جێگەی داخە كە لە كاتێكی چارەنووسسازی وەها ژمارەیەك لە میدیاكاران و نووسەران لە جیاتی گرنگیدان بە پرسە نەتەوەییەكان و پشتگیری دۆزە نەتەوەییەكەیان و لە جیاتی بیركردنەوەی كوردانەیان ، خۆیان بە بەرژوەندی حزبی و شەخسی بەستۆتەوە و پشتیان لە میللەتەكەیان كردووە .پێویستە گشت گشت قەڵەمە دڵسۆز و نیشتمانپەروەران رووبەڕووی گشت ئەو هەوڵە تێكدان و چەواشەكاری بدەنەوە، هەروەها قەڵەمە پاكەكانیش دەبێ ئەركی دیكەیان هەبێت هاوتای دەزگاكانی راگەیاندن ئەویش بە رێگەگرتن لە هەوڵەكانی بڵاوكردنەوەی ئاشووب و پڕوپاگەندە و راوبۆچوونی نەرێنیی نەخۆش، كە مەبەستی لەباربردنی یەكێتیی نیشتمان و ئاسایش و سەقامگیرییەكەیەتی، هەروەها مەبەستی دۆزینەوەی زەمینەیەكە بۆ شەڕی ناوخۆ و دابەشبوون.
هەموو هاووڵاتیان داوایان لێكراوە كە بەرامبەر رووداوەكان هۆشیار بن و دەركی پێ بكەن، هەروەها هەموو كەسایەتییە چالاكەكان و حزبە كوردستانییەكان كە هەوڵ بدەن بەر بە كاریگەریی ئەو دەنگانە بگرن و كۆتایی بە هەوڵەكانیان بێنن، ئەویش بە ریسواكردنیان لە رێی گشت كەناڵەكانی راگەیاندنەوە و وریابوون بەرامبەر ئەو شوێنانەی كە رەنگە هێزە دوژمنكارەكان بیقۆزنەوە.
ئەم ئاگادارییە لە كاتێكدایە كە بڕوایەكی تەواو بە هۆشیاریی میللی هەیە بەوەی كە روودەدات، هەروەها بە دەرك پێكردنی كوردستانیان بەرەو رێگەی سەركەوتن و وەدیهێنانی ئامانجەكانیان و تێكشكاندنی هەموو ئەوانەی دەخزێنە نێو كاروانەكەوە. لێرەشدا بە دیاریكراوی میدیاكان رۆڵی كارایان هەیە و پێویستیشە بە هەموو لایك بایەخی پێ بدرێت، هەروەها لە سەركردایەتییەكانی كۆمەڵگەش بەو ناوەی كە میدیا بەرەیەكی گەرمتر و مەترسیدارترە دوای بەرەكانی جەنگ بگرە هاوشێوەیەتی، پێویستە دوو ئەوەندە وریا بین لە ئەولەوییەت و مەترسییەكەی كە پێویست دەكات لەم رووەوە بۆ بەرگریكردن لە سەلامەتی و راستی و دروستیی بڕیارەكە بایەخی زیاتری پێ بدرێت.
گۆڕانكارییەكانی رۆژهەڵاتی ناوەڕاست ودواتر سوریا وعێراق و هەرێمی كوردستان بە تایبەتی ژمارەیەك میدیایی نابەپرس و لە ژێر ناوی ئەو ئازادی و سەقامگیرییەی كە بە سایەی قوربانیدان و ماندووبوونی هێزەكانی پێشمەرگە ، دەزگە ئەمنییەكان هاتۆتە بەرهەم جێی هەڵوەستەیە بۆ ئەو میدیایانە لە جیاتی ئەوەی خۆیان بە بێ لایەن و ئازاد دەزانن لە ناوەرۆكیشدا وا نین و كار لە سەر چەواشەكاری و جوڵاندنی خەڵك بە هەواڵ و بابەتی بێ بنەما كردووە و ئەمە لە لایەكی دیكەوە لە كاتی جەنگ و بەرگریكردن لە خاكی پیرۆزی كوردستاندا ،ئەو میدیایانە لە جیاتی هەوڵدانی بۆ زیاتر وروژاندنی پرسە نیشتیمانیی و نەتەوەییەكان و ئارامكردنی ناخی خەڵك پشتیوانێكی ناراستەوخۆیی دوژمنان و نەیارانی كورد و ئەزموونی كوردستان بوونەوە وەك ئەوەی لە كاتی ئاژاوەگێڕییەكان بینیمان و ئەوەی كاتی شەڕی تاریكپەرستانی داعش رۆڵێكی نەرێنییان بینی .
ئەوەی رووی دا و ئێستا روودەدات، بریتییە لەوەی كە هەندێ لایەنی نەرێنی لە بزووتنەوە و حزبە سیاسییەكاندا بە ئەنقەست لێدوانی كوشندە دەدەن و دەرفەتی بەدواداچوونی دەمەقاڵییەكی ناتەندروست بە چەند لایەنێكی گومانلێكراوی میدیا دەدەن كە هیچ بەرژەوەندییەكی گەلی كوردستان و سەقامگیری ئەو وڵاتەی تێدا نییە. كوردستان كە چەندین شەڕ و شۆڕشی كردووە لە پێناو گەیشتن بە ئازادی و تا ئەو دەستكەوتە گرنگەی ئەمڕۆ، ناكرێ ئەو هەموو دەستكەوتانە لەدەست بدات، بەهۆی ئەو فشارانەی ئەو لایەنە ناتەندروستانە ئەنجامی دەدەن.
ئەمڕۆ كوردستان شەڕێكی دیكە لە جۆرێكی تازە دەكات، شەڕی ئەمڕۆ لەوەدایە كە مەترسیدارترینەكەیان داگیركاری یاخود كودەتایەكی سەرتاسەری دەسەپێنێ. شەڕێكە ئەگەر مەرامەكانی هێنایەدی، دەبێتە جینۆساید و كاولكاری كوردستان و بەهیلاكدانی گەلەكەی لێدەكەوێتەوە. لەبەر ئەوەی شەڕی هێز و قەلەڕەشە و مێگەلەكانی تیرۆرە، ئەوانە بۆ ئەوە كۆدەبنەوە كە دزە بكەن، دواتر سەوز بە نرخی وشك بسووتێنن! ئەمەش بە ئاماژە بۆ بوونی تیرۆریستانی داعش لەسەر سنووری كوردستان جگە لە پشتبەستنیان بە شانەی نووستوو و ئەسپی تڕوادە كە خۆی لە میدیای تێكدەرانەی سیاسیدا دەبینێتەوە كە لێرەدا ئاماژەی پێ دەكەین.
لایەنە سیاسییەكان كە ئەم رۆڵە دەگێڕن لە رێی دەروازە و زوڕنای جیاجیای میدیایی دیاریكراون، بەڵام كێشەكە لە قەبارەی شێوازی میدیا و رۆڵەكەیدایە لە قەبەكردنی دەنگ و ئەو ژەهرەی هەڵیدەڕێژێت. كە ئەمەیان لە ناپاكییانە، بە شێوەیەك كە رۆژنامەی كاغەزی و ئەنتەرنێتی و بەرنامە لە كەناڵە ئاسمانییەكان دادەهێنن و ئەركەكان لەنێو خۆیاندا دابەش دەكەن بە رێگەیەكی حیساب بۆكراو و نەخشەكراو بە مەبەستی زۆركردنی رێگەكان، یان سەرلێشێواندنی هاووڵاتیان بەو گوتارە ناتەندروستە.
ئەمە لایەنێكە بۆ بڵاوكردنەوەی ئەم پڕۆپاگەندە و ئەوی دی بۆ قسەكردن لەسەر دیموكراسییەت و پابەندبوون پێوەی و سێیەمیش بۆ دیاریكردنی كاتی تایبەت بە وادەكانی هەڵبژاردن و چوارەمیشیان بۆ هەڵبەستن. بەم شێوەیە هەوڵدەدات، دەرئەنجام و بەكۆی ئەوەی بۆ هاووڵاتی دەینێرێت، گوتارێكی سیاسی بۆ رەوانە دەكات كە زەمینەیەك دەخوڵقێنێت تا لە مەرامەكانی خۆی نزیك بێتەوە. كێشەكە ئەوەیە كە ئەو مەرامانە ئەوەندە تەسك و دیاریكراون لە جەوهەردا كە بە ئەرێنی ناشكێنەوە. چونكە ئەوانە مەرامگەلێكی تایبەتی ئەو لایەنانەن و چەندین شتی ناتەندروستی دیكەشیان لەپشتە.پێوستە لە ئێستادا ئەو میدیا و نووسەرانە بە واقعبینانە بڕوانە دۆزی رەوای میللەتەكەیان و واز لە حزبایەتی تەسك و بەرژوەندی تایبەتی بهێنن و هەموومان بەیەك ئاڕاستە بەرەو ئامانجە گەورەكە هەنگاو بنێنین.