دمێشکێ تاکێ کوردستانی دا نەخشە وپلان وھیڤی وئومێد وخەون ھەبون،تاکێ کوردستانی خەون ب وولاتەکێ سەربەخۆ وئارام ولاتەکێ ئاسایشا تاکی تێدا یا بێ سنور بیت وولاتەکێ ئارامیا دەرونی تێدا ھەبیت وولاتەکێ پێشکەفتی ولاتەکێ یاسا تێدا سەروەر بیت ولاتەکێ پێکڤە ژیان تێدا پلە ئێک بیت وولاتەکێ ھەر کەس بزانیت ئەرک ومافێن وی چنە وچ ل سەر مللێن وییە وەکو تاک ئەنجام بدەت بۆ وولاتی وحکومەتا خۆە، وچ ژحکومەت ودەست ھەلاتێ دخوازیت ودڤێت، وبرەنگەکێ دیتر بێژین، ئەرک ومافێن ھەڤولاتی بەرامبەر وولاتێ وی ,وئەرک ومافێن وولاتێ وی بەرامبەر وی چنە؟؟،ئەڤە ھەمی خەون بون تاکێ کوردستانی ب وولاتێ خۆەڤە دیتن، واتە ئومێد ئەو بوو کوردستان ببیتە بەھشتا سەر زەمین وەکو چاوان جاران وتا نوکە بەحسێ بەھشتا عەدەن(جنە عدن) دھێتە کرن،وەسا بەحسێ کوردستانێ ژی ھاتبایە کرن.لێ موخابن ئەو خەون ھەمی بۆنە خەون رۆژک, چونکە رۆژ ب رۆژ کاودانێن کوردستانێ بەرەڤ خرابیێ دچن. ئەگەر ڤەکولینەک ل سەر ئەرکێن ھەڤولاتی بەرامبەر وولاتێ ودەست ھەلاتا وولاتێ وی ب ھێتە کرن،دێ دیار بیت ھەر تشتەک ھەڤولاتیێ کوردستانێ ب باشی ئەنجام دایە وئەرکێن ھەڤولاتیی بونێ بەرامبەر وولاتێ خۆە ھەمی ل سەر مللێن خۆە راکریە، چ وەکو خزمەتێن سفیل،ئیداری،لەشکەری,پێگیری ب یاسایێ وفەرمانێن حکومەتێ گیان بەخشین، بەرەڤانی کرن، بێھن فرەھەیی، راگرتنا ئارامیێ..ھتد. ئەڤە ھەمی ئەرکێن ھەڤولاتیینە بەرامبەر حکومەت ودەست ھەلاتا وی کو پێدڤیە ئەنجام بدەت. دلایەکێ دیدا ئەرکێن حکومەتێ بەرامبەر ھەڤولاتی دڤێت وولاتەکێ بۆ ھەڤولاتیێن خۆ دامەزرینیت وبەرەڤانیێ ژمافێن ھەڤولاتیبونا وان بکەت یاسایا بۆ دانیت ودارێژیت ودام ودەزگەھێن سفیل وئیداری ولەشکەری برێڤە ببەت ودیسان پێدڤیێن ژیانێ یێن زانستی وساخلەمیێ وەکو خواندنگەە ونەخوشخانە..ھتد. بۆ دابین بکەت ھەر وەسان دەست ھەلاتا جە ب جە کرنێ ویاسا دانانێ ودادگەھان دابمەزرینیت وکارا بکەت وبرێڤە ببەت ودخزمەت ھاولاتیاندا بیت،ئەڤە ئەرکێن حکومەتێ نە بەرامبەر ھەڤولاتیێن خۆە، ل دەست پێکێ تا رادەکێ حکومەتا ھەرێما کوردستانێ ب باشی کارێ خۆە ئەنجام ددا, ھەر چەندە ھندەک کێم وکاسی ژی ھەبون، لێ ٧٥% خەلکێ کوردستانێ ژێ درازی بون.لێ یا سەیر ئەوە ل شوینا حکومەت بەرەڤ پێش بچیت وبەرنامێت پاشەرۆژێ دارێژیت ژبۆ خۆش گوزەرانییا ژیانا خەلکێ،حکومەت بەرەڤ پاش دچیت،ئە ڤە ژی ژبێ بەرنامەیا حکومەتێ ودەست ھەلاتێ یە،چونکە ل شوینا کێشە وئاریشێن خەلکێ کێم ببن،بەرەڤ زێدەبونێ دچن, وئەو دەست کەفتیێن ب دەست ڤە ھاتین ھێدی ھێدی یێن ژ دەست دچن، ھوکار ھەر حکومەت وپارت ولایەنێن سیاسیە ل کوردستانێ،چونکە پارتێن کوردستانی، چ ل ھول وکولانکێن پەرلەمانی یان حکومەت ب ھەمی بەشێن وێ ڤە یێن کرینە،جھێ (موزایدێن) سیاسی ول شوینا خزمەتا ھەڤولاتێن کوردستانێ بکەن وئەو سوز وپەیمانێن داینە خەلکێ کوردستانێ بجە بینن،یێن دەست ھەلاتا پارتایەتی و ب دەستڤەئینانا دەستکەفتان بۆ پارتێن خۆە دکەن،وولات وھەڤولاتی یێ ئێخستیە د گێژەلوکەکێدا ویا بزەحمەتە ژێ دەرکەڤن، ھەڤولاتی چ نەمایە بۆ حکومەتێ ودەست ھەلاتێ وپارت ولایەنێن سیاسی پێشکێش نەکری وچ نەمایە بۆ نەکری.ململانا پارتایەتی ئەڤرۆکە ھەتا سەر ھەستی ھەڤولاتیێ کوردستانی بریندار کریە،ئەڤ ململانە یا بویە تشتەکێ نەفرەت کری ژلایێ ھەڤولاتیێ کوردستانی ڤە,ئەز باوەرم ئەگەر ل جیھانێ ھەمیێ ململانە وبرێڤەبرنا ولاتی ودەست ھەلاتێ ب ڤی رەنگی بایە نوکە نە چ وولات و نەچ دەست ھەلات ھەبانە،بەلکو وولاتێن جیھانێ دابنە وولاتێن دارستانێ و یاسا دارستانێ دا ل سەر ھێتە جە بجە کرن. کوردستان یا ل سەر پێلێن دەریایێ وھا ڤێ گاڤێ گاڤەکا دیتر دێ نقوم بیت چ ژئەگەرێ مەترسیێن شەرێ داعش وسیاسەتا وولاتێن ھەڤسو کو دھێتە تێبینی کرن بەرنامێ داعشێ ژی پارچەک ژبەرنامێ وان بویە ودبیت ھێژ وان ولاتان پلان ونەخشە وبەرنامێن بەرزە ونەھێنی ھەبن ونە ئاشکرا کری بن،کو دپاشەرۆژێدا روی ب روی کوردستانێ بکەن ئەڤە ژلایەکی ڤە و ژ لایەکێ دیتر ڤە نێزیکە ئەم ب خۆە ب دەستێن خۆە دێ دەست کەفتێن خۆ ژناڤ بەین وچونکە ئەم یێن پرس گرێکا بۆ خۆە دورست دکەین وەک پرسا سەرۆکایەتییا ھەرێما کوردستانێ،کو براستی زێدەباری بارێ مە سەربارک ژی دانا سەر، وپرسا سەروکایەتیێ یا ژقالبێ وێ دەرئێخستی ویا کریە کێشەکا مەزن وکارتێکرن یا ل ھەمی بوارێن ژیانا ھەڤولاتیان کری؟،ڤێ کێشێ نەک بتنێ کارتێکرن ل ئێکرێزیا ناڤ مالا کوردستانی کریە،بەلکو ئەڤ کێشە یا بویە (کابوس) و(مرنەکا) دوبارەکری رۆژێ سەد جارا ھەڤولاتیێ کوردستانی دکوژیت ودمرینیت، ئەرێ گەلو ما مە چ پرسێن گەلەک وگەلەک مەزنتر ژپرسا سەرۆکایەتیێ نین؟،ئەرێ گەڤا داعش ل سەر کوردستانێ,تەر وھشکا پێکڤە ناسوژیت؟، ئەرێ ل دەمێ ئەڤ دەستکەفتیە ژ دەست چوو، سود ومفا بۆ کێ تێدایە؟،بێگومان بۆ دوژمنێن گەلێ کورد،وبلا ھەر پارت ولایەنەک بزانیت ھەر کەسی ولایەنێن بزاڤا ژناڤچونا ڤان دەست کەفتیا بدەت ڤێچا ل ژێر ھەر ناڤەکی بیت،دێ کەڤیتە بەر نەفرەتا دیروکێ ودیروک ژی دلوڤانیێ ب چ کەس ولایەنان نابەت, وھەڤولاتیێ کوردستانی خەبات وبەرخودان وشەھید بۆ مل ملانا سیاسی وڤێ پرسێ نەداینە، بەلکو بۆ ئازادیێ وئارامیێ وپێشکەفتن وسەربەخویا کوردستانێ یێن داین.