ئەو کەس و دەستە و گرووپانەی ئێستا شانازی بە هاوپەیمانێتی دەوڵەتی یاساوە دەکەن، بە یاسایی کردن و دەنگدان بە حەشدی شەعبی بە هەڵوێستی نیشتیمانی دەزانن، خواستی سەربەخۆیی کوردستان و هەنگاوەکانی دامەزراندنی دەوڵەتی کوردی بە پیلان دژی یەکپارچەیی عێراق ناو دەبەن، مەرحەبایەکی سیاسی نوری مالیکیان پێ پیرۆزترە لە گێڕانەوەى کەرکوک و ناوچە کوردستانیەکانی تری دەرەوەی ئیدارەی هەڕیم بۆ باوەشی نیشتیمانی دایک، دەریایەک فرمێسک و هەنیسکە لە کوڵ و بەردەوامەکانی دایکی شەهیدان بە خەندەیەکی سەر لێوی حەنان فەتلاوی دەگۆڕنەوە، حەسرەت بۆ سیستەمێکی هاوشێوەی سیستەمی (بەغا) هەڵدەکێشن، لە ئێستادا فرمێسک بۆ هەڵەبجە دەبارێنن و لە رابردووشدا خوازیاری بە هەڵەبجە کردنی چەند شارێکی تری کوردستان بوون، بۆ ئازاری ئەنفالی گەرمیانیەکان خۆیان رادەژێنن و باوەشی گەرمیش بە حەشدی شەعبی دادەکەن، هەر ئەو کەس و دەستە و گرووپانە ئێستا باڵانسی شۆڕشگێڕیان بە شێوەیەک دابەزیوە کە بەشی پەیوەندییەکی نەتەوەیی ناکات، بێ ئەوەى شەرم لە مێژووی خەبات و قوربانیدانی بزووتنەوەى رزگاریخوازی کورد بکەن، رێز لە داهاتووش ناگرن و کوردایەتی لە هەناوی عرووبەدا دەگوشن.
ئەو هەڵوێستە نانەتەوەیی و نانیشتیمانیانەی ئەو کەس و دەستە و گرووپانە کە بە مەبەستی چەواشەکردنی رای گشتی، جاشایەتی بە تامی کوردایەتی بە خەڵکی کوردستان دەفرۆشن و ململانێی پێ لەگەڵ پرسی سەربەخۆیی و خواستی دەوڵەتی نەتەوەیی دەکەن، دەکرێن بە دوو بەشەوە، بەشی یەکەمیان ئەو کەس و دەستە و گرووپانەن کە لە رابردوودا داگیرکارانی کوردستان بە گەروویاندا رشاونەوە و لە شەڕی پێشمەرگە و شۆڕشگێڕانی کوردستان لەگەڵیان هاوسەنگەر بوون، بەشی دووەمیشیان ئەو خاوەن فایلانەن کە پەیوەندی ژێر بە ژێریان هەبووە و هەواڵی بوونی بارەگای جوولەکەیان لە هەولێر بە رژێم دەدا و بۆ لەناوبردنیان داوای چەک و جبەخانەی جەنگیان لە ئەنفالچی و کیمیا وەشێنانی بەغدا دەکرد.
ئەو کەس و دەستە و گرووپانە کە مێژووی بزووتنەوەی رزگاریخوازی کورد شەرم لە تۆمار کردنی کار و کردەوەی رابدوویان دەکا و، داهاتووی نەتەوەییش لە هەڵوێستی خۆ بەدەستوە دەرانە و پەیوەندیە ژێر بە ژێرەکانیان بە داگیرکاانی کوردستانەوە بێزارە، سەردەمانێک موزایەدەیان بە کوردایەتییەوە دەکرد و بە کەمتر لە سەربەخۆیی و دەوڵەتی کوردی رازی نەدەبوون، کەچی دوای ئەو هەموو مەرگەسات و بڕینی ئەو رێگا دوور و درێژە و نزیک بوونەوە لە سەربەخۆیی کوردستان و دامەزراندنی دەوڵەتی کوردی، هێشتا دەستبەرداری مێژووی رەشی خۆیان نەبوون و بە رەشبینیشەوە لە داهاتوو دەڕوانن،