کوردستان یا ب کاودانەک ناسک و ھەستیار دا دەرباز دبیتن و قەیرانا ئابووری بەر پێیێن مە یێن نەخۆش کرین. ئەڤرۆ ئەم تەنگاڤین و بۆ ئاڤاکرنا ڤێ کوردستانێ و خۆ لسەر پێ یێن خۆگرتنێ ئەم پێدڤی ب ھەر پرۆژە و کارەکینە ھەکەر چی دبیتن ل سەردەمەکێ دیتر مە ئەو کار نەکربایە یان ھند پویتە پێنەدابایە. چەندین سالە باژیڕڤانیێن مە دڤێتن ب کۆتەکی چیایێن مە بکەنە جھێ کاژا و ھەرسال دچینن و ب گەلەک زەحمەت و کۆلەدەردی وان ئاڤ ددەن بەلێ تنێ ھندەک ژ وان خۆ دگرن و ئەوێن دیتر ھشک دبن و نامینن.
باب و باپیرێن مە و ئەوێن بیرا وان دھێتن دبێژن ئەو ملێن نۆکە کەفتینە دەوروبەری باژێڕێن مە سالێن بەرێ ھەمی دارێن بەڕوی و مازییا بووینە و ب خۆ شین دبوون و کەسێ ژی نە ئاڤ ددان و نە ئەڤ زەحمەتا ئەم ب دارێن دیتر ڤە دبین دبرن. کەسێ ژی ماتی ژ وان نەدکر بەلێ ھەمی دەمەکی د شین و جوان بین.
پشتی چەند کاودانێن سەخت و دژوار بسەر گەلی َمە دا ھاتین و ئەم نەچار بووین بۆ خۆ گەرمکرنێ دەست ب بڕینا دارێن دەوروبەری باژێڕ و کۆمەلگەھێن خۆ بکەین، ھێدی ئەو دار ل وان ملا نەمان و ئەڤ ملە یێن ڕویت بووین و سیمایا وان گەلەک یێن کرێت و نەشرین بووی. ھەتاکۆ ڤێ چەندێ کارتێکرنا خۆ یا لسەر سایکۆلۆژیایا تاکێ جڤاکا مە کری، چونکی مرۆڤ و سروشت دوو روویێن دراڤەکینە و ژ ھەڤدۆ جۆدا نابن و تەواوکەرێن ئێکدیترن.
بەلێ نۆکە ژی نەدرەنگە. ھەکەر نۆکە ژی باژێرڤانیێن مە بڤێتن و کاودان ھندەک خۆشتر لێبھێتن و بارێ ئابوورێی کوردستانێ ھندەک باشتر لێبھێتن، و ئەڤ باژێرڤانیە ڤێ چەندێ بکەنە پرۆگرامێ کارێ خۆ و گرنگیێ پێبدەن دێ شێن ب مفاوەرگرتن ژ ئەزموونا وان کەسێن بسپۆر یان شەھرەزا د بیاڤێ کشتوکالا خۆمالیدا ل ھەر دەڤەرکێ، کۆمەکا بەڕووییا وەکی بەرک و تۆڤێ دارێ و لدەمەکێ گۆنجایدا بچینن و بێی ئاڤدانێ دێ بینین ئەو دێ شین بن و ھەمی ئەو ملێن ڕویت وەکی جاران تێر دار بن و ب ڕەوش کەڤن و جوان بن و ھێنە خەملاندن. و نۆکە ژی سەردەمێ وەلێ ھاتیە ھێدی چێڵ و پەز و مریشک ژی نەماینە و ئەڤ گیانەوەرە وان شتلا تێک نادەن و ھەکەر مرۆڤ ژی وژدانا خۆ خراب نەکەن و لدەمێ ھاتن و چۆن و گەشت گۆزارێ و سەیراناندا وان تێکنەدەن و وان دارا ھشک نەکەن، ئەڤ دارە دێ پترتر خۆ گرن و شین بن و جوانیەکا تەواو دەنە دەڤەرێن مە و ئەڤ چەندە ژ لایەنێ سایکۆلۆژی ژی کارتێکرنەکا ئەرینی کەتە سەر تاکێ کوردی و ژ لایەک دیتر ڤە وان گەفێن لسەر ژینگەھێ کێمتر لێکەتن. کا مرۆڤ ل باژێڕەکی سپێدێ چاڤێن خۆ ڤەکەتن و چاڤێن وی ل شوینا ھندەک گرک و ملێن ڕویت ب کۆمەکا دار شینکاتیێ بکەڤیتن چەند ھەستەکا خۆشا دەروونی بۆ دروست دبیتن و ئاسوودەیی و تەناھیەکا سایکۆلۆژی لنک وی پەیدا بیتن. کوردستان ھەکەر ب سروشتێ خۆ جوانە ئەم دێ شێین بڕێکا پرۆژەیێن کێم خەرجی و سڤک وێ ژینگەھێ ھندا دیتر جوان بکەین. بەلکۆ ژی ئەڤ دارستانە ل دەوروبەری باژێڕک و کۆمەلگەھێن مە ببنە جھێ حەویانا سەدان سڤۆرە و کێڤریشک و تەیر و تەوالا و ئەڤە ھەمان ئەو تشت و کارە خەلک ل جھێن دیتر ب دروستکرنا پارکا ئەنجام ددەتن بەلێ ئەڤە پارکەک سروشتیە ب مەرجەکی چاڤێ خەلکێ ل گرتنا وان گیانەوەران نەبیتن بۆ خوارنێ چونکی ئەڤرۆ تشتێ زەحف و مشە خوارنە. گرنگ ئەوە ئەم د خەما ئاڤاکرنا کوردستانا خۆ بین و وێ ژ تێکچۆنێ بپارێزین. گیانفیدا و مێرخاسێن پێشمەرگە ئاخا وێ دپارێزیتن و تاکێ ئاسایی دشێتن ب زیان نەگەھاندنا وێ خزمەتا ئاڤاکرن و پاراستنا وێ ژینگەھێ بدەتن یاکۆ ئەڤرۆکە مرۆڤایەتی بدەستێن گەفێن پیسبوونا ژینگەھێ دنالینیتن و ئەڤ پیسبوونە گەفان ل جەستە و سایکۆلۆژیایا مرۆڤێن ڤێ جیھانێ دکەتن.
*مامۆستایێ ئەکادیمی/بسپۆرێ زانستێن پێداگۆگی و سایکۆلۆژی/زانینگەھا زاخۆ