مەلا بەختیار لێپرسراوی دەستەی كارگێڕیی مەكتەبی سیاسیی یەكێتی لە سیمینارێكدا دەربارەی دامەزراندنی دەوڵەتی كوردستان و پشتیوانییە ئیقلیمی و نێودەوڵەتییەكان دەڵێت"تائێستا نە رێككەوتنامەیەك هەیە، نە بەڵگەنامەیەك، نە بڕیارێك هەیە لەلایەن ئەمریكا و روسیاو هەر دەوڵەتێكی تر بۆ دامەزراندنی دەوڵەتێكی كوردیی سەربەخۆ، 28 دەوڵەتی دیكەی رۆژئاوا، واژۆی بەڵگەنامەیەكیان كردووە و رادەستی هەردوو حزب (یەكێتی و پارتی)یان كردووە و دوپاتیانكردۆتەوە كە ئەوان لەگەڵ یەكێتی خاكی عێراقدان و لەگەڵ دامەزراندنی دەوڵەتی كوردستاندا نین"، جارێ ئەو قسەییەی کاک مەلا بەختیار بەموتڵەقی وانییە و دوورە لەڕاستییەوە، ئەوەی مەلابەختیار باسی کردووە هیچ سەرچاوەیەکی دیاری نییە و ئیتر نازانرێ ئەو قسانەشی بۆچی مەبەستێک کردووە، ئەگەر مەلا بەختیار هێندە ئاگادارەو بەووردی ئاگای لەو بەڵگەنامەییە هەیە کە ڕادەستی هەردوو حزب کراوە خۆی لێپرسراوی دەستەی كارگێڕیی یەک لەو دوو حزبەیە با ئەو بەڵگەنامەیە پەخش بکات و بیخاتە ڕوو.

مەلا بەختیار لەمن باشتر دەزانێت لەعورفی هیچ دەوڵەتێک نییە ڕاست و ڕەوان بە میللەتان بڵێت نا، بەپێی یاسا نێودەوڵەتیەکانیش هەموو ئەو وڵاتانەی کاکە مەلا باسیان دەکات دەبێت بلێن لەگەڵ یەکپارچەیی خاکی عێراقین، بەڵام بەشێوەیەکی ڕاستەوڕاست چ ئەمریکا و چ ڕوسیا و چ ئەو 28 دەوڵەتەی ڕۆژئاوا ناتوانن بەڵگەنامەیەک واژۆبکەن و بە(پارتی و یەکێتی)بڵێن لەگەڵتان نین بۆ سەربەخۆیی کوردستان، کاکە مەلا کەسێکی سیاسیەو لەوەش حاڵییە ئەوان ئەو کارە ناکەن، خۆ ئەگەر بیشیکەن زۆر بەئاشکرا وادەڵێن و شەرم لەکەس ناکەن، نەک لە نامەیەکی نهێنی کە تەنها کەسانی وەک مەلابەختیار ئاگاداری بێت.

بەهەق جێی سەرسوڕمانییە مەلا بەختیار بەو ڕەهاییە بابەتێکی وەهایی وروژاندووە، هەربۆیەش پرسیار لێرەدا ئەوەیە دەبێ چ مەبەستێکی سیاسی لەپشت ئەو قسانەی مەلا بەختیار بێت، بۆچی دەبێت لەوکات و ساتەدا کارگێڕی مەکتەبی سیاسی یەکێتی بۆ ژمارەیك ئەكادیمی و نوسەر و روناكبیر و مامۆستای زانكۆ و پسپۆڕانی سیاسی و سەربازیی و رۆژنامەنووس و نوسەر و رەخنەگرانى میسری قسەیەکی وەها بکات، دەپرسین کێ لەوقسەیەدا کە تەواو ناڕاستە سودمەندە، ئەوە دەبێ مەلا بەختیار وەڵام بداتەوە.