ماوەیەک پێش ئێستا هەوڵێکی جددی هەبوو لەلایەن "نوری مالیکی"، سەرۆکی حزبی دەعوە بۆ ئەوەی دووبارە بێتەوە سەر دەسەڵات و شەرعیەت لە حەیدەر عەبادی، وەربگرێتەوە، لەکاتێکدا بەشێکی زۆری شیعەکان لەگەڵ ئەوە نەبوون کە مالیکی بگەرێتەوە سەر دەسەڵات، بەڵام پیلانێکی تۆکمە هەیە بۆ گەڕانەوەی مالیکی، ئەوەش لەرێگای سڕکردنی سەرکردە سوننەکان و کڕینی دەنگی بەشێکی زۆریان لەرێگای بەخشینەوەی پۆست و پلەو پایە، هاوکات هەوڵێکی جددی هەیە بۆ ئەوەی هەندێک حزبی کوردستان رازی بکرێن بۆ ئەوەی دەنگ لەسەر مانەوەی مالیکی دابنێن، لەناو ئەوانەشدا یەکێتی نیشتیمانی کوردستان و بزووتنەوەی گۆڕان، لە کاتێکدا هەندێک زانیاری هەن کە لەرێگای پارێزگاری سلێمانییەوە لینکی پەیوەندی مالیکی و نەوشیروان مستەفا هەبووبێت بۆ ئەوەی مالیکی بە نەوشیروان مستەفا بڵێت کە ئەو ئامادەیە پشگیری لە رێککەوتنیان لەگەڵ یەکێتی بکات و بودجە و پارەی پارێزگای سلیمانیش بنێرێت بەمەجرێک دەنگ لەسەر مانەوەی بدەن، بۆیە دوای گەرانەوەی نەوشیروان مستەفا بۆ کوردستان بەخێرا شاندی هاوبەشی یەکێتی و گۆڕان سەردانی بەغدایان کرد لەو سەردانەدا دوو ئامانج هەبوو، یەکەم: لێدان لە پەیامەکەی بارزانی کە داوای لە هێزە سیاسییەکان کردبوو کۆببنەوە بۆ ئەوەی قسەی کۆتایی لەگەڵ بەغدا بکرێت، هاوکات بۆ دروستکردنی پرۆژەیەکی سیاسی عێراقییە کە مالیکی سەرپەرشتی دەکات.
ماوەیەک پێش ئێستا "محەمەد رەفعەت" سەرکردەی هاوبەشی گۆڕان و یەکێتی ئاماژەی بەوە دابوو کە پرۆژەیەکی عێراقی گەڵاڵەکراو هەیە بۆ ئەوەی کێشەکانی کورد لە چوار چێوەی عێراق چارەسەر بکرێن، بۆ ئەمەش دەبێت پارتی دیموکراتی کوردستان ناچار بکرێت کە بگەرێتەوە بۆ بەغدا چونکە بەتەنیا ناتوانێت دەوڵەتی کوردی دروست بکات.
پێش هەمووشتێک هاتنی مالیکی بۆ سلێمانی چەند هۆکارێکی لەپشتەوەیە یەکەم: دوورخستنەوەی مەرجەعیەتی بڕیار دان لە کوردستان و لێدان لە پێگەی بارزانی، دووەم: پشتگیری یەکێتی و گۆڕان بۆ ئەوەی دووبارە ببێتەوە بەسەرۆک وەزیرانی عێراق، سێیەم: دروستکردنی دوو بەرەی سیاسی لە کوردستان ئەوەش بەپێدانی پارە و بودجەی شاری سلێمانی بۆ ئەوەی لە شارەکانی دیکەی کوردستان جیایی بکاتەوە، چوارەم: چوونە بەرەی هاوبەش لەگەڵ پەکەکە و حزبوڵا بۆ ئەوەی لەڕزگارکردنەوەی شاری موسڵ پلانی ئەمنی تێک بدرێت و بەشێک لەپارێزگاری موسڵ بەهاوکاری مالیکی دەستی بەسەردا بگرن.