*رەنگە ئەو پرسیارە بكرێ كە ئاخۆ دەبێ شەڕو كاولكارییەكانی داعش چ سوودێكی بۆ كوردستان و ئایین و ئایینزاكان بوو بێ؟ ئەم پرسیارەش لەشوێنی خۆیدایە، چونكە بە ئەندازەی شۆڕشێكی چەندین ساڵە شەهیدو بریندار و كەمئەندام و پەككەوتەمان هەبووەو داعشییەكان لە سەدام خراپتر خاكمانیان بە سوتماك كردو ژن و كچیان بەتاڵان بردین. هەزاران خێزانمان بێ سەرپەرشت بوون، بێ شومار دایكی جگەرسووتا و خێزان و هاوسەری پشتشكاومان هەیە، ئامارەكان زۆر دڵتەزێنن و درەخەری ئەوەن كە چەندە منداڵی بێتاوان لەنازی باوك بێبەش كراون، لێ پرسیار ئەوەیە لەسەد ساڵی رابردوودا كەی رێككەوتووە شۆڕشی كوردو نەبەردەكانی شارو شاخ شەهیدو قوربانیی نەبەزەكانی لێ نەكەوتبێتەوە؟ لەگەڵ هەموو ئەو نەهامەتییانەشدا كورد بەوە ناسراوە كە دڵۆپێك خوێنی پێشمەرگەو شەهیدی پێشمەرگە بە هەموو دنیا ناگۆڕێتەوە. كورد بەوە ناسراوە كە شەهید تاجی سەربەرزیی نەتەوەكەیەتی، بۆیە ئەولادەكانمان شانازی بە وشەی شەهید و شەهیدبوونی باوك و برای خۆیان و هەموو لایەك دەكەن.
لە مێژووی ئێمەدا ئاخۆ چەند كیژی وەكو لەیلا قاسم چوونەتە بەر پەتی سێدارەو و چەند كوڕی نەبەردو بوێر، مەردو قارەمانانە سڵیان لەمردن نەكردۆتەوە؟
ئاخۆ روویداوە لە تاریخی میللەتان سێ برای كەسێك شەهیدبێت و برای چوارەم ئامادەبێ دەستوبرد بچێتە بەرەكانی شەڕەوە؟ ئایا هەبووە باوك شەهید ببێ و كوڕەكەی بڵێ: من لە پرسەی باوكم ئامادە نابم و چەك هەڵگرێ و بڕواتە بەرەی شەڕی داعش؟ لە كام نەتەوەی ئەم جیهانەدا دایكی وا نیشتمانپەروەر بینراوە كە لەسەر تەرمی كوڕەكەی گوڵ و چوكلێت ببەخشێتەوە؟! ئەمانەو هەزاران نموونەی دی، داستانی مێژووی رەنگینی كوردن و ئەوە كوردە ئەو حەماسەتە لە رۆڵەی خۆیدا دەبینێت و، ئێمەی كوردین ئەو نموونەیانە لەشەڕی ئەو مەلعوونانەی داعش-یش دەبینین.
هیوادارم وا لێك نەدرێتەوە دركم بەو حاڵەتانە و ئەو زیانە مرۆییە گەورەیە نەكردبێت، مەگەر خانەوادە هەیە باجی شەڕی ئەو بەربەرانەی داعشی نەدابێ؟ بەڵام دێمە سەر بەشی دووەمی وتارەكەو مەنفەعەتەكانی ئەو شەڕە سەپێندراوە دەخەمەڕوو:
*جارێك لەنەوەتەكانی سەدەی رابردوو برادەرێكی زۆر ئازیزم كە لە هۆڵەندا دەژیا، پێی گوتم: لەفەرهەنگی هۆڵەند وشەی پێشمەرگە لێكدانەوەی دیكەی بۆ نەكراوەو رێك وەكو خۆی تۆماركراوە، راستی شاگەشكە بووم، فەرهەنگی وڵاتێكی ئەوروپی وشەی پێشمەرگەی لەناواخندا هەبێ! ئێستاش هاووڵاتی و فەرمانبەرو چین و توێژی جیاوازی وڵاتان، لەكافێیەكی دوور لەچاوی دیپلۆمات و چاودێران بەفەخرەوە ناوی پێشمەرگە دەهێنن. شەخسی گەورەترین وڵاتی جیهان (باراك ئۆباما) لەئێمە باشتر دەزانێ دەستەواژەی پێشمەرگە، نەك جارێك، سەدجار لەسەر زاری بهێنێت و تەواوی عالەمی سیاسیی جیهان لەكەنەداوە تا ئوستڕالیا شانازی بە كوردو پێشمەرگەوە دەكەن و بە پارێزەری كەرامەتی مرۆڤایەتی لە سەرتاپای جیهانی دەزانن و بە چەندین جۆر لە مەشق و تەقەمەنی و هێزی ئاسمانی پشتیوانی دەكەن، كە دواجار بە ئامادەبوونی سەرۆكی كوردستان، وەزیری بەرگریی ئەمریكا لە هەولێری پایتەخت میداڵی شەرەف وەك ئازایەتی هەموو پێشمەرگە بەخشییە چوار پێشمەرگەی قارەمان.
*لایەنێكی دیكەی زۆر گرنگی شەڕی داعش ئەوەیە كە وڵاتانی عەرەبی و ئیقلیمی بەتایبەت لە زەمانی سەدام حوسێن وایان تێگەیاندبوون كە كوردو پێشمەرگە تێكدەرن و ئەوانە «عوصاتو لادەرو خۆفرۆشن» كەچی ئەمڕۆ دەبینین فەڕشی سوورمان بۆ ڕادەخەن و بەفەخرەوە ئاڵاكەمان بەرزدەكەنەوە.
* لەم وتارەدا مەبەستم بوو بە كورتی هەردوو لایەنی ئەو شەڕە نەگریسە باس كەم. سەری رێز و نەوازش دادەنوێنم بۆ هەر دڵۆپێكی خوێنی شەهیدان، چونكە گەر ئەوان نەبان، نە ئەو سەركەوتنانە بەدەست دەهات و نە ئاوهاش بە رێزەوە دۆزەكەمان دەچووە سەر مێزی وڵاتانی گەورەی ناوچەكەو جیهان، بۆیە هەموو سەركەوتنەكانمان بۆ خوێنی گەشی شەهیدەكانمان دەگەڕێتەوە.