کۆردێن خۆراسانی ئێکە ژ بەرەبابێن ڕەسەنێن کوردان و کەڤنارەتییا وان بۆ ھزاران سالێن بەری نۆکە دزڤڕیتن، و ژێدەرێن دیرۆکی ب ھندەک نەوێرەکی و خەمساریڤە گەلەک ژ دویندەھێن کوردان یێن کۆ دەستھەلات بدەست وانڤە بوویە د سەردەمێن جۆداجۆدایێن دیرۆکی دا بۆ وان دزڤڕینن. ھەتاکۆ دھێتە گۆتن ئیمپراتۆریەتا ساسانی، یاکۆ نێزیکی چارسەد سالان دەستھەلاتا وەلاتێن ئاریایی و دەڤەرێ دگێڕا ب ڕەچەلەک کوردێن خۆراسانێنە، و ژ ناڤدارێن دیتر ژی ئەبوو مۆسلمێ خۆراسانییە، کە ب ژناڤبرنا خەلافەتا ئەمەوییان دەرگەە بۆ خەلافەتا ئالێ عەباس و عەباسییان ڤەکر، لێ عەباسییان پشتی وێ قەنجییا مەزن وەکی گەلەک کەس و جارێن دیتر نمەک حەرامی کر و مەنسوور خەلیفێ وی سەردەمی ئەو بشێوەیەکێ دڕندانە و ژ پشتڤە و ب خەنجەران پارچەپارچە کر. ھەرچەندە کورد ل وێرێ کەڤنن، لێ د سەردەمێن جۆدایێن دیرۆکی و پشتی ھنگی گەلەک کورد یێن ژلایەنێ دەستھەلاتا پاشایەتی بۆ وان جھان ھاتینە ڤەگۆھاستن و دبیتن ئێک ژ وان گەڕان کوردێن دەڤەرا بەھدینان و بۆتان بن کە لسەردەمێ سەفەوییان ھاتینە کۆچپێکرن بۆ خۆراسان. دبیتن مەبەستا سەرەکی ژ وێ چەندێ خۆ قۆرتالکرن ژ شۆڕەش و ڕاپەڕینێن وان بن چونکی ھۆزێن شەڕکەر و مێرخاس بووینە و زۆلم ژ کەسێ قەبیل نەکریی و ژ لایەک دیترڤە ئەو وەکی مەتال بۆ بەرسینگێ تۆرانیێن کۆ بەردەوام ھێڕشی وەلاتێن ئیرانێ دکرینە ب باشترین بگھۆڕ ھاتینە زانین.
ل ( ٣/١١/٢٠١٦) ل کەنالێ ئەسمانیێ ڕووداو و لدەمژمێر (٦)ی ئێڤاری دناڤ نووچەیێن کوردستانا ڕۆژھەلاتدا ئاماژە ب کەسەکی بناڤێ ( کەریم اللە توکلی ) ھاتەدان، کە وەک کوردەکێ ڕەسەن و خەمخۆر ب سەدان چالاکی و بەرھەمێن کوردەواری کەلتوورێ زەنگین و جوانێ کوردیێ ل دەڤەرێ یێ پاراستی. ناڤبری چەندەھا پەرتووکێن دەربارەی کوردان و دیرۆکا وان و لسەر خەرجییا خۆ چاپ و بەلاڤکرین. ئەوی ب دەھان سالان ژیانا خۆ بۆڤێ چەندێ و مەبەستی َتەرخان کرییە. د تەلەفزیۆنێ دا من بچاڤێن خۆ ھەمی (باغێ کوردا) بەرھەمێ نالبەندێ ۆھزانڤانێ دەڤەرا مە د تاقچکا وی دا دیتن. وی ئاماژە ب ھندێ دایە کە ب چەندەھا سالان دناڤ گۆند و کوینێن دەڤەرێ و لناڤ خەلکێ و پیرەژن و پیرەمێرێن کۆ نە زمانێ تۆرکمانی و نە یێ فارسی نزانن و تنێ ب کوردییا کۆرمانجی دئاخڤن، گەڕیایە دا بشێتن فەرھەنگەکا زمانێ کوردێن خۆراسان بنڤێسیتن. وی دگۆت ئەڤ مرۆڤە باشترین ژێدەرن بۆ دەیناندنا ڤێ فەرھەنگا چەند بەرگی بشێوەکێ زەلال و دروست. دیارە ئەڤە ھەمان ئەو ھزرە ئەوا خۆدێ ژێ رازی مەلا مەحموودێ دێرشەوی د پەرتووکا خۆ " مشتاخا چیا ژ گۆتنێن پێشیا" و ژ میرێ بۆتان " جەلادەتێ بەدرخان بەگی" ڤەدگێڕیتن. دیارە ل وێ پارچا کوردستانێ ژی کەسەک یێ ھەی دڤێتن ھیڤیا ڤان نەمران و گەلەک کورددۆست و کۆرمانجان و باب و باپیرێن مە بجە بینیتن، لێ وەکی وی بخۆ دگۆت ژبەر نەبوونا شیانێن پارەی ئەڤ کارە یێ مایە نیڤەبەرۆ، ھەرچەندە وی ئەوێن پێشکشی کوردستانیان و پێشمەرگەی کرین. چەوا کەسەک یان حکومەتا کوردستانێ ڤێ خەونا مەزن بجە نائینیتن و خۆ ل وی ناکەتە خۆدان و ب ئینانا قەچاغی یا بەرھەمێن وی وان ژ ژناڤچۆنێ ناپارێزیتن، نەخاسمە حکومەتا ئیرانێ ڤێ گاڤێ وەکی مارگەستیەکی و ژ کەربێن سەرکەفتنێن کوردان دبیتن نەشێتن دەستێ خۆ بگەھینیتە کوردستانێ بەلێ دشێتن تۆلا خۆ ل کەریمۆلای و بەرھەمێن وی ڤەکەتن. بۆچی ل کوردستانێ ھندەک خۆ ب خەمخۆرێ کوردستانێ و زمانێ کۆرمانجی و ھۆزان و ئەدەبیاتا کوردی دزانن و دۆھی نان نەبی بخۆتن، نۆکە دێ شێتن بۆ کۆڕێ خۆ یێ ساڤا ترۆمبێلەکا فوول مۆدێل بکڕن و بەلێ نەشێتن چەند پەرتووکا بۆ خزمەتا وی زمانی چاپ و بەلا بکەتن؟ پا ئەڤە چ کوردپەروەرییە؟ پارێ ڤی وەلاتی بۆ خزمەتا ڤی نەتەوەیە نەک بۆ زارۆکەکی بتنێ. پا کەنگی ئەڤ تۆخمە مرۆڤە دێ ڤێ دیارییا بۆ کوردستانیان و پێشمەرگەی ھاتیە پێشکشکرن گەھینیتە وان؟ ھەکەر بەڕێز تەوەحۆدی مر و دوژمنان دەستنڤیسێن وی دزین و ڤەشارتن و سۆتن؟؟!! تو خۆدێ نەمخابنی پارێ وان وەکی یێ سەدامێ گۆڕ بگۆڕ و ژ کیستێ خەلکێ کۆم ببیتن و پاشی وەکی یێ وی لبن ئاخێ و ل جھێن ڤەشارتی و ل بەنکێن ئەورۆپی بمینن و بەرزە ببن و یان سۆبەھی بچویکێن وان نەدلسۆز و نەکوردپەروەرێن درەوین بڤی پارەی بسەر دا بچن و ببنە فەلیتە و یارییا ب کوردستانیان و کۆڕێن شەھیدان بکەن، ئەوا ھوین ئەڤرۆ ب بابێن وان دکەن، و سامانێ کەلتووری و فەرھەنگیێ مە ھۆسا لبەر پێیان بچیتن و زانایێن مە ژ بەر پارەی نەشێن چاپ و بەلاڤ بکەن و خزمەتا کوردستانێ بکەن؟ بخۆدێ شەرمە و ھەتکبەرییە و زۆردارییە و ژ زۆردارییا بەعسێ کێمتر نینە! *بسپۆرێ زانستێن پێداگۆگی و پەروەردەیی/فاکۆلتییا پەروەردە/ زانینگەھا زاخۆ