له‌ موسڵی دوای داعشدا، چارەنووسی كورد و پێكهاتەكانی غەیرە عەرەب چۆن دەبێ؟ لە سایەی كامە هێزی سیاسی، ئیدارەیی و ئاسایشیدا، گەرانتی دووبارەنەبوونەوەی جینۆسایدكردنی ئێزیدی ومەسیحی دەدرێت و چۆن دەتوانن ژیانێكی ئارام و ئەمین و سەربڵندانەیان بۆ فەراهەم بكرێت.؟
موسڵی دوای داعش، دەبێ جیاواز بێت لە موسڵی پێش داعش، چونكە بەلای هەرێمی كوردستانەوە، موسڵ سەرچاوەیەكی گرنگ و قووڵایی پاراستنی ئەمنییەتی كوردستانە.


هەرێمی كوردستان لە ساڵی 2003 –ەوە تا هاتنی داعش، ئەزموونێكی یەكجار تاڵی لەگەڵ لایەنی عەرەبی موسڵدا هەیە. شارەكە لە سەر دەستی پێشمەرگە ئازاد كرا، كەچی بە بیانووی نابەجێ و تۆمەتی ناڕەوا هەر ڕۆژە و كێشەیەكیان بۆ هێزی ئەمنی كوردی دروستدەكرد و داوای كشانەوەی پێشمەرگەیان لە ئەمریكا دەكرد، كە پێشمەرگەش كشایەوە ناوچەكە بووە لانكەی سەرەكیی تیرۆر و تیرۆریستان.
موسڵ شارێكی گرنگە بۆ هەرێم و یەكەمین ویلایەتیی مێژوویی كوردستانە، كورد نەتەوەیەكی پێشتر زۆرینە و ئێستاش زیندوو و پێگەی بەهێزی شارەكەیە، بۆیە، باشترین نەخشە ڕێگا بۆ دوای پرۆسەی ڕزگاری شارەكە ڕێككەوتنی هەرێم و لایەنە پەیوەندیدارەكانە لە سەر دابەشكردنی، بۆ سێ پارێزگا: شنگال، دەشتی نەینەوا، پارێزگاری ناوەندی شارەكەیش بە هاوبەشی كورد و عەرەب ئیدارە بدرێت.

بۆیە، هەرێمی كوردستان بێ ڕێككەوتنی پێشوەختە بەشداری لە ئازادكردنی موسڵدا ناكات، چونكە پێشمەرگە هێزێكی تەحتە تەلەب نییە، لەخۆڕا خوێن بڕێژێ بۆ ئۆپراسیۆنێكی گەورەی سەربازی و ئەمنی كە ئامانج و ئایندەكەی ڕۆشن نەبێت، پاشان پێی بڵێن، سوپاس و فەرموو شارەكە جێبهێڵە و ڕۆڵەكانیشت لە كورد و مەسیحی و ئێزدی و شەبەك تەسلیمی قەدەری عەقڵیەتێكی داعشیانە بكەوە!
لە دەشتی نەینەواوە، تا بەشە كوردییەكەی ناو موسڵ و شنگال و زوممار، هەمووی ناوچەی ڕەسەنی كوردستانین، لە ساڵانی سییەكانەوە تەعریب كراون و عەرەبیان بۆ هێنراوە و خاكی كوردیان داگیركردبوو. سەرەڕای ئەوەش، كورد لە ساڵی 2003دا بیری لە تۆڵەسەندنەوە و توندوتیژی نەكردەوە و، لاپەرەیەكی نوێی پێكەوە ژیان و برایەتیی لەگەڵ عەرەبەكاندا هەڵدایەوە، بەڵام دوای 11ساڵ، ئەو پێكەوەژیانە فەشەلی هێناو،عەرەب خیانەتیان لە كورد و پێكهاتەكانی دیكە كرد.
كە داعش هات، بەشێکی دیاری عەشیرەتە عەرەبەكان رێگاكانیان لە پێشمەرگە داخست و هاوكاریی تیرۆریستانیان كرد، پەلاماری خێزانی كوردیان دا، ژنانی ئێزدییان بەكۆمەڵ ڕفاند و كردنیان بە كۆیلە و لە سوریا كڕین و فرۆشتنیان پێكردن و سەری كوردیان بڕی.
بۆیە، شتێك نەماوە بە ناوی برایەتی و ئەجر و جیرانەتیی ئەمین، پێكهاتەكان، چۆن لەگەڵ بە ناو (برای عەرەب)یاندا ژیان دەستپێدەكاتەوە، كە دوێنێ جینوسایدیان كردوون!؟.
ئەوە كێشەیەكی ئەبەدییە، چونكە دەوڵەتی عێراق دەوڵەتێكی تەزویرە و بەزۆر پێكەوە لكاوە، تەنیا چارەسەر ئەوەیە، چارەنووسی ئەو ناوچانە بدرێتەوە دەست خەڵكی خۆیان، تا بڕیار لە چارەنووس و چۆنێتی ژیانیان بدەن، نابێ ڕێگە بدرێت لەسەر خواستی دەوروبەر و وڵاتانی ئیقلیم بڕیار لە ئایندەو چارەنووسی خاك و خەڵكی ئەو ناوچانە بدرێت.
ئەوه‌ كێشەی (سایكس پیكۆیە) و، دەبێ جیهان چارەسەری ڕیشەیی بۆ بدۆزێتەوە و، جارێكی دی لە سەر خواستی خەڵكەكەی نەخشەی ئیداری و جوگرافیی ناوچەی موسڵ بە شێوەیەكی دادپەروەرانە دابڕێژرێتەوە.