سەربەخۆیی مافێكی رٍەوایە و خۆ دزینەوە خیانەتە لەخوێنی شەهیدان وكوردستان

سەربەخۆیی مافێكی رٍەوایە و خۆ دزینەوە خیانەتە لەخوێنی شەهیدان وكوردستان
نەتەوەی كورد دەیان ساڵە بۆ گەیشتن بە سەربەخۆیی، خەون و ئاواتی ھەموو كوردە، ھێنانەدی ئەو خەونە پێویستە كارنامە و ئامانجی ھەموو ھێزە سیاسییەكان بێت، پێویستە گشت دەزگە راگەیاندنە لە جیاتی خۆ سەرقاڵكردن بە بابەتی لاوەكی وەك پرۆژەیەكی ستراتیژی كاری بۆ بكەن و نووسەران و رۆشنبیران پاڵپشت و ھاوكاری ئەو پڕۆژەیە بن، پێویست ناكات ترس لەنێو خەڵكی بڵاوبكرێتەوە سەبارەت بەو ئامانجە مێژوییە، پێویستیش ناكات لەبەر دژایەتیكردنی یەكتری، ئەو ھەموو خەبات و خوێنەی گەلەكەمان بەفیرۆ بدەین و بیكەینە قوربانی دەستكەوتە حزبییەكانمان.كورد وەك گەورەترین نەتەوەی بێ دەوڵەت، زۆرترین قوربانی داوە بۆ گەیشتن بەو خەونە، ھەموو ھێزە سیاسییەكان بایی خۆیان شەھید و قوربانییان داوە، كەم بنەماڵە ھەن شەھید و پێشمەرگەیان نەبێت و قوربانییان نەدابێت، كەم كەس ھەیە لە منداڵییەوە خەونێك بە ناوی سەربەخۆیی لە ناخیدا نەڕوێندرابێت، تاوانێكی گەورەیە لە خۆمان و گەلەكەمان دەكەین و خیانەتێكی مەزنیشە لە خوێنی شەھیدانمان دەیكەین، ئێستا ھەوڵی لەباربردنی ئەو خەونە بدەین، ھەرھێزێكیش خۆی بە لایەنێكەوە بلكێنێت كە دژایەتی پڕۆژەكە بكات، ستەم لە خۆی و ئاییندەی خۆی دەكات و دواجار میللەت سزای دەدات.

ریفراندۆم ئەركێكی گرینگی هەر تاكێكی كوردستانە، لەبەر ئەوەی دیاریكردنی چارەنووسی نەتەوەیەكە و دەبێت ئەو نەتەوەیە بە خواستی خۆی بڕیار لە سەر داهاتووی بدات، نەك گوێڕایەڵی دەر و جیران بێت، فەلسەفەی ریفراندۆم ئەوەیە كە تاكەكانی هەر نەتەوەیەك خۆیان چۆنیەتی سیستمی حوكمڕانی و ژیانی خۆیان دیاری بكەن، بۆیە ریفراندۆم پێمان دەڵێت كە نابێت وابەستەی وڵاتی دیكە بین و نابێت وڵاتانی دیكە داهاتوو بۆ ئێمە دیاری بكەن، لایەنێكی دیكە كە لە ریفراندۆمدا بەرجەستە دەبێت، ئەوەیە كە ئەگەر ئێمە سبەی ریفراندۆم ئەنجام بدەین بۆ ئەوە نییە دووسبەی سەربەخۆیی كوردستان رابگەیەنین، بەڵام كاریگەری ئەم پرۆسەیە ئەوەیە كە پیشانی جیهانی بدەین كە ئێمە وەك نەتەوەی كورد سەربەخۆییمان دەوێت، میللەتێكی 40 ملیۆن كەسی چیدیكە ژێردەستەیی قبووڵ ناكات و دەیەوێت سەربەخۆ بژی. بۆیە پێوستە بە هەستێكی كوردپەرەورانە بەرەو پیری ئەو پەیامە نەتەوەییەی سەرۆك بارزانی بچین بۆ بەدیهێنانی مافەرٍەواكانمان .
Top