پاشەكشە كردن لە هەڵبژاردنی سەرۆك لەناو خەڵك، بردنەوەی بۆ ناو پەرلەمان،جگە لەوەی مەرامی رووتی حزبی تێدایە، لەبەرژەوەندی پارتی وەك حزب نیە، بەڵام لەهەمان كاتیش پەیوەندی بە سنور دار كردنی سیستەمی دیموكراسیەوە و رێرەوەی دیموكراسیەوە هەیە لەكوردستاندا، كە لەژێر میزاجی تەماحی سیاسی تاو دەدرێت، گەلێك بەئاراستەی روحیەتێكی پۆپۆلیستی و شەعبەوی ئاراستە دەبێت و ئاقیبەتی ئەو گەلەی كوردستان بەرەو تاریكی و سیستەمی شموڵی هاوشێوەی ئێران دەبردرێت، چونكە خامەنەیی لەپشتی دەسەڵاتە رەمزیەكانی سیستەمی ئیران بریاری یەكڵاكردنەوە دەدات، سەرباری سەرۆك كۆمار و سەرۆك پەرلەمان و سەرۆكەكانی تری كارتۆنی حكومەتی ئێران و سیستەمی سیاسی ئێران، بەهەمان شێوە ئامادە كاری دەكرێت بۆ ئەو شێوە شكلیە سیستەمیە، كە ئەویش لە هەڵبژاردنی سەرۆك لەناو پەرلەمان دەست پێدەكات، پارتی ئەگەر پاشەكشە بۆ ئەو مەرامە فێلاویە بكات، ئەوە كوردستان روەو سیستەمی هاوشێوەی ئێران دەروات، كە تێیدا تەواوی دەسەڵاتەكان وەك كارتۆنی دەبن و لەپشتی ئەوانەوە بریار دەدرێت و تاو دەدرێت، ئەمەش هەم گەلی كوردستان بەرەو لەناو چوونێكی حەتمی دەبات، هەم كوردستان بەرەو سیستەمی ئایدۆلۆژی و پۆلیسی دەچێت،
بۆیە ئەركی پارتی قورسە و نابێت بەهیچ شێوەیەك پاشەكشە لەو هەنگاوەی بكات، چونكە ئەو هەنگاوە تەنها مەرامی حزبی نیە، یان حیسابانی رێكخراوەیی سیاسی نیەكە لەبەرژەوەندی سیاسی دابێت، ئەم بابەتە بابەتێكی پەیوەندی راستەوخۆی بەچارەنووسی كوردستان و سیستەمی دیموكراسی كوردستانەوە هەیە، ئەگەر سیستەمی دیموكراسی كوردستان بەو شێوەیە رووەو تاریكی ئاراستە بێت ئەوە سیستەمێكی رووت و قوتی ئایدۆلۆژی و پۆلیسی لەژێر ناوی سیستەمی پەرلەمانی تاو دەدرێت، سیستەمی دیموكراسی كوردستان دەبێتە جێگای چاخواردنەوەی بێ ئیش و بێ ئیرادەكان، بریاری ریوی ئاسا لە تەپۆل و مەكتەبە سیاسیەكان دەدرێت، لەهەر كاتێكش كوردستان ئامادە دەبێت بۆ شەڕی یەكتر سرینەوە.

دەبێت بۆمان رۆشن بێت هەڵبژاردنی سەرۆك لەناو خەڵك تاكە دەسەڵات دەبێت كە حزب ناتوانێت لەسەری رێك كەوێت و بەمیزاجی ئەندامی مەكتەبی سیاسی بریاری لەسەر بدرێت، ئەگەر ئەوەش خرایە ژێر رەحمی مەكتەبی سیاسی دەبێت فاتیحا بۆ رای ئازادی خەڵك و دیموكراسیەتی كوردستان بخوێنرێت، هەڵبژاردنیش بێ ماناترین كردار دەبێت لەكوردستان، تەنها پرسە گورگانێ دەبێت، بۆیە دەبێت پارتی باش بزانێت پاشەكشە كردنی لەو داوایە پاشەكشە بە پێشكەوتنی گەلی كوردستان دەكات، لە پرۆسەی دیموكراسی.