ڕۆژا شەمبیێ وەک گەلەک جاران ئەز ب پاسا عەباسیکێ چۆمە بازاڕی داکۆ ھندەک تشتێن پێدڤی بکڕم. ل ڕاستا گۆڕەپانا بارزان من دیت کۆمەکا سنێلەیا ل ناڤ پارکی و لبن ئاڵایێ کوردستانێ کارەک دکر. شۆفێری ئاگەە ژ بایێ جیھانێ نەبی، ما حێبەتی پسیار کر ئەڤە چ چێبیە؟ من ژی تێگەھاند کۆ ڕۆژا ئالایە. بێھنەکێ ما و پاشی دەڤێ خۆ یێ ب گازندە ڤەکر و پاشی گۆت: ڕۆژا خوەلیسەریێ!! ڕاستی ئەز نزانم کا وی چ ئاریشەیەک و کاودانەکێ گێولی(میزاجی) د وێ گاڤێ دا ھەبیە یان ژی چ دگەل کوردستانێ ھەیە، لێ ئەز ژ دویر ڤە وی دناسم، چونکی ئەڤە چەند سالە ئەز ب پاسێن عەباسیکێ ھاتووچۆیا ناڤ بازاڕی دکەم. ئێکی گۆتە من لسالێن نۆتان و ل گرانیێ وەکی گەلەک ژ مە خەلکێ ھەژار بین و ھەتا ئێڤاری ل دەشتێن زاخۆ لدوویڤ ترەکترێ و پاتۆزێ گۆلێن گەنمی لێکددان و دکرە ئار و ساڤار و نۆکە.... وی (قەسرەکا) ھەی وەک پاشای. باشە ئەڤ ھەمی تشتە و گەلەکێن دیترین ئەز نزانم وی ژ کیڤە ئیناینە ھەکەر نە ب خێرا کوردستانێ و مێرخاسییا پێشمەرگەی و خوینا شەھیدان و خەمخۆرییا مالا بارزان بۆ ڤی مللەتی و ھەروەسا ژی وی ئالای نەبیت ؟ مرۆڤی ژیێاتی بۆ چ پارتەکێ و ئایین و مەزھەب و لایەنەکێ سیاسی ھەبیتن و چ ئاریشە ھەبن بلا تێکەلی ھندەک بھا و پیرۆزییان نەکەتن، و بلا دۆھی ژبیر نەکەتن دا ئەڤرۆ بەدبەخت و سۆباھی شەھمزار و ڕویڕەش نەبیتن. ئەز پشتڕاستم ئەڤ مرۆڤە و گەلەکێن وەکی وی، ل ھەمی تشتێن دیترێن ژیانێ ژی وەسا ھزر دکەن و وەکی ھندەک کەسێن وەکی خو، ئەوێن کۆ ئیک ژ بزاڤێن سەردەمیانە و ھەڤچەرخ بۆ ڕەڤاندنا خەم و خەیالا مرۆڤان و سەر ژ نوی ئاڤاکرنا کەساتیا مرۆڤایەتیێ و شارستانیەتێ، بناڤێ پرۆگرامێ زمانەوانییا دەماری ( NLP )، یاکۆ گەلەک زانا و خەمخۆرێن مرۆڤایەتیێ ل ئەمڕێکا و دەڤەرێ و ژ وان ژی ئانتۆنی ڕابینز و عەلیرەزا ئازمەندیان، وان ب کەسایەتیێن نەرێنی و (نگێتیڤ negative) دزانن و ددەنە نیاسین، و وان ب بەرھەمەکێ سیستەمەکێ خەلەتێ مەرجی و پەروەردەبونێ د خێزانێ دا لسەر بنەمایێ سەرەدەریکرنا نەمرۆڤانە و بێ دلۆڤانی و ئاخفتنێن نەخوەش و گۆتنێت کرێت و شکەستی دزانن، کە ئەڤ تۆخمە کەسە دناڤ مە دا گەلەکن و کەساتی و سایکۆلوژیایا ھزری و مێنتالیتەیا وان یا ھاتیە دەقساندن، و یێ مایی قاقۆسکی و ھێدی نەشێتن بسەر خوڤە بھێتن. ئەڤ دەربڕینا وی کەسێ شوفێر ل ھەمبەر ئالایێ کوردستانێ کری، کە وەک ئێک ژ ھێمایێن نەتەوایەتی و ژێیاتیێ و ئێکگرتنا کوردستانیان دھێتە ھژمارکرن، تەنھا نموونەکا بچویکە ژ ڕەفتارێن وی یێ نەئاسایی و ناوازە، و نیشانەکە ژ شەپرزەیێ و شاشیێ و نەرێنیبوون د ھزرکرن و مێنتالیەتەیا سەرەدەریکر لگەل ئاریشەیێن تایبەت د سایکۆلۆژی و جڤاکێ دا. زانایین(NLP) د وێ باوەرێ دانە پەروەردەیەکا خێزانی یا نەدروست ئێکە ژ مەزنترین ئاستەنگ لبەر وەرار و گەشەیەکا دروست و کەساتیێ و شێوازێ ھزرکرنێ لنک زارۆکان. ئەوا کۆ جھێ داخێ یە ل ناڤ خێزانا کوردستانێ دا گەلەک ژی بەربەلاڤە ل ھەمی ئاستێن جڤاکی و ئابووری و ڕەوشنبیری دا. خۆزی خێزانا کوردستانێ ل شوینا گەلەک تشتێن نەبەرکەفتی و (مەزھەریان) و بێ سەروبەر، زاروکێن خۆ دابایە بەردەستێ خواندن و فێربوون و پەروەردەبوون لبەر دەستێ کەسانێن وەک ڕوبینز و ئازمەندیانی،داکۆ درست ھزر بکەن و بزانن چەوا و بۆچی پێدڤییە ئەو ھزر بکەن و بزانن چەوا مرۆڤەک خۆدان باوەری بخۆ و ئەرێنێ (پۆزێتیڤ) و بمفا و دلسۆزی و خەمخۆری بۆ نیشتیمان و ئاخ و نەتەوێ خۆ و کوردستانێ بن، ئەو بنەمایێن پەروەردا ئاریاییان لسەر دەستێ زەردەشتێ شەھیدێ پاراستنا مرۆڤایەتی و نەتەواتیێ، ھەمیشە داکۆکی لسەر دکر، تاکۆ بزانن ڕۆژا ئالایێ کوردستانێ ڕۆژا سەرکەفتنێ و بەختەوەریێ یە نەک خوەلیسەری، بزانن ئەو مرۆڤێ بڤی ڕەنگی ژی ھزر بکەتن و ھێجەت ھەر تشتەک و باوەرەک و ئاریشەیەک بیتن، ئەنجام ئێک تشتە و ئەو ژی گەھشتنە ب ئاستێن بلندێن شەپرزەییا دەروونی لنک وی کەسی و ل ڕۆژانێن ئاییندەدا.
*بسپۆری پێداگۆگی و سایکۆلۆژیایێ/ فاکۆڵتییا پەروەردێ/ زانـــینگـــەھا زاخۆ