تێگەھێ دادپەروەری( العدالە) وەکی گەلەک ژ وان تێگەھێت ئالۆز دگەل گەشەکرنا شارستانیەتێ و کەسایەتیا تاکی د جڤاکادا ھاتە ناف مەیدانا زانستێت مرۆڤایەتیێ و ب تایبەت جڤاکناسی و یاساناسی وسیاسەتناسیێدا.
و ئەڤ تێگەھە دبیتن بڤی ڕەنگی بھێتە پێناسە کرن کو ئازراندنا وجدانی یە لدەف کەسی دبوارێت چەوانیا دانا بریارا و ھەلسوکەتکرن لبەرامبەر کەسانێن دی کو پالپشتیی لسەر تێگەھێ ڕوشتی دکەت. و لدویف رێنمایێن پێشکەفتنێ ئەف تێگەھە دڤیا پێشبکەڤیت و پێبگەھیت لگەل مەزنبوونا مروڤی ژ زاروکینیێ بەرف گەنجاتیێ و پیریێ. بەلێ لدویف بوچوونا زانیێن دەروونی وپەروەردەیی مەرج نینە کو کەسەک تەمەنێ وی ژ ئێکەدی مەزنتربیت و ئەف تێگەھە لدەف وی پێگەھشتی تربیت، چونکی ئەڤ تێگەھە پالپشتیێ لسەر گەلەک بنەما دکەت وەک: ژیری(ژکاء), و سەربۆڕ، و ژینگەھا کەس تێدا دژیت.
لڤیرێ بومە دیاردبیت کو ئاستێ زانین و بەرزبوونا تێگەھشتنا دادپەروەریێ پالپشتیێ لسەر سیستەمێ پەروەردەیی و جڤاکی(داب و نەرێت، ئابووری، سیاسی..ھتد) دکەت دەمێ کەسەک تێدا مەزن دبیت، لەورا فەرە ل سەرمە و کەسێت خەمخورێت پێشکەفتنا گەل و میللەتێ کورد وەک: کەسانێن رەوشەنبیر و کەسانێت دبوارێ سیاسەت و چاڤدێریکرنا جێ بەجێکرنا بریار و فەرمانێن ژ دام و دەزگایێن یاسای و جێبەجێجێکرنێ (تشریعی و تنفیژی)دەردکەڤن گرنگیەکا مەزن بدەنە ڤی تێگەھی، و وەسا رێکبێخن کو ھەمی یان زوربەیا ھاولاتی ھەست بکەن کو یێ بێ بەھر نینن یان یەکسانن د ماف و ئەرکان دا، و ئەڤە دێ بیتە رێ خوشکەر بو چاندنا ھەستێ ژێیاتی (انتماء) و یەکگرتن و ھاولاتی بونێ و دی ڕەنگڤەدانێَ کەت لسەر پێگەھشتنا کەسی د ئەنجامدانا ئەرکا ب شێوەیەکی باش و بێکو پێتڤی چاڤدێرا ببیت.
دووبارە دێ بێژین و وەکو زوربەیا مە دزانن کو ئەڤ تێگەھە ئەڤرۆکە پیشەنگێ ھەمی وان پێشکەفتنانە ئەوێت وەلاتێت پێشکەفتی بخێرا وێ گەھشتینێ. دادپەروەری سەرکاروانێ ھەمی وان پلانانە ئەوێت وەلات بۆ گەشەکرنا ئابووری، و جڤاکی،و سیاسی،و سایکولۆژی لبەر چاڤگرتنا وی ب فەر و گرنگ دزانن. مل بملێ جیھانێ ئەڤروکە کوردستان ژی یا بەرف ئۆمێد و دەسکەفتێت مەزن پێنگاڤا دھاڤێژت. بەلێ نابت ئەم ژبیربکەین گەھشتن ب دەسکەفتێت مەزن تنێ ب پلاندەیناندنا دوماھیک پێدھێت، کاکلک و خالا ژ ھەمیا فەرتر ژی دادپەروەری یە ب ھەمی ڕەنگ و لا یەنێت خۆڤە. کوردستانا ئەڤرۆ و سوباھی بێی ھەبوونا بنەمایێت دادپەروەریێ وەلاتەک سەرکەفتی وپێشکەفتی نابت، پێتڤی یە دەستھەلاتا کوردستانێل داھاتووی دا تێگەھێ دادپەروەریێ بکەتە خاڵ و بنەمایەک سەرەکی ژ ھەمی وان پلانێت بۆ چاکسازیێ تێدا دھێنە داڕشتن، ئەو دادپەروەریا لبن سیبەرا وێ ھەمی مڕۆڤ بێ جیاوازیا ئایینی، و نەتەوەیی، مەزھەبی، و ناوچەیی، وھزری، ھەرکەس بگەھیتە مافێ ڕەوایی خۆ لدویف یاسا و دەستووری وێ و لبن سیبەرا تێگەھێ ژیانێ، و مڕۆڤ ژ ھەرتشتەکێ پیڕۆزترە.
*مامۆستایێ ھاریکار/ بسپۆرێ دەروونناسییا گەشەی/ زانکۆیا زاخۆ/ قوتابیێ دکتۆرایێ ل زانکۆیێت ئۆردنی.