ئه‌گه‌ر په‌که‌که‌ ده‌ڵێن؛ مانه‌وه‌مان له‌ هه‌رێمی کوردستان بۆ به‌رگری و پاراستنی خه‌ڵک و خاکی کوردستانه و به‌رخۆدان ده‌که‌ین، ده‌بێ ڕێگر نه‌بن له‌وه‌ی پێشمه‌رگه‌کانی ڕۆژئاوا که‌ خه‌ڵکیی ڕۆژئاوان بگه‌ڕێنه‌وه‌ و ئه‌وانیش به‌رگری له‌ خاک و خه‌ڵکی خۆیان له‌ ڕۆژئاوا بکه‌ن.
ئه‌گه‌ر په‌که‌که‌ کاروچالاکی سیاسی و حزبی و سه‌ربازی له‌ شاره‌کانی هه‌رێمی کوردستان بۆ خۆیان به‌ ڕه‌وا بزانن، نا‌بێت ڕێگری له‌ کاروچالاکی سیاسی و سه‌ربازی پارته‌ کوردیه‌کان و ئه‌نه‌که‌سه‌ له‌ ڕۆژئاوا بکه‌‌ن.
ئه‌گه‌ر په‌که‌که‌ بڵێن بۆ به‌رخۆدان و به‌رگری له‌ خاکی هه‌رێمی کوردستان قوربانیمان داوه‌ و ناگه‌ڕێینه‌وه‌، ده‌بێت ئه‌وه‌شیان له‌ بیر بێت که‌ له‌ منبج-ی سوریا سه‌دان گه‌نجی کوردیان به‌ کوشتندا و دواتر ئه‌و ناوچه‌یان ته‌سلیم به‌ ڕژێمی به‌شار و سوپاکه‌ی کرده‌وه‌ و کشانه‌وه‌.

په‌که‌که‌ ده‌بێت ئه‌وه‌شی له‌ بیر بێت کاتێک پێشمه‌رگه‌ سنوری دوو وڵاتی بڕی و چوونه‌ کۆبانێ و به‌رگریان له‌و شاره‌ کرد و نه‌یانهێشت داگیر بکرێ، دواتر گه‌ڕانه‌وه‌ و هیچ کێشه‌یه‌کیان دروست نه‌کرد، ئێستاش خه‌ڵکی شنگال و ئه‌و ناوچانه‌ی په‌که‌که‌ی تێدایه‌ سوپاسیان ده‌که‌ن و داوایان لێده‌که‌ن نه‌بنه‌ کێشه‌ و ته‌نها ڕێگه‌ی چاره‌سه‌ری ئه‌وه‌یه‌ بکشێنه‌وه‌.
به‌ڵام ئه‌گه‌ر په‌که‌که‌ بیه‌وێت هاوشێوه‌ی ڕۆژئاوا سیاسه‌تی خۆسه‌پاندن و سیسته‌می میلیتاری و تاکڕه‌وی له‌ هه‌رێمی کوردستان په‌یڕه‌و بکات و وه‌‌ک چه‌ته‌یه‌کی ئێقلیمی ئه‌جێندای نه‌یارانی کورد جێبه‌جێ بکات، نه‌ک ناتوانێ به‌ڵکو به‌ توندی ڕێگری لێده‌کرێت.