ئەوەی چەندین ساڵە كوردستان بە دەستییەوە دەناڵێنێت، قۆڕخكردنی هەقیقەت و خەڵك بەكەمگرتنە، لە لایەن نوخبەیەكی ڕۆشنبیری ئایدۆلۆژیەوە، جا ئەمانە پێڕەوكاری هەر ئایدۆلۆژییەك بن، ئایینی بن یان پاشماوەكانی چەپ، گرینگ لە بەرئەنجامی قورخكردنی هەقیقەتدا، سەریان لە عەوام شێواندوەو، بە ئاڕاستەی بێ شوناسی و بێ نمەكی و بێ ئینتیماییشیان بردوون .
ڕەچەڵەكی ئەم دەردە ئایدۆلۆژیەی بەشێك لەم ڕۆشنبیرانە بڕوابوونیانە بەوەی گوایە، ئەوان خاوەنی بیروباوەڕی پیرۆزن، هەقیقەتی ڕەها و ڕوانگەی كۆتاییش تاكوتەنێ لای ئەوانە، ئەم نوخبەیە لە بن سێبەری سیاسەتی پۆپۆلیستانەی نەوشیروان مستەفادا گەورە بوون و هەر لە بناری گردەگەشەوە خەویان لێ كەوتووەو، خەون بەوەوە دەبینن ئەوان ببنە پێشەنگی هزر و بیری خەڵك و لە خەونە بەتاڵەكەشیاندا لایان وایە پیر و لاوی ئەو كوردستانە شوێن هزرە سەقەتەكەی ئەوان كەوتوون.

كارەساتەكە لێرەدایە ئەو ڕۆشنبیرانەی كە بە نووسەری (وتاردرێژ و وتارنووسی دەستەجەمعی) و بە تاڵانبردنیی میتۆدو ئایدیاو تیۆرییەكانی فارسی و بیانییەكانی دی دەناسرێنەوە و ناوبانگیان دەركردووە..! بە سەر ئەم بڕوا هەڵبژاردەخوازییە نەرجسییەدا كەوتوون، ناتوانن لێی دەرباز بن، پێیان وایە ئەوانن باشترین نووسین و كتێب بڵاو دەكەنەوە و ئایدیاكانیان وەك شەریعەت وایە دەبێ بەسەر هەموو میللەتدا بسەپێنرێ، چونكە بە لای ئەوانەوە وەڵام و چارەسەری هەمووو ئەو پرسیار یان كێشانەی تێدایە، كە هەموو بوارەكانی ژیانی نوێ دەریان دەبڕێت، بەڵام سەرئەنجامی فكر و پەیامی ئەوان سەراپا لە جۆگەی گردەكەوە ئاو دەخۆنەوە، بۆیە هەموو هەوڵەكانیان بریتیە لە شكاندنی شكۆی پێشمەرگەو پەیامی سەربەخۆیخوازانەی سەرۆك بارزانی.
لەبەرانبەردا بۆ شكاندنی ئەو بازنە داخراوە، پێویستە ئەو نوسەر و ڕۆشنبیرانەی هەڵگری پەیامی سەربەخۆیی كوردستانن، بتوانن هەڵمەتێكی فراوانی پەیوەندییە گشتییەكان بۆ ناساندنی سەربەخۆیی و مانا گەورەكانی دەست پێ بكەن. ئەویش بەگوێرەی ستراتیژێكی نەتەوەیی خاوەن ڕەهەندی جیاجیا و پلەبەندكراو.