تكایه بێده‌نگ بن، با ده‌زگا ئه‌منییه‌كان ئیشی خۆیان بكه‌ن
محەمەد شكاك
له كوێی دونیا هه‌بووه، هه‌رێمێكی ده‌وردراو به نا ئارامی و شه‌ڕ و تیرۆر، زیاتر له هه‌زار شه‌هیدی له‌شه‌ڕی دژ به تیرۆر به‌خشیبێت، له‌هه‌مان كات ده‌ست و تاقمی هاوسۆز له‌گه‌ڵ تیرۆر له ده‌سه‌ڵات و په‌رله‌مان بن و به بیانووی لاوازی سیاسی داكۆكییان لێ بكه‌ن و كه‌سیش لێیان نه‌پێچێته‌وه ؟
مه‌به‌ستی ئه‌و نووسینه‌ی به‌نده، وه‌ڵامدانه‌وه‌ی هه‌ندێك ده‌نگی نه‌شازه، كه به بیانووی سیاسیكردنی ئه‌ركه نیشتمانییه‌كانی ده‌زگا ئه‌منییه‌كان، هه‌وڵی بێبه‌هاكردنی ئه‌و ده‌ستكه‌وته ئه‌منییه مه‌زنانه ده‌ده‌ن، كه كوردستانی كردۆته ناوچه‌یه‌كی نموونه‌یی ئارامی له ناوچه‌كه و رۆژهه‌ڵاتی ناوه‌ڕاست، له‌كاتێكدا كوردستان ده‌وره‌دراوی به‌رهه‌مهێنه‌ری تیرۆری هه‌موو جیهانه، كه ئه‌ویش حكوومه‌ته ئیسلامیه‌كه‌ی داعش و حكوومه‌تی عێراقه !
ئه‌و ده‌نگه نه‌شازانه، دایم له‌سه‌ر ریتمی( درۆ بكه، درۆبكه، تا باوه‌ڕت پێ ده‌كه‌ن) ئاوازی سیناریۆیه، سیناریۆیه، له‌به‌رامبه‌ر هه‌ر چالاكییه‌كی نه‌وعی ده‌زگا ئه‌منییه‌كان ده‌ڵێنه‌وه وه‌كو ئه‌وه‌ی چاویان به‌سترابێته‌وه له بینینی راستییه‌كان و هزریان قوفڵ ببێت بۆ ناسین و كاریگه‌ری ده‌زگا ئه‌منییه‌كانی كوردستان، كه له رۆڵه‌كانی وڵاتی خۆیان پێكهاتوون.
بابێین، به‌راوردێكی سه‌رپێییانه له‌نێوان كوردستان و وڵاتی عێراقی ته‌كمان بكه‌ین، كه به‌شێكی زۆری بوودجه‌كه‌ی له بواری ئه‌منیدا سه‌رف ده‌كات! به‌پێی ئاماره ره‌سمییه‌كان، عێراق نزیكده‌بێته‌وه له تۆماركردنی (ملیۆن)هه‌مین قوربانی ده‌ستی تیرۆر به كوژراو و برینداره‌وه، له ماوه‌ی ساڵی ٢٠٠٤ تاكو ئێستا، به‌جۆرێك ته‌نها له ساڵی٢٠١٥ (٢٩٠٠٠) بیست و نۆ هه‌زار كوژرا و برینداری وه‌كو قوربانی ده‌ستی تیرۆر له ئاماره ره‌سمیه‌كان تۆمار كراون، مانگی وا هه‌بووه بێ زیاد و كه‌م ١٠٠٠ كوژراو هه‌بووه، له‌به‌رامبه‌ریشدا، له‌هه‌رێمی كوردستان ده‌یان گروپی تیرۆرستی مه‌ترسیدار، ده‌یان تاقم و كه‌سی گرینگی ئه‌و گروپانه، قۆڵبه‌ست و دادگایی و به سزا گه‌یه‌نراون.
بۆ بینینی درێژه‌ی ئه‌و زانیاریانه‌ی سه‌ره‌وه‌م، بگه‌ڕێنه‌وه بۆ ڕاپۆرته‌كانی ساڵانه‌ی (یۆنامی و نه‌ته‌وه یه‌كگرتووه‌كان و هتد...).
ئه‌و براده‌رانه‌ی زۆر عاشق به ئه‌زموونی به‌غدا و ده‌سه‌ڵاته‌كه‌ین، كاتێك له سێبه‌ری ئه‌من و ئاسایشی كوردستان، خه‌ریكی هۆنینه‌وه‌ی سیناریۆن بۆ كه‌مكردنه‌وه‌ی به‌های ئه‌و جیاوایه ئه‌منیه‌ی نێوان كوردستان و عێراقی مه‌عشوقیان، قه‌د به خه‌یاڵیان دانایه‌ت ئه‌و ئه‌زموونه ئه‌منیه فاشله‌ی عێراق و ئێره‌یش موقاڕه‌نه بكه‌ن و به حاسیبه‌كانی ده‌ستیان ئه‌و جیاوازییه بۆ كوردستانیان لێك ده‌نه‌وه ؟
نه‌بووه و ناكرێ، ئاسایشی نیشتیمانی و پرسگه‌لی تایبه‌ت به‌تیرۆر، بێته سه‌ر مێزی چه‌له‌حانێی حزبی و یان به پێچه‌وانه‌وه تێكه‌ڵ به سۆز و عاتیفه و په‌یوه‌ندی حزبی بكرێت، به جۆرێك كه ئه‌ندامی حزبێك ده‌ست له‌گه‌ڵ تیرۆر تێكه‌ڵ بكات و خۆیشی دان به راستیدا بنێ و به‌ڵگه‌ی ته‌واویش له‌به‌رده‌ست بن، تۆ داوا بكه‌ی چاوپۆشی لێ بكرێت و به پێچه‌وانه‌وه ئه‌گه‌ر ئیجرائاتی له‌گه‌ڵ كرا تۆ به ململانێی سیاسیی بزانی و وابزانی ئه‌وه تۆڵه و ته‌سفیه‌ی حزبییه!
ئارامی كوردستان هێڵی سووره، ئه‌وه‌ش پرس گه‌له‌كانی تری هه‌رێم نییه، ئه‌ندام په‌رله‌مانی بووده‌ڵه و ساحێب مه‌له‌ف قسه‌ی تێدا بكات، ئه‌وه پرسێكه راسته‌خۆ په‌یوه‌سته به گیانی هاووڵاتیان. تكایه بێ ده‌نگ بن، با ده‌زگا ئه‌منییه‌كان ئیشی خۆیان بكه‌ن و ململانێ سیاسیه‌كانیشتان هه‌ڵگرن بۆ سه‌ر مێزی گفتوگۆ و تێكه‌ڵ به‌مه‌سه‌له‌ی ئه‌منی مه‌كه‌ن!
