گوتەبێژی فەرمیی پارێزگای سەڵاحەدین، وردەكاریی هێرشێكی تیرۆریستانی داعشی لە سنووری پارێزگاکە ئاشكرا کرد كە بەو هۆیەوە شەوی ڕابردوو 11 کەس لە هێزە ئەمنییەکان و هاووڵاتیان كورژراون 7 کەسی دیکەش بریندار بوون.

جەمال عكاب، گوتەبێژی فەرمیی پارێزگای سەڵاحەدین، ئەمڕۆ یەكشەممە 22/11/2020، بە (باسنیوز)ی راگەیاند: "شەوی ڕابردوو تیرۆریستانی داعش لە ناوچەی (مەسحەك) لە نزیك قەزای بێجی لە سنووری پارێزگاری سەڵاحەدین، سەرباری چاندنی بۆمب، بۆسەیەكیان بۆ هێزە ئەمنییەكانی عێراق داناوەتەوە."

گوتیشی: "بەهۆی ئەو كردەوە تیرۆریستییەوە ٩ ئەندامی هێزە ئەمنییەكان كە 5یان پۆلیس بوون و لە نێویاندا عەقید ئیبراهیم معجەل، بەڕێوەبەری پۆلیسی مەسحك، لەگەڵ دوو سەرباز و دوو چەكداری حەشدی شەعبی و دوو هاووڵاتیی سڤیل گیانیان لەدەست داوە کە سەرجەم ١١ کەس بوون."

راشی گەیاند: "بەدەر لەو 11 كوژراوە، 7 كەسی دیکە لە هێزە ئەمنییەكان و هاووڵاتیانی سڤیل بریندار بوون."






باسنيوز