دی َبابەتی بڤێ پرسیارێ دەست پێکەین: ئایا ھەمی وەلاتان پەترۆل ھەیە یان نە؟ ئایا ھەمی ب پەترۆلێ زەنگینن؟ دناڤ ڤان دوو سەد وەلاتان بەلکۆ گەلەک وەلاتێن ھەین ل جیھانێ کە دلۆپەک " زێڕێ ڕەش " ژی نینە، بەلێ گەلەک زەنگین و خۆدانێ داھاتەکێ باشێ ئابوورینە و نەخاسمە ژ لایەنێ کشتوکالیڤە و ھندەک پرۆژێن کە ب وزەیێ سروشتی کار دکەن وەک ئاشێن بای و ... ھتد.
وەلاتەکێ وەکی ھۆڵەندا ئێکە ژ ڤان وەلاتێن کۆ بێی ھندێ دلۆپەک پەترۆلێ ھەبیتن، ئەڤرۆکە ب ئێک ژ زەنگین و پێشکەفتی ترین وەلاتێن جیھانێ دھێتەھژمارتن و دەرامەتێ سالانەیێ وەلاتی و خەلکێ وێ و خێزانێ تێدا ل ئاستەک گەلەک بلند دایە و جھێ حێبەتیا مرۆڤییە. ئەڤ وەلاتە تاڕادەیەکێ گەلەک پشتا خۆ ب بەرھەمێن کشتوکالی و گیانەوەرێن وەکی چێلا و ھندەک ژێدەرێن سروشتی ڤە گرێددەتن. چێلێن ھۆڵەندیو شیرێ وان، گۆل فرۆتن وەکی ژێدەرەکێ مەزنێ ئابووری، ئاشێن بای یێن کۆ ل جھێن با لێ دھێتن ژ وان سەرچاڤە و ژێدەرانە یێن کۆ ئەڤ وەلاتە پشتا خۆ پێڤە گرێددەتن.
ھەکەر مە چێلێن ھۆڵەندی پێ ناھێنە چێکرن، و ھەکەر پەترۆلێ مە " ژەھرا ڕەش" بوویە نەک " زێڕێ ڕەش"، بەلێ مە ژی ھندەک ژێدەرێن ھەین دشێن بۆ مە ببنە مال و پشت بۆ گەلەک تشتان، دشێن وەک چەوا ئاسایشا مە یا ئابووری و خۆراکی دابین دکەن وەسا ژی ببنە ژێدەرەکێ باوەرپێکریێ ئاسایشا جڤاکی و سایکۆلۆژی بۆ تاکێ کوردستانێ.
مە ل ھندەک جھا چیایێن ھەین و ل وان جھان بایەک توون دھێن و دشێن ببنە نموونەیەک، ئەم وەکی ھۆڵەندییا بۆ خۆ ئاشێن بای دروست بکەین و بۆ بەرھەمھینانا کارەبێ مفای ژێ وەربگرین، نەخاسمە ژی ئەڤرۆکە ئەم ژ ئالیێ کھەرەبێڤە یێ د کاودانەک تەنگاڤیدا. ل شوینا ھندەک پرۆژەیێن کاتی دروستکرنا پارک و جھێن تاکێ کوردی دکەتە مرۆڤەک مشەخۆر، بلا ئەم ژ ڤان وەلاتان ڤان جۆرە پرۆژێن بەرھەمھینەر بینین و ل کوردستانێ جێبەجێ بکەین نەک خۆ بھێلینە ب ھیڤیا ھندەک ژێدەر و لایەنێن کۆرت ماوە، و نەخاسمە قەیرانا دۆماھیکێ بۆ خۆ بکەینە وانەیەک مەزن و پێداچۆنەکێ بخۆ دا بکەین.
ژێدەر: - عەلی، کاروان عەلی( ٢٠١٣). پەروەردە ل ھۆڵەندا، سیمینارەک ل زانینگەھا زاخۆ، فاکۆلتییا زانستێن مرۆڤایەتی، ( ٢٥/٢/٢٠١٣).
*مامۆستایێ ئەکادیمی/بسپۆرێ زانستێن پێداگۆگی و سایکۆلۆژی/زانینگەھا زاخۆ