ئەگەر باسی مێژووی شاری سلێمانی بكەین كە شارێكی باشووری كوردستانە، ئەوا لەو ساتەوە كە كوردستان دابەش كراوە، تا ڕاپەڕینە مەزنەكەی گەلی كورد ئەم شارە بەردەوام لانكەی شوڕش بووە و خەڵكی ئەم شارە سەری بڵندیان بۆ هیچ دەسەڵاتێك دانەنواندووە و هیچ كاتێك و هیچ دەسەڵاتێك نەیتوانیوە ئیرادەی خۆی زاڵ بكات بەسەر خەڵكی ئەم شارەدا، تەنانەت جێگە بەنچەی لەسەر هەموو شۆڕش و راپەڕینەكانی گەلی كوردستان دیار بووە، هەمیشە شاری رۆشنبیران و شۆڕشگێڕان و دڵسۆزانی سەربەخویی كوردستان و سەروەريی گەلی كورد بووە و بە سەدان و هەزاران كەس خوێنی پیرۆزیان كردە قوربانی سەروەریی خاكەكەیان و هەموو هەوڵێكی ئەم شارە بۆ گەیشتن بە دەسەڵاتێك بووە كە كورد سەرۆك و حاكم و دەسەڵاتداربێت، نەك عەرەبێكی دوژمنی بەناحەق سەپێندراو بەسەر گەلێكی ستەملێكراودا، هەروەها لاپەڕەكانی مێژوو پڕیەتی لە داستان و چیرۆكی ئەو كەسایەتی و سەركردە و پیاوە ماقووڵانەی شار كە رۆڵیان لە بەرزڕاگرتنی كەرامەت و شكۆی گەلی كورددا هەبووە. لە پاش راپەڕینە مەزنەكەی گەلی كورد خەونە گەورەكەی ئەم گەلە هاتەدی كە كورد سەرۆك و حاكم بێت و دەسەڵاتەكەش كوردبێت، بەڵام ساڵانێكە هەندێك لایەن لەدایك بوون كە ئامانجی سەرەكییان گەیشتن بە دەسەڵاتە، ئیتر بە هەر ئامراز و شێوەیەك بێت و ئەوەی كورد و كوردستان پێی گەیشتووە، ئەمڕۆ دەیانەوێت لە پێناوی بەرژەوەندی خۆیان هەمووی لە بەرد بدەن و تا گەیشتن بەم رۆژەی كە دەیانەوێ شاری سلێمانی دابەش بكرێت و پاش رێككەوتنێكی بەپەلە لەگەڵ لایەنی دەسەڵاتی ئیداری سلێمانی، دەیانەوێ ئەو پارێزگایەی كوردستان بەرەو ئایندەیەكی نادیار ببەن!

هەوڵدان بۆ دوورخستنەوەی سلێمانی و خەڵكەكەی لە سەربەخۆیی و لە سەروەریی خوێنی شەهیدان و خاكی كوردستان، نموونەی بەرچاویان زۆرە، لەوانە رۆژێك پێشوازی لە كۆنە سەرۆك وەزیرانێك دەكرێت كە مووچە و بودجەی خەڵكی كوردستانی بڕیوە و لە سەردەمی حوكمڕانیی ئەودا هێزەكانی دیجلە-یان هێنایە سەر كوردستان و تۆپە دوورەهاوێژەكانی ئاراستەی شاری خۆشەویستی هەولێر كرد.

ئەوەی لە شاری سلێمانی روو دەدات ئەمڕۆ بۆ سلێمانی زۆر قورسە و خەڵكی ئەم شارە نابنە مقاشی ئەم خەڵووزە گەورە و رەشە و جێگای قبووڵیان نابێت كە شارەكە لە پێش چاوی سلێمانییەكانەوە دابەش بكرێت.
بە بێ هیچ بنەما و یاسایەك خەڵكی رەسەنی ئەم شارە زیندانی كران، لە سێدارە دران و سووكایەتییان پێكرا. ئێستا كەسانێك كە لەدایكبووی ئەم شارەش نین، بەڵام بوونەتە دەم سپی و دابەشكاری شارەكە! ئەوەی جێی نیگەرانییە ئەوەیە كە ئەم بارودۆخەی ئەمڕۆ سلێمانی پێیدا تێدەپەڕێ، نە جێی رەزامەندی زیندووەكانە و نە پاداشتیشە بۆ شەهیدان و كەسوكاریان. ئەوەی ئەمڕۆ شاری شۆڕشگێڕان و ڕۆشنبیران بە خۆیەوە دەیبینێ، مێژوویەكی تاڵ لە سبەی و ئەمڕۆیەكی ناشیرین تۆمار دەكات.
كاتی ئەوە نەماوە رەنگی كام لایەن جوانترە. كاتی ئەوەیە كێ دڵسۆزترە بۆ كوردستانەكەمان. ئەمڕۆ زۆر روون و ئاشكرایە كە كێ بۆ كوردستان و سەربەخۆیی و یەكڕیزیی نێوماڵی كورد هەوڵدەدات. پارتی دیموكراتی كوردستان هەمیشە ئامانجی سەربەخۆیی كوردستان و یەكڕیزی لە خاڵە یەكەمەكانی پەیڕەو و پڕۆگرامی بووە، هەر بۆ بەدیهاتنی ئەو ئامانجەشی هەموو قوربانییەكی داوە.