپەرێستیتن و نابیتن کەس باوەرێن خۆ یێن ئایینی لسەر ھیچ کەسەک دیتر بسەپینیتن"، و ئەو ژی جەنابێ سەرۆک بارزانییە، کە نەک تنێ نە دگەل ھندێ یە حاشایێ ل بھا و کەس و نەتەوە و ئایینەک دیتر بکەتن، بەلکۆ خۆدێ مرۆڤ، بدیتنا وی، مەزنترین و جوانترین بھایە ل ڤێ جیھانێ، و جیھانێ بێی مرۆڤی ڕامان و واتایەک نینە. لەوما کورد پێدڤییە ب کەساتی و باوەر و مێنتالیتەیا خۆ دا بچیتن و ل شوینا خۆ ب کەسەک شکەستی ببینیتن بلا شانازیێ ب ڕابردوویەکا پاقژ و دێرین، و ئاییندەیەکا گەش و پرشنگدار و ئازاد ژ بندەستی و کۆلەداریێ بکەتن و تنێ ئەڤەیە دەرمانێ ھەمی برینێن وی. *بسپۆرێ زانستێن پێداگۆگی و پەروەردەیی/فاکۆلتییا پەروەردە/ زانینگەھا زاخۆ