دوای ئەو پشێوییانەی دوایی لە خورماتوو كە حەشدی شەعبی نایەوە و بە هۆیەوە دەیان خانەوادەی كورد دەربەدەر بوون و شەهید و برینداریشمان بەخشی، لە ژێر ناونیشانی (كۆبوونەوەی یەكلاكەرەوە) رۆژی 27/4 دانیشتنێكی سێ قۆڵی لە نێوان كورد و ئێران و حەشدی شەعبی لە فڕۆكەخانە كۆنەكەی ئەو شارە بەڕێوەچوو. دوای چوار كاتژمێر لە پرێس كۆنفرانسێكدا بەڕێز عەدنانی حەمەی مینە و هادی عامری قسەیان بۆ ڕۆژنامەنووسان كرد و باسیان لەوە كرد دەبێ خورماتوو ئاسایش و پۆلیس بیپارێزێ و پێشمەرگە و حەشد لە دەرەوەی شار بن، بەڵام تا ڕێژەی پێویستی ئەو هێزە ناوخۆییانە تەواو دەبێ، پێشمەرگە و حەشد قەزاكە بەڕێوەدەبەن.
لێرەدا هەوڵدەدەم بە كورتی رای خۆم لە بارەی ئەو ئاگربەست و پێوەندییە هاوبەشە دەرببڕم. سەرەتا كاك عەدنان بە جۆرێك لە جۆرەكان گلەیی لە راگەیاندنی كوردستان كرد و دەیویست بڵێ: ڕێی گونجاویان نەگرتۆتەبەر و دەبوایە راگەیاندن و میدیاكاران رێنیشاندەر بن، نەك بەو جۆرەی رەوشەكەیان روماڵ كرد.
ئەم دەربڕینە جێی هەڵوەستەیە، چونكە ئەگەر میدیا ڕێنیشاندەر بێ، ئاخۆ سیاسییەكان ئیشیان چییە؟ راگەیاندن كاری گواستنەوەی زانیارییە بۆ هاووڵاتیان نەك رێپیشاندان، رەنگە هەڵە و كەموكورتی لێرەو لەوێ هەبێ، بەڵام مانای ئەوە نییە ئەركی قورسی هەڵەی سیاسی بەرامبەر ئەو شارە قارەمانە بخرێتە سەرشانی جۆرناڵیستان!
هادی عامری زۆر لەوە زیاتر ڕۆیشت و كاری گەیاندە دەرچوون لە هەموو عورف و عادەتێك و وەك داعش و حەشدێكی چەكداری مەیدانی شەڕ بە دەق گوتی: «هەندێك لەو ڕاگەیاندنە پیسانە» مەبەستی میدیای كوردی بوو. من نازانم كاك عەدنان بۆ وەڵامی نەدایەوە، چونكە ئەوە ڕاگەیاندنی كورد نییە پیس بێ، بەڵكو ئەوانەن كە لە جیاتی شەڕی داعش دێن سەر و ماڵی كورد حەڵاڵ دەكەن و دەیسووتێنن و گەنج و خەڵكی ئێمە شەهید دەكەن.
لایەنی دووەمی بابەتەكە پێوەندی بەوە هەیە ئاخۆ پێویستی دەكرد وەفدی كوردی پێی باش بێ قونسوڵی ئێران لە كێشەی شارێك میانگێڕی بكات؟! ئەمە لە كاتێكدا ئێران پشتیوانی حەشدی شەعبییە و تەنانەت لەو شارە كوژراویان هەیە!
دەربارەی هادی عامری كە لوتفی هەبووە و لە بەغداوە تەشریفی هێنابوو، قسەیەكم نییە. بەڵام دەپرسم: دوای رووخانی ڕژێمی بەعس و هاتنە سەركاری شیعە وەك دەسەڵات لە عێراق كەی لەگەڵ كورد بەڵێنەكانیان بردۆتەسەر؟ هەر كاتێك لاواز بووبن، هانایان بۆ هیناوین و ئەو ساتانەی بەهێز بووبن دژمان وەستاونەتەوە، تەنانەت ئەگەر گوشاری سەرۆك بارزانی نەبووایە، مالیكی دەیگوت: دێم بۆ هەولێر. پاشان كێ مووچەی بڕیوین؟ كێ نانی پێشمەرگەی قەتع كردووە؟ كێ لە كەركووك و دەوروبەری هەڕەشەیە؟ ئاخۆ بۆچی یەك بارەگای حزبی كوردی لە سەعدییە نییە؟ داخۆ تاڵانكەرانی كورد و سەروماڵیان لە جەلەولا (گوڵاڵە) كێ بوون؟ هێزی لەم جۆرە جێی ئەمان و متمانە نییە. من ناڵیم دانوستان نەكرێ، وەلێ بڕیاربوو حەشد لەو شارە نەمێنێ، نەك پێشمەرگە بچێتە دەرەوەی شارەكە.
هیوادارم بۆچوونەكانم هەڵە بن و كۆبوونەوە (یەكلاكەرەوەكە) نەبێتە دانیشتنی سەدلاكەرەوەی بێ دەرەنجام.