لێکتێگەیشتنە سیاسی و پرۆتۆكۆلییە سەربازییەكەی نێوان هەرێمی كوردستان و ویلایەتە یەكگرتووەكانی ئەمریكا، ڕەهەندی گرینگی هەیە و، لە داهاتووی نێزیكیشدا كاردانەوەی زۆری بەسەر كاری هاوبەشی نێوان گەورەترین و پێشكەوتووترین سوپای جیهان و هێزی پێشمەرگدا دەردەكەوێت.
گرینگیی ئەم ڕێكەوتنە لەوەدایە ئەمریكا بە شێوەی نووسراو ددان بە بوونی دەستەڵاتێكی نوێ و ڕێكخراوی سیاسی و یاسایی لە ڕۆژهەڵاتی ناوەڕاستدا دەنێ، كە تا ئیستا بەم چەشنە ددانی پێدا نەنراوە، ڕێككەوتنە كە سەركەوتنێكی گەورەیە لە سیاسەت و دیپلۆماسییەتی هەرێمی كوردستاندا.
ڕەهەندە مەعنەویەكانی ڕێكکەوتنەكە ئەوەمان پێ دەڵێ، كە ئەمریكا بێ گەڕانەوە بۆ حكوومەتی بەغدا و، سڵكردنەوە لە نیگەرانیی بەرپرسەكانیان، ڕاستەوخۆ مامەلە لە گەڵ هەرێمی كوردستان دەكات، ئەمە هەم دەستكەوتێكی گەورە و پێشڤەچوونێكە لە پەیوەندیی (ئەمریكا – هەرێمی كوردستان)دا، هەمیش پەیامێكی ڕوون و ئاشكرایە بۆ نەیار و ناحەزانی پێشمەرگە و سەرۆك، كە گەلی كوردستان بە تەنیا نییە.
لە سەر ئاستی نێودەوڵەتیش ئەم ڕێككەوتنە ڕێگا خۆش دەكا و غیرەت وەبەر وڵاتگەلێكی دیكە دەنێ، بە تایبەت وڵاتانی ئەورووپا، كە جورئەت بەخۆیان بدەن لە هاوكاریی و پەوەندییە سیاسی و سەربازییەكاندا زیاتر بە ڕووی هێزی پێشمەرگەدا بكرێنەوە و دۆستایەتیان لەگەڵ كوردستاندا بە هێز بكەن.
ئەم یاداشتننامەیە پێگەی سیاسیی و سەربازی دەستەڵاتی هەرێم و پێشمەرگە بەهێزتر دەكات و بە كردەوە شەرعیەت بە هیزی پێشمەرگە دەدات كە لە چوارچێوەیەكی نیزامیی دەوڵەتی دەبنرێ و پێشدەخرێ، ئەمەش خێرپێكردن نییە بە پێشمەرگە، بەڵكو بە شایستی ئازایەتی و گیانفیدایی خۆی ئەمەی سەلماندووە، كە بەرگری لە مرۆڤایەتی و تێكشكاندنی تیرۆر كردووە.
بەم پشتیوانییە سەربازی و داراییە بۆ پێشمەرگە، ئەمریكا بە جیهانی پێشكەوتوو و مۆدێرن دەڵێ، هێزی پێشمەرگە لە شەڕی دژی تیرۆردا پشتووپەنامانەو هەرێمی كوردستانیش فاكتەری سەقامگیری و دیموكراسییە لە ناوچەی ڕۆژهەڵاتی ناوەڕاستدا، بۆیە پێویستە دۆست و پشتیوانیان بین.
چاوەڕوانیش دەكرێ بەهاو بایەخی ئەم سەركەوتنە مەزنە ببێتە دەرفەتێك بۆ نێزیكبوونەوەی لایەنە سیاسییەكانی كوردستان لە پێناوی بەرەوپێشبردنی پرۆسەی یەكڕیزی و ئاشتەوایی نیشتمانیی نێو ماڵی كورد.