بۆقۆناغی دوای ئازادکردنی موسڵ و دەرکردنی داعش پلانی جیاوز هەیە چ لەسەر ئاستی ناوچەکە و چ لەسەر ئاستی جیهانی، ڕوسیا و تورکیاو ئێران لەلایەک و سوننەو شیعە لەلایەکی ترەوە، ئەمریکا و ولاتانی هاوپەیمانیش لەلایەکی تر هەریەک پلانێکیان هەیە، کورد لەم نێوەندەدا بە عەقڵانیەتێکی زۆرەوە چۆتە نێو پرۆسەکەوە، لەمانگی حەوتی ئەمساڵدا بەپرۆتۆکوڵێکی فەرمییەوە کە زامنی سەقامگیری ناوچەکە و ئایندەی ئاسایشی موسڵ دیاری دەکات بەشدارە لەئازادکردنەوەی موسڵ، ئێستاش کورد گفتوگۆ و پەیوەندییەکانی بۆ ئەو پرسە بەردەوامە بەجۆرێک دوای ئازادکردنی موسڵ و دەرکردنی داعش مافى بڕیار و ئیدارەدانی ناوچەکە مسۆگەر بکرێت، بەشێوەیک کە هەموو پێکهاتەکانی موسڵ بەتایبەت مەسیحی و ئێزیدییەکان تووشی هەمان کاراساتی ڕابردوو نەبنەوە، ئەوەش دیدگاییەکی نوێ لەڕوانگەی سەرۆکایەتی هەرێمی کوردستان دیاری دەکات، بەوەی لەگەل شیعە بەسەفەقات پرسی ناوچە جێ ناکۆکەکان یەکلا نابێتەوە، هەروەها لەپەیوەندیشدا لەگەڵ سوننەکانیش ئەو پرسە یەکلا نابێتەوە، بەڵکو بە پەیوەندی ڕاستەوخۆ لەگەڵ خەڵکی ناوچەکە و دروستکردنی متمانە لەنێوان هەرێمی کوردستان و هەموو پێکهاتەکانی ناوچەکە بەتایبەتی پێکهاتەی پارێزگای نینەوا ئایندەی ناوچەکە دیاری دەکات. ئەویش بەوەی شنگال بکرێت بە پاریزگایەک و دەشتی نەینەواش بەهەموو پێکهاتەکانییەوە بە مەسیحی و شەبەک و کاکەیی و ئێزیدییەکانیش لەناوچەکە ببێتە پارێزگایەک و دواتر خۆیان بریار بدەن سەر بە هەرێمی کوردستان بن یا لایەکی تر.

لەئێستادا کەخەریکە پرۆسەی ئازادکردنەوەی موسڵ دەست پێبکات، هەست بەوە دەکرێت، بەهۆی ئەو هەموو پلانەی لەناوچەکە بۆ دوای ئازادکردنی موسڵ داڕێژراوە هەمووانی لەبەرامبەر پرسیارێکدا وەستاندووە ئاخۆ دوای موسڵ و دەرکردنی داعش چی؟ چونکە گریمانێکی زۆر هەیە ئەگەرەکان بەئاڕاستەیەکی تردا بچن لەناوچەکەدا، وەک ئەوەیە هەریەک بەجۆرێک شوێن دەستی خۆی بکاتەوە، ڕوسیا و تورکیا و ئێران کە ئێستاکە سوریاش هاتۆتە ناو هاوکێشەکەوە لەگفتوگۆدان چۆن بتوانن شوێنیان هەبێت لە عێراقی دوای داعش، ئەوە سەرباری ئەوەی لەنێوخۆی عێراقیشدا بەشێكی زۆر لە سەركردە سوننەكان دەیانەوێت بەهاوکاری کورد موسڵ بگرنەوە، بەلام بۆ قۆناغی دوای داعش و ئازادكردنی مووسڵ پلانی پڕۆژەی بەهەرێمكردنی نەینەوایان داناوە، كە بە پێی ناوەڕۆكی پڕۆژەكە بەشێکی زۆر لەخاکی ناوچە کوردستانییەکانی دەروەی ئیدارەی هەرێم دەكەوێتە سنووری ئەم هەرێمە، ئێران بەبیانووی پاراستنی شیعەکانی نینەوا کە بەشێکیان لە دەشتی نەینەوان و ئەوەی تریان لە تلعفەر و شنگالدان دەیەوێت حەشدی شەعبی بێنێ لە موسڵ جێگیری بکات، بەڵام مەبەستی ئێران لەوەدا گرێدانی دیالەیە بە شنگال و تەواوکردنی هیلالی شیعیە کە لەڕووی جوگرافى و مەزهەبییەوە لکاندنی ئێرانە بە سوریا و لوبنان، تورکیا بەپێی ڕاهێنان و پشتگیرکردنی حەشدی نیشتیمانی کە لەعەرەبی سوننە پێکهاتووە، هەروەها ئاماژەدان بە ئایندەی تورکمان لە تلعفەر و لەنێو شاری موسڵ جگە لە پێگەی ستراتیژی نینەوا بۆ داهاتووی ئابووری تورکیا وای کردووە تورکیا بیدەنگ نەبێت و پلانی هەبێت بۆ دوای ئازادکردنی موسڵ.

بەکورتی کورد پلانی خۆی هەیە بۆ دوای گرتنەوەی موسڵ و دەرکردنی داعش، لەشەڕی موسڵ کە پرۆسەیەکی ئاڵۆزە و چەندین پلان و ستراتیژیەتی جیاواز یەکتر دەبڕن هەرێمی کوردستان وستیویەتی جۆرێک لە هاوبەشی دروست بکات لەنیوان بۆچوونە جیاوازەکان، باشترین پلان کە ئامانجی سەرکی بەدست دەهێنێت بۆ کورد، یەکەمیان سنوری میژووی کوردستان لە نێوان ئەو هەموو پلانە جیاوازەدا ببپارێزرێت، دووەم ئاسایش و سەقامگیری ناوچەکە لەدوای داعش کە کاریگەری ڕاستەوخۆی هەیە لەسەر هەرێمی کوردستان بەرقەراربێت.