كاتێك رِوَشنبیرانى تاراوگه -ده‌بنه به‌شێك له گرفت و قه‌یرانه سیاسیه‌كه‌ى كوردستان
خه‌سره‌و پیرباڵ
له ماڵپه‌رِى سبه‌ى- وتارێكى كاك مه‌ریوان وریا قانعم خوێنده‌وه كه له‌سه‌ر مه‌ترسییه‌كانى هه‌ڵبژاردنى پێشوه‌خت نووسیوه , هه‌ر هه‌مان رِوَژ له كه‌ناڵى كه‌ىئێن ئێن- گوێم له‌چاوپێككه‌وتنێكى( هشیار عابد )بوو كه وه‌كوو چاودێرێكى سیاسی باسى له‌مه‌سه‌له‌ى خوَپێشاندان ده‌كرد , وه جێگه‌ى نێگه‌رانیشه كه له‌ته‌ك ئه‌م به‌رِێزانه‌ى خه‌ڵكانى تریش هه‌ن وه‌كوو فاروق رِه‌فیق و رِێبین هه‌ردى...
مخابن له‌جیاتى ئه‌وه‌ى كه خوێندنه‌وه‌ى درووست و رِاسته‌قینه‌یان هه‌بێت له‌سه‌ر مه‌سه‌له‌كان, به‌تیبه‌تیش ئه‌وان له ئه‌ورِوپا و له وڵاتانى پێشكه‌وتووى دونیادا ژیانیان به‌سه‌ربردووه , دێن له‌كه‌ناڵ و ده‌زگاكانى بڵاوكردنه‌وه‌ى كوردستان , نه‌وت به‌سه‌ر ( ئاگرێكى ناسراوه‌وه) ده‌كه‌ن و له‌جیاتى ئه‌وه‌ى ببنه به‌شێك له چاره‌سه‌ر , ئه‌و به‌رِێزانه هاتوونه‌ته‌وه وڵات بوَ ئه‌وه‌ى ببنه لایه‌نێكى زوَر به‌هێزى له گرفت و كێشه‌كان ..به‌ڵكوو زیاتر مه‌سه‌له‌كان له جه‌ماوه‌ر ده‌شێوێنن و كێشه‌كان قووڵتر ده‌كه‌نه‌وه .
دیاره من نامه‌وێت وه‌ڵامى خاڵ به‌خاڵى ئه‌م وتار و چاوپێككه‌وتنانه‌ى ئه‌م نووسه‌ره به‌رِێزانه بده‌مه‌وه , به‌ڵام ده‌مه‌وێت چه‌ند مه‌سه‌له‌یه‌ك رِوونبكه‌مه‌وه , به مه‌به‌ستى به‌رچاورِوونى بوَ جه‌ماوه‌رى كوردستان و بوَ ئه‌و به‌رێزانه‌ش .
له‌م قوَناغه مێژووییه‌دا ئه‌ركى رِوَشنبیر و نووسه‌رانى میلله‌ت , له‌هه‌موو توێژوو چینه‌جیاجیاكانى كوَمه‌ڵگاى كوردستانى گه‌وره‌تر و گرینگتره , به‌ڵام جێگه‌ى داخه ئێستاكه , پێش ئه‌وه‌ى باس له‌خوودى گرفته سیاسیه‌كه- بكرێت مه‌سه‌له‌یه‌ك خوَى مه‌ترِه‌ح ده‌كات ئه‌ویش ئیشكالیه‌تى رِوَڵى (نووسه‌ر و رِوَشنبیرانى ده‌ره‌وه‌ى كوردستانه ), ئه‌و توێژه ناسراوانه‌ى ده‌ره‌وه‌ى وڵات كه هه‌موویان ناسراون ئه‌زانرێت كه له‌ساته‌وه‌ختى ناخوَشى و مه‌ینه‌تییه‌كانى میلله‌ت و كاره‌ساته‌كان, هه‌میشه له‌پێشه‌وه‌ى خوَپێشاندانه‌كان بوونه , كاتێك له كوردستان شه‌رِى ناوخوَ بوو , هه‌ڵوێستیان هه‌میشه دژى شه‌رِ بوو.. ئه‌وكات له‌نووسین و هه‌ڵوێست وه‌رگرتندا هه‌میشه له‌دژى تووندوتیژى بوون, به‌ڵام مخابن ئه‌وه‌ى ئێستا رِووده‌دات له كه‌ناڵه‌كانى رِاگه‌یانددا , ته‌واو ته‌واوكه‌رى رِوَڵى تێكده‌رانه‌ى لایانێكى سیاسی قین له‌دڵى /سلبى/تێكده‌رانه‌ى وڵاته, ئه‌و رِوَشنبیرانه‌ى كه باسم كرد بوونه‌ته مه‌شخه‌ڵ هه‌ڵگرى ئه‌ولایانه سیاسیه‌ى كه ده‌یانه‌وێت ئاسمانى كوردستان تاریك بكه‌ن و وڵات به‌ره‌و شه‌رِێكى گه‌وره‌ى ناوخوَ ببه‌ن!
ئه‌مرِوَكه له كوردستاندا , گه‌وره‌ترین ئیشكالیه‌ت له‌لایان توێژێكى رِوَشنبیرانى كوردى تاراوگه‌وه درووست بووه , كه‌ش و هه‌واى دیالوَگ و قه‌یرانه سیاسیه‌كه‌ى هه‌رێمى كوردستان , به‌ره‌و ئاقارێكى نادیارى مه‌ترسیدار ده‌به‌ن و هه‌موومان زه‌ره‌رمه‌ندنین تیایایه .
یه‌كێك له‌و گرفته سه‌ره‌كیانه‌ى رِوَشنبیرانى كوردى تاراوگه – ئاشنانه‌بوونیانه به مه‌سه‌له‌ى ئیداره له دامووده‌زگاكانى هه‌رێمى كوردستاندا , له‌به‌رئه‌وه‌ى له‌و وڵاتانه‌ى تێیداژیاون له بووارى كاركردن و تێكه‌ڵبوون سه‌ركه‌وتوو نه‌بوونه و كاریان نه‌كردووه له مووئه‌سه‌سات , وه ئه‌وه‌ش هیچ عه‌یبێك نییه , وه من تێیده‌گه‌م كه تێكه‌ڵبوون و ئاوێته‌بوون له‌گه‌ڵ كوَمه‌ڵگاى كاركردن ئاسان و واڵا نییه بوَ په‌ناهه‌نده‌كانى كورد , به‌ڵام كه دێنه‌وه كوردستان , رِووبه‌رِووى واقیعێكى تایبه‌ت ده‌بنه‌وه , كه ده‌بێت خوێندنه‌وه‌یان بوَ هه‌بێت , لێى تێبگه‌ن. ئه‌وه‌ى من ده‌یبینم , ئه‌وان باس له‌شتێك ده‌كه‌ن كه ئاشنانین پێى , له‌پرِاكتیكدا ئه‌زموونیان نییه تیایا .
گوێبیسى (هشیار عابد) بووم له كه‌ناڵى كه‌ىئێنئێن ده‌یوت : له‌هیچ وڵاتانى دونیا وه له له‌نده‌ن خه‌ڵكى پێویستیان به‌موَڵه‌ت نییه بوَ خوَپێشاندانه‌كان ؟!
له‌لاى زوَربه‌یان , له‌كاتى باسكردنى ئه‌زموونى حكومرِانى هه‌میشه به‌چاوێكى سووكه‌وه باس ده‌كرێت , به‌بێبایه‌خ و مه‌سه‌له‌یه‌كى سرووشتى .. بێمنه‌تانه باس له به‌رنامه و ئه‌و هه‌موو خزمه‌تگوزه‌رانیانه‌ى حكومه‌تى هه‌رێمى كوردستان پێشكه‌شى هه‌رێمێكى وێران و دوواكه‌وتوو كردووه , دواكه‌وتوویى له‌هه‌موو بواره‌كانى ژیان .
به‌داخه‌وه ئه‌م جوَره خوێندنه‌وانه بوَ مه‌سه‌له‌كان , جوَرێك له بێمتمانه‌یى و باروودوَخێكى خراپى لێده‌كه‌وێته‌وه , كاتێك گوىَ له گوتار و لێدوانى ئه‌و نووسه‌ر و رِوَشنبیرانه‌ى تاراوگه ده‌گریت , رِاسته‌خوَ من خوَم رِووبه‌رِووى نه‌خوێنده‌وارى و كه‌سێكى نامه‌سئوول ده‌بینمه‌وه نه‌وه‌كوو كه‌سێكى رِوَشنبیر و چاودێرى سیاسى .
ئه‌لته‌رناتیڤ چیه ؟
به‌بوَچوونى من ده‌بێت نووسه‌ر و رِوَشنبیرانى تاراوگه – ده‌بێت كاربكه‌ن بوَ كوَنفرانسێكى گه‌وره , قسه له‌سه‌ر ئه‌لته‌رناتیڤى ئاشتى بكه‌ن و هه‌وڵى یه‌كخستنى خوَیان بده‌ن له‌سه‌ر بنه‌ماى ئاشتى و یه‌كرِیزى مه‌سه‌له چاره‌نووسسازه‌كانى كوردستان و مه‌سه‌له‌ى ئه‌زموونى سیاسی كوردى له كوردستانى عیرِاق و پاراستنى یه‌كیێتى برِیارى سیاسی كوردى و پاراستنى سه‌روَكایه‌تى هه‌رێمى كوردستان و حكومه‌تى هه‌رێمى كوردستان , ببێته مه‌سه‌له‌یه‌كى هاوبه‌شى گرینگ بوَ یه‌كخستنى هه‌وڵه‌كانیان له‌پێناو گووتارێكى رِوَشنبیرى ئاشتى خواز كه به‌هه‌قیقه‌ت خزمه‌ت به چاره‌سه‌رى ئاشتیانه‌ى ئه‌مروَكه‌ى هه‌رێمى كوردستان بكات.
توێژى رِوَشنبیرانى تاراوگه پێویستیان به دووباره به‌خوَداچوونه‌وه هه‌یه له‌سه‌ر ئه‌و هه‌ڵوێستانه‌ى خوَیان له‌سه‌ر قه‌یرانى سیاسی له هه‌رێمى كوردستاندا ,
نووسه‌رانى تاراوگه خوێندنه‌وه‌یه‌كى واقیعیان نییه , نه بوَ كوَمه‌ڵگاى هه‌رێمى كوردستان و نه بوَ كێشه سیاسی و ململانێكانى گوَرِه‌پانى سیاسی وڵات , سه‌رچاوه‌ى ئه‌و نه‌خوێنده‌واریه‌شیان له بێئه‌زموونیانه له ئیداره و ژیانى كاریان له‌و وڵاتانه‌ى تیایا ژیاون .
مخابن لایانێكى سیاسی كه هه‌ر له‌دایكبوونیه‌وه , له‌كه‌ش و هه‌وایه‌كى زوَر تایبه‌تدا , برِیارِى داوه هه‌موو هه‌وڵه‌كانى بوَ توَڵه سه‌ندنه‌وه بێت و سه‌روَكایه‌تى هه‌رێم و په‌رله‌مان و حكومه‌ت هه‌ڵبووه‌شێنێته‌وه , ئه‌م لایانه سیاسیه , خه‌ریكه توێژى رِوَشنبیرانى تاراوگه بكاته مه‌شخه‌ڵ هه‌ڵگر و ته‌رِه‌فێك له‌و پلانه دووژمنكارانه‌ى سیاسه‌ته چه‌وته‌كه‌ى خوَى .
ئیمرِوَكه له هه‌رێمى كوردستاندا , لایانێكى سیاسی ناسراو هه‌یه ده‌یه‌وێت هه‌موومان به‌ره‌و تاریكى به‌رێت و وڵات تووشى ئافاتێكى نه‌ته‌وه‌یى گه‌وره بكات, پێم وایه باشترین وه‌ڵامدانه‌وه و رِێگرى بوَ ئه‌و كاره‌ساته ئه‌وه‌یه كه رِوَشنبیرانى كورد كاربكه‌ن بوَ گوتارێكى سیاسی/ رِوَشنبیرى كه رِێگربێت له شه‌رِى ناوه‌خوَ و درووستكردنى ئاژاوه و هه‌ڵخه‌ڵه‌تاندنى شه‌قامى كوردى و رِووخاندنى ئه‌زموونى ده‌وڵه‌تى كوردى و تێكدانى كه‌ش و هه‌واى ئازادى و گه‌رِاندنه‌وه‌مان بوَ قوَناغى پێش ئازادى و گه‌رِانه‌وه‌مانه بوَ دیكتاتوَریه‌ت .
