پێشمەرگە جیا لە هەر هێزێكی دیكەی چەكدار چونكە لە سەر بناغەیەكی مێژوویی و بۆ نەهێشتنی زەبروزەنگی زۆرداران و داگیركەرانی كوردستان و لابردنی تەمی مەینەتی و مەزڵوومییەت لەسەر ژیانی میللەتی كورد دەستی داوەتە چەك و بووەتە هێزێك، كە نیشتمانی كورد و میللەتەكەی بەو هێزەوە دەناسرێنەوە، ئێستا بە سیمای مرۆڤانەی خۆیەوە بەرگری لە شەرەف و بەها بەرزەكانی ژیان و مرۆڤایەتی دەكات. ئەو هێزە مرۆڤدۆستە لە هاتنە دونیای خۆی بەشیمان نییە، چونكە مەرگیشی بەلاوە جۆرە ژیانێكە لە پێناوی ژیانی سەربەرزیی و شكۆمەندیی گەل. ئەو لە پێناو بەردەوامبوونی ژیان و جوانكردنی ژیاندا بەرەوپیری مەرگ دەچێ، بۆ ئەوەی بە گیانی خۆیان ژیانی مرۆڤایەتی بڕازێننەوە.
ئێستا پێشمەرگە لە گەڵ بوونەوەرێكی دڕندەو ڕەفتار وەحشیەتی سەردەمدا دەجەنگێ، بوونەوەرێك كە هیچ هێزێكی گەورەی دەوڵەتی لە ناوچەكەدا نەیتوانی بیشكێنێ، بەڵام پێشمەرگە چۆكی پێداداو قۆناغ بە قۆناغ لە ڕیشەوە دەریدێنی، بۆیە پێشمەرگە لە ڕوانگەی جیهانەوە بۆتە خاون مەدالیای جەنگی جیهانیی سێیەم لە ڕۆژهەڵاتی ناوەڕاستدا.
پێشمەرگە ڕەمزی ئازایەتی و ڕەمزی غیرەت وهێمای عەشقی ئازادییە،لە ڕاستیدا هیچ وەسف و وشەیەك بۆ ئاستی بەرزو نرخی قوربانیی تۆنییە،ئێوە لەگەڵ سەختیی ژیان و ستەمكاری و بندەستیی نەتەوەیەك لەدایكبوون، بۆیە ڕەمزێكن هەتا هەتایە بە نهێنی دەمێننەوە، سیمای شەهیدەكانت شادومانییان لێ دەدرەوشێتەوە، ئێوە لە سیاسەت و لە حكوومەت و پەرلەمان و حزبەكان گەورەترن، باڵاو شكۆی ئێوە لە پۆپۆلیست و ئەنارشیستەكان و تابووری پێنجەم بەرزترە، ئێوە نرخی سەربەخۆیی میللەتێك دەدەن، ئێوە بەرگەی دوژمنێكتان گرتووەو ئەفسانەیتان تێكشكاندوە، كە جگە لە ئێوە كەس لە ناوچەكەدا بەرگەی نەگرتووە، داستانی مەزن و پڕشكۆی ئەمجارەتان هەموو دنیای سەرسام كردووە.
ئێوە هێندە عاشقی ژیان و مرۆڤایەتین، ناتوانن بژین پێش مەرگی بەهاكانی ژیان و مرۆڤدۆستی دەكەون، دڵنیام ئێوە حەز دەكەن گەلی كوردستان سەربەخۆ بژی و دڵۆپێك خوێن نەڕژێ، بەڵام دوژمنەكانتان هێندە دڕندەن، شایستەی ئەوەن بە سزای كردەوەكانی خۆیان بگەینن..