ده‌وڵه‌ت ویست و ده‌وڵه‌ت نه‌ویست
سووره مه‌رگه‌یی
ده‌ستكه‌وتی بێ ده‌وڵه‌تی بۆ كورد نه‌ك هه‌ر له باشوور، به‌ڵكو له سێ به‌شه‌كه‌ی تری كوردستانیش په‌ت و سێداره و ئه‌نفال و كیمیا و كومه‌ڵكوژی و كه‌وتنه به‌ر سیاسه‌تی كورد قڕان و دواجار سڕینه‌وه و نه‌هێشتنی كورد بووه وه‌ك نه‌ته‌وه، جا ئه‌گه‌ر ببینه ده‌وڵه‌ت ئه‌وا په‌ت و سێداره و ئه‌نفال و كیمیا و كۆمه‌ڵكوژی و رزگار بوون له سیاسه‌تی كورد قڕان و گره‌نتی مانه‌وه‌مان وه‌ك نه‌ته‌وه ده‌دۆڕێنین، خۆ ئه‌گه‌ر وه‌ك ئێستاش بمێنینه‌وه و نه‌ببینه ده‌وڵه‌ت، ئه‌وا جارێكیتر ئه‌و كاره‌ساتانه‌ی وه‌ك په‌ت و سێداره و ئه‌نفال و كیمیا و كۆمه‌ڵكوژی و سیاسه‌تی كورد قڕان و دواجار له‌ناوچوونمان وه‌ك نه‌ته‌وه ده‌به‌ینه‌وه.
خاڵێكیتر كه پێویسته هه‌ڵوه‌سته‌ی له‌سه‌ر بكرێ هه‌ڵوێستی به‌ره‌ی ده‌وڵه‌ت نه‌ویسته و پێویسته لێیان بپرسین: ئه‌گه‌ر ئه‌وه‌نده دژه ده‌وڵه‌ت و به سه‌ربه‌خۆیی كوردستان قه‌ڵس و ته‌نگاون، پرۆژه‌تان چییه و چی باشتر له بوونی ده‌وڵه‌ت شك ده‌به‌ن؟ ئایا گره‌نتی چییه كه مێژووی كاره‌سات و نه‌هامه‌تیه‌كانی بێ ده‌وڵه‌تی له به‌رگی تردا دووباره نابنه‌وه؟ خۆ ئه‌گه‌ر پرۆژه‌ی به‌ره‌ی ده‌وڵه‌ت نه‌ویست گه‌ڕانه‌وه بێ بۆ به‌غدا، ئه‌وه به‌غدای سیسته‌می مه‌له‌كی و مه‌لیكی هاورده‌كراو، ئه‌وه به‌غدای سیسته‌می شۆڕشی قاسم و كوده‌تای عارفه‌كان و تا كۆتایی به‌عس و كه‌وتنی سه‌ددام حوسێن، ئه‌وه به‌غدای سیسته‌می فیدراڵی و هه‌ڵبژاردنی جه‌عفه‌ری و مالیكی و عه‌بادی، ئه‌وه به‌غدای ده‌سه‌ڵاتدارێتی یه‌ك سه‌ده‌ی سوننه و شیعه به هه‌موو باره‌كاندا به‌غدا تاقی ده‌كه‌ینه‌وه، هه‌موو ئه‌وانه به هه‌موو جیاوازی و دوژمنكاری ناو خۆیان له خاڵی له‌ناوبردنی كورد كۆك و ته‌با بوون و هه‌مووشیان خۆیان له هه‌ورازی سه‌ختی له‌ناوبردنی كورد داوه، ئه‌وه‌ش پێمان ده‌ڵێ: له داهاتووشدا هه‌ر كه‌سێك به هه‌ر فكره و ئایدیایه‌ك بێته ده‌سه‌ڵات، بۆ له‌ناوبردنی كورد هه‌مان راوبۆچوونی ئه‌وانی پێش خۆی ده‌بێ، بۆیه هه‌ر حزب و لایه‌نێك به هه‌ر پاساو و بیانوویه‌ك گه‌ڕانه‌وه بۆ به‌غدا بكاته شوێن گره‌وه‌ی به ده‌وڵه‌تبوون، خه‌تا و خیانه‌تی نیشتیمانییه و جاشی عه‌یار 24و خیانه‌تكاری فوول باڵانسه.
