فازڵ میرانی كە ئێستا سكرتێری مەكتەبی سیاسیی پارتی دیموكراتی كوردستانە، وەك خۆی دەڵێت كوڕی جوتیارێكی ئەم كوردستانەیە و لەناو پارتی و رێبازی بارزانیدا وەك تێكۆشەرێك بە خەبات و قوربانیدان گەیشتۆتە پۆستی سكرتێری مەكتەبی سیاسیی پارتی دیموكراتی كوردستان، میرانی لە قسەكردندا بوێر و راشكاوانەیە و بڕوای بەوە هەیە كە پێویستە مرۆڤ ئازادانە ئەوەی بڕوای پێیەتی دەریببڕیت و راشكاوانە را و بۆ چوونەكانی بۆ میللەتی خۆی ئاشكرا بكات، هەروەها جیاوازییەكی دیكەی فازڵ میرانی ئەوەیە لەگەڵ ئەوەی سكرتیری مەكتەبی سیاسی پارتیە، بەڵام بیربۆچوونی تایبەتی خۆی هەیە و زۆر جار كە هەندێك بیروبۆچوون دەردەبریت راشكاوانە ئەو راستیە ناشارێتەوە كە ئەوە بۆچوونی تایبەتی خۆیەتی و مەرج نییە بۆچوونی پارتی بێت، بۆیە لەم روانگەیەوە میرانی وەك خاوەنی بۆچوونی تایبەتی خۆی ناسراوە، هەروەها میرانی بێجگە لەوەی یەكێكە لە سیاسەتمەدارە دیارەكانی كوردستانەو لەهەمانكاتدا دەرچووی كۆلێژی یاسایە و پیاوێكی یاساناس و مافپەروەرە، بۆیە لەم لایەنەشەوە تەواوی رەهەندە یاساییەكان و ماف و ئازادییەكانی خۆی لە چوارچێوەی یاسا رەچاو دەكات و دەزانێت چۆن لەسنوری یاسادا ئازادییەكانی خۆی پیادە بكات، بۆ قسەكردن لەسەر كۆی بارودۆخی سیاسی ئەمڕۆی كوردستان و گۆڕانكارییە ئیقلیمیەكان و كێشەكانی عێراق و هەروەها قسەكردن لەسەر كابینەی حەوتەم، چووینە سەردانی بەڕێز فازڵ میرانی و لەوتووێژێكی كراوە لەگەڵ گوڵاندا بە سنگفراوانیەوە وەڵامی پرسیارەكانی داینەوە، ئەمەش دەقی دیمانە تایبەتەكەی گوڵانە لەگەڵ بەڕێز فازڵ میرانی سكرتێری مەكتەبی سیاسی پارتی دیموكراتی كوردستان.

گوڵان: بۆ ساڵێك دەچێت كە كۆنگرەی سیازدەیەمینی پارتی دیموكراتی كوردستان سازدراوە، دروشمی كۆنگرەكە بریتی بووە لە نوێ بوونەوەو دادپەروەری و پێكەوە ژیان، دەمانەوێت لە سكرتێری مەكتەبی سیاسی ئەم پارتە بپرسین، لە ماوەی ئەمساڵەدا چەندە گۆڕانكاری بەسەر ئەم حزبەدا هاتووە، وەك خۆتان وتوتانە پێویستە حزب پێ بنێتە قۆناغێكی نوێوە، لەبەر ئەوەی قۆناغەكە وا دەخوازێت، ئێستا دەمانەوێت بزانین لە دوای تێپەڕینی ئەم ساڵەوە، بەڕێزت چۆن سەیری پارتی دەكەیت؟
فازڵ میرانی: بە ناوی خودا، پێشەكی بەخێر بێن و دەستخۆشی لە گۆڤاری گوڵان دەكەم، كە هەم خەڵكی بەئەزموون و دڵسۆز بۆی دەنووسن، هەم خوێنەرانێكی زۆریشی لە كوردستان هەیە..
كۆنگرەی سیازدەیەمینی پارتی كە پارساڵ بەسترا، بەو سێ دروشمانەی كە ئاماژەت پێدا كۆنگرەكە بە گیانێكی بەرخودان و بە ئیرادەوە سازدرا، ئەو دروشمانەی كە باست كردن، ئەوانە خواستی سەردەمەكە هێناوینیە پێشەوە، هەر بڕیارێك یان هەر دروشمێك كە مرۆڤ دەیدات و ڕایدەگەیەنێت پێشوەختە پێویستە خۆی بۆ ئامادەكردبێت، بە دیدی من پێویستە لە ناوەڕۆك و پاشخانی ئەم دروشمە تێگەیشتبێت، پێویستیشە یان زەمینە ساز بووبێت یان زەمینە ساز بكات بۆ تێگەیشتن جێبەجێ كردنی ئەم دروشمانە، لەبەر ئەوەی تەنیا یەك ساڵ بەسەر كۆنگرەدا تێپەڕیوە، مەسەلەكان بە ڕەهایی وەرناگرم،، بەڵكو بە ڕێژەیی وەردەگیرێن، سەبارەت بە دروشمی نوێ بوونەوە، لەوانەیە دیدی خەڵك لەم دروشمەدا ئەوە بێت كە پارتی سەرتاپای خۆی بگۆڕێت، بەدیدی ئێمە نوێبوونەوە خۆگونجاندنە لەگەڵ تازە پێشهاتەكان، پێویستە پارتی زیاتر لەگەڵ دۆخە بابەتییەكان خۆی بگونجێنێت، ئەوەی دوێنێ پارتی قبوڵی نەبوو دەبێت ئەمڕۆ بەپێی تازە پێشهاتەكان قبووڵی بكات، دەبێت زیاتر لە دوێنێ قبوڵ كردنی واقیعی ئەمڕۆ بە پراكتیكی نیشانی خەڵك بدات، ئەوەش دەبێتە مایەی پاراستنی ئەو تواناو كادرو ئەدا جۆرێتییەی هەیەتی و دواتر دەرگا بكاتەوە بە ڕووی گەنجەكانەوە، ئەوانەی كە دیدێكی تازەیان بۆ تازە پێشهاتەكان هەیە، ئێمە زۆرجار كە باسی ئەم حزبانەی كە لە پێشی سەرهەڵدان و لە خەباتی شاخدا هاتووین دەكەین، بەشوێن زمان و دیدێكی هاوبەشدا دەگەڕێین، لەنێوان ئێمەو هێزی گەنج كەلە دوای سەرهەڵدان لەدایك بوون یان پێگەیشتوون، هەندێكجار خوێندنەوەیەكی نادروست لە نێوان ئێمەو ئەوان پەیدا دەبێت، بەشێك لەوانە كە لە دەرەوەی حزبن یان هێشتا بڕیاریان نەداوە سیاسەت و حزبایەتی بكەن، بە دیدی خۆیان هەموو شتێكی ئەم حزبانە بەكلاسیك و كۆن لەقەڵەم دەدەن، تەنانەت هەندێك جار شانازی بە ئینتیمای نیشتمانی و نەتەوەییەوە ناكەن و دەڵێن ئینتیمای من بۆ خۆشگوزەرانی ژیانی تایبەتی خۆمەو ئەوەی من دەمەوێت بۆم جێبەجێ ببێت، سروشتییە مرۆڤ هەردەم هاوكۆكە لەگەڵ ئازادی تاك و ئازادی خۆ بەیان كردن، بەڵام ناكرێت مەسەلەی ئازادی كۆمەڵیشی لەبیربچێتەوە، هەندێ مەسەلە هەیە دەمانگەیەنێتە یەكتر، ئەویش ئینتمایە بۆ نیشتمان، ئینتیمایە بۆ نەتەوە، دواتر ئەو شانازی بە ڕابردووی ئێمە ناكات، لە كاتێكدا ڕابردووی ئێمە سەرمایەیەكە بۆ ئەو، ئەگەر ڕابردووی ئێمە نەبایە لەوانەیە ئەوەی ئەو كە ئەمڕۆ پێی لەسەر داناوەو بناغەو زەوینەیەكی هەیە، بەو جێ پێقایمیە نەتوانێت تەنانەت بانگەشە بۆ وەدەست خستنی ئازادییە تاكگەراییەكانی خۆیشی بكات، ئەمە دیدێكی نادروستی خوێندنەوەی ئەوانە بۆ ئێمە، بەڵام ناكرێت مرۆڤ خوێندنەوە نادروستەكانی بەشێكی ناو ئێمەش بە هەند وەرنەگرێت، ناكرێت ئەم هێزە گەورەیەی گەنجانێك كە دوای سەرهەڵدان لەدایك بوونە یان دوای سەرهەڵدان پێگەیشتوونە، بە كەسانی خوانەخواستە بەهیچ ڕازی نەبوو لەقەڵەم بدرێن و فەرامۆش بكرێن، نا، چونكە ئەمانەش كوڕی سەردەمی خۆیانن، وەچەی تەكنەلۆژیاو ئەنتەرنێت و میدیای ئازادو سەتەلایتەكانن، بەنموونە لە زەمانی من و تۆدا سەتەلایت لە عیراقدا نەبووە، ئێستا تەنانەت مناڵی تەمەن چوار پێنج ساڵانیش هەوڵی وەدەست هێنانی ئەنتەرنێت و ئایپاد و ئای فۆن و ..تاد دەدەن، شتێكی سروشتییەو تێگەیشتنی ئەمان بۆ هەندێك مەسەلە جیاوازی هەبێت، ئەمە پێوەندی بە ماوەی زەمەنی تێگەیشتنی ئەوەوە هەیە، هەروەها بیركردنەوەو ئیستیعابی ئەوە بۆ ئەمڕۆ، هەرگیز من لە تەكنەلۆژیادا بەقەد كوڕی خۆم شت نازانم، كەواتە ئەو یان ئەوەتا بیركردنەوەی لە من زیاترە، یان جیاوازییەك لە نێوانماندا هەیە، بەڵام هەمیشە پێویستە بەدروستی یەكتر بخوێنینەوە، بڵێین ئەوەی ئێوە دەیڵێن ڕاستە بەڵام با لە خاڵە هاوبەشەكان یارمەتیدەری یەكتر بین، ئێمە تا ئێرە بەم شێوەیە هێناومانەو ئێوەش بە لێهاتوویی خۆتان و زانینی خۆتان وەرنە ناو كاروانەكەو ئیزافاتی خۆتان بچەسپێنن، لێرەدا نوێبوونەوە بە تێگەیشتنی پراكتیكی نەك تەنیا تیۆری، نوێبوونەوەكە خۆی لێرەدا دەبینێتەوە، واتا بە تێكەڵكردن و پێكەوەگرێدانی خوێن و بیری گەنجی تازەو بەستنەوەی بەمێژووی ئینتیماكانەوە، چونكە ناكرێت خۆیان دابڕێنن لە شۆڕشی ئەیلول و گوڵان و شۆڕشەكانی سەرهەڵدان و كوردایەتی، ناكرێت ئەو شۆڕشانە بە سەرمایەی خۆیان نەزانن، ئەمە وەك ئەوەیە كەسێك لە سەرمایەی باوكی كە لە بانقدایە كەڵك وەربگرێت، ئیتر ئەویش دەبێتە سەرمایەدارو چۆن دەیخاتەوە گەڕ، ئەوە بابەتێكی ترە، بە دیدی من تێكەڵكردنی دوو دیدەكە بۆ نوێبوونەوە لێرەدایە، واتا تێكەڵبوونی بیرو خوێنی تازە بە ڕێبازە پڕبەها پیرۆزەكان، ئەمە نوێبوونەوەكەیە بەڵام لە جەوهەردا لێك جودایە، ئێمە بڵێین نوێبوونەوە دەكەین بێ ئەوەی شتی نوێ بۆ ئەم ڕێبازە یان ئەم حزبە یان پێڕەوو پرۆگرامە وەربگرین و ئیزافە بكەین، ئەمە لە شوێنی خۆمان دەمانچەقێنێت، ئەمەیە نوێبوونەوەی كە پارتی لە كۆنگرەكەیدا كردییە دروشم، پێویستە بە كردارەكیانە بێت، ئەمەش دەرگایەكی ئاوەڵاو فراوانە، هەر لە بوارەكانی ڕاگەیاندن و سیاسەتی ئابووری تا سیاسەتی جڤاكی و كۆمەڵگەیی، چۆن تەماشای میدیاو ڕاگەیاندنی ئازادو دنیای ئازادی دەكەین، چۆن تەماشای ئافرەت دەكەیت، یاساكان و چەمكە نوێیەكان چۆن تەماشا دەكەیت، میدیاو پرەنسیپەكانی خۆت چۆن بەڕێوە دەبەیت، پێوەندییە هەرێمایەتی و نێودەوڵەتییەكان چۆن هەڵدەسەنگێنیت، یەكترقبوڵكردنی ناو هەرێمی كوردستان و پاراستنی ئەم فرەییە حزبی و مۆزائیكیەتەی ئیتنیەكانە، چۆنیەتی دابینكردنی ئاسایشی ئەهلی و میللی ناوخۆیمانە، ئەمانە هەموویان لەو چەمكەوە سەرچاوە وەردەگرن و بە هەموویانەوە نوێ بوونەوە وەبەرهەم دێت.


گوڵان: جەنابت وەك پێشمەرگەیەكی دێرین و كادرێكی شایەتحاڵ لەسەر شۆڕشی ئەیلول و گوڵان و ئێستاش سكرتێری مەكتەبی سیاسی پارتیت و لە قۆناغێكی زۆر مۆدێرن و هاوچەرخداین، زۆر كەس هەن و دەڵێن بۆیە پارتی ئەم دروشمانە بەرز دەكاتەوە، چونكە وەچەی كۆن یان پێشوو لە ناو پارتیدا نەیانتوانیوە خۆیان بگونجێنن و ئەو وەرچەرخانە فیكرییە بەسەریاندا نەهاتووە، تا لەگەڵ ئێستادا مامەڵە بكەن، ئەمانە وەك دروشمی باق و بریق بەكار دێنن تا گەنجەكان دەستەمۆبكەن، بەڵام تا ئێستا لە ئامانجەكانی گەنجان تێنەگەیشتون و ناشتوانن تێی بگەن؟
فازڵ میرانی: بە تێڕوانینی من پێویستە مرۆڤ ڕێز لە هەموو بیرو ڕایەك بگرێت، بەڵام كە ڕێزی لێ دەگریت، مەرج نییە خۆتی لەگەڵ رێكبخەیت، بەڵكو بە تێگەیشتنە ڕاستییەكەیەوە گفتوگۆی دەكەیت، ئێمەو ئەوان ئامادەین گفتوگۆ بكەین، نەخێر، ئێمە لەو ڕۆژەی لە ساڵانی 1952ــ1953 كە بیرمان لە دامەزراندنی ڕێكخراوەكانی یەكێتی ئافرەتان و قوتابیان و لاوان كردەوە، پارتی دیموكراتی كوردستان ئەوسا بیری لەوە كردبۆوە چۆن بیرو كەرەسەی نوێ پەیدا بكاتەوە بۆ بەردەوام بوونی ئەم حزبە، چۆن مرۆڤ ڕێگەیەكی دووری لە پێش بێت و پێداویستیەكانی ئەم ڕێگەیە دابین بكاتەوە، پارتی لەوساوە دەیزانی كاروانێكی دوورو درێژی لە پێشەو پێداویستییەكانی ئەم كاروانە، بەردەوام بوونی ئەم هێزو ڕێكخراوانە بوون، ئەوانە هێزی نوێن، ئەمە لەلایەك لە لایەكی ترەوە ئەگەر تەماشا بكەین، هەموو مێژوونووسانیش شایەتی بۆ ئەوە دەدەن كە پارتی لە هەموو كۆنگرەیەكیدا خۆی لەگەڵ تازە پێشهاتەكانی سەردەمەكەدا گونجاندوە، ئێمە لە 11 ئازار كە لە شاخ هاتبووینەوە، خۆمان لەگەڵ خەباتی شار گونجاندەوەو بەو حوكمە زاتییەو بەو تێگەیشتنەی كەلەو چوارچێوەیەی ئەوسادا هەبوو، لە دوای نسكۆ 1975 پارتی دیموكراتی كوردستان، تووشی بومەلەرزەیەكی كوشندە بۆوە، ئەگەر ڕابردوویەك و میتۆدێك وڕێبازێكی نەتەوایەتی نەبوایە كە خەڵكانێك لەگەڵ ئەم حزبەدا بوون، نە تەنیا لە دیدی ئیدیۆلۆژییەوە، بەڵكو لە دیدی نەتەوایەتییەوە لەگەڵی بوون، خەڵكانێكی زۆر لە ناو شۆڕش بوون ئینتیمای حزبییان نەبووە، پێشمەرگە هەبووە بە پلەی ئامر بەتەلیۆنی و پارتیش نەبووە، ئەندامی حزبیش نەبووە، ئەمە چ دەگەیەنێت، ئەمە ئەو هاوبەشە بەهێزە دەگەیەنێت لە نێوان پارتی و لە نێوان جەماوەردا هەبووەو، وای كردووە كەسانێك ئامادەبن خۆیان بكەنە قوربانی و ئەندامی ئەم حزبەش نەبن، كەواتە ڕێبازو میتۆدو پێڕەوو پرۆگرامی ئەم حزبە گوزارشت لە بەرژەوەندی و دیدی ئەو دەكاتەوە لە ڕوانینی نەتەوایەتییەوە، كەم حزب هەن بەرخورداربن لەم خەسڵەتەدا، حزبە ئیدیۆلۆژی و چینایەتییەكان وانیین، بەڵام پارتی دیموكراتی كوردستان حزبێكی دیموكراتی نەتەوەییە، لە مەسەلەی دیموكراتی و نەتەوەییدا خەڵكێك لەگەڵی جووت دەبێت بەبێ ئەوەی ئینتیمای بۆ بكاتەوە، ئەمەش بووە هۆیەك كە ئاوارەی ئێران بووینەوە لە دوای نسكۆی ساڵی 1975 نیو ملیۆن مرۆڤ دەربەدەر بوون، هەموویان بە تەنیا پزیشك و دادوەرو پارێزەرو ئەندازیارو جووتیارو كرێكارو مامۆستا و قوتابی و مەلای مزگەوت و قەشەو موسڵمان و مەسیحی و یەزیدی و كلدان و توركمان نەبوون و بەڵام لە هەمووشیانی تێدا بووە، ئەمە ئیستدلالی ئەوەیە، متمانەیەكە لە نێوان خاڵە هاوبەشەكانی جەماوەرو متمانەیان بە سەركردەكەی و ئامانجە پیرۆزەكانی كە بارزانی نەمر بووە، كەواتە ئێمە لەگەڵ ئەو حاڵەتە وتووێژ دادەمەزرێنینەوە، لە سەرتاسەری كۆنگرەكانی پارتیدا هەمیشە خوێنی تازەو خوێنی گەنج دێنە پێشەوە ئەگەر تەماشای ئەندامان و مەندوبینی كۆنگرەكانی پارتی بكەیتەوە هەمیشە 70%یان لەهێزی گەنجان و خوێندەواری ئەم جەماوەرو خەڵكەی كوردستان بوون، ئامارێكمان لە ڕێكخستن و لیژنەی ئامادەكاری كۆنگرە لەلایە دەتوانن خۆتان وەریبگرن تا بزانن ئەم حزبەی ئێمە چەند مامۆستاو دەرچووی زانكۆكان و مامۆستای ئایینی و مەسیحی و یەزیدی و ئاشووری و كلدان و توركمان و چەند ئافرەتی تێدا بووە، ئەمانە هەموویان ئیستدلالی ئەوەیە كە هێشتا خەڵكێك ڕوو لە پارتی دەكات، بەو میتۆدو بیركردنەوەیەی پێشان كە متمانەبەخشەو بەو كارەی كە ئێستا دەیكاتەوە، كەماڵیش تەنیا بۆ خودایە، كەسمان، كامل نین، هەر بڕیاردانێك لەسەر ناكاملی واتە كەموكورتی لە ئارایە، كەموكوڕی لە حزب و كارگێڕیدا هەیە، جاری وا هەیە لە ناو ماڵێكدا هەیە، بوێرێتی پەنجەلەسەردانانی كەموكوڕییەكان و دەستنیشان كردنیان خەسڵەتێكی بڕوا بەخۆكردنە لەلای مرۆڤ، ئەمەش دەگەڕێتەوە بۆ ئەو ڕابردووەی كە مرۆڤ بە سەرمایەی خۆی دەیزانێت و پێی لەسەر قایم كردووە، بۆ نموونە حزبێكم بۆ بدۆزەرەوە لە هەموو ڕۆژهەڵاتی ناوەراست وەك پارتی دیموكراتی كوردستان لە گەرماو گەرمی نسكۆیەكەی ساڵی 1975 هەڵسەنگاندنی بۆ خۆی كردبێتەوە، ئێمە هەڵسەنگاندنمان بۆ ئەرشیفەكردن نەكردووە، بەڵكە بۆ ئەوەی بەرەنگاری كەموكوڕییەكانی خۆمان ببینەوەو لە شۆڕشی تازەدا ڕێكخستنەكانی حزب پێكڕا لەسەر بنەمایەكی تازە سوود وەربگرینەوەو لە هەڵەكانی ڕابردوو پەند وەربگرین و دواتر بەردەوام بین لەسەر چاكییەكانی ڕابردوو.


گوڵان: لەنێو خەڵكدا كەسانێك رەخنەت لێدەگرن و دەڵێن هێندەی بەرگری لە پارتی دەكەیت، ئەوەندە بایەخ بەخەڵكی نادەیت، جاری وایە كە پارتی تووشی كارەساتێك دەبێتەوە یان دەخرێتە بۆتەی پیلانێكەوە، لێدوانەكانی بەڕێزتان زۆر توندن، هەربۆیە هەموو جارێك كۆمەڵێك تێڕوانین و فرە بۆچوون لەسەر قسەكانت دروست دەكەن، باشە بەڕێزت بۆ وا توندیت؟
فازڵ میرانی: لەسەر مەسەلەی توندی یان نەرمی، لە دیمانەكانمدا كەسانێك هەبوون دەستخۆشییان لێ كردوم، بە نموونە لە گەرماو گەرمی كێشەكانی نێوان پارتی و یەكێتی و ئۆپۆزسیۆن، دیمانەیەكم لەگەڵ زاگرۆس تیڤی كردوەو وتم پەیامی ئۆپۆزسیۆن دەرگای دانوستاندنی لەسەر ئێمە كردۆتەوەو ئێمە بە شتێكی باشی دەزانین، هەموویان بە ئۆپۆزسیۆنیشەوە دەستخۆشییان لە من كرد، بەڵام تەنیا خیتابێكی توند كە هەر باسی دەكەنەوە ئەوەیە كە لە 17ی شوبات كە پیلانڕێژی دانرابوو بۆ پەلاماردانی لقی چوار، من وتم ئەوەی دەستمان بۆ درێژ بكاتەوە، دەستی دەبڕین، نەموتووە دەچینە ناو ماڵی خەڵك و دەستی خەڵك دەبڕین، نەموتووە دەچینە لەسەر شەقام ڕادەوەستین و ئەوەی هەڵمەت ببات دەستی دەبڕین، وتم ئەوەی دەستمان بۆ درێژدەكاتەوە، نەك ئەوەی مەرحەبایم لێ بكات و دەستی ببڕم نا، بەڵكو ئەوەی شەقێكم تێهەڵدا یان گوللەم ئاڕاستە دەكات، كەس كچی خۆی قوربانی كوڕی خەڵك ناكات، ئەمە لە لایەكەوە لە لایەنێكی ترەوە بەرگری لە خۆكردن مافێكی ئیلاهییە، لە یاساكانی ئاسمانی و یاساكانی سەر زەمینیشدا بەرگری لە خۆكردن مافێكی سروشتییانەیە، تۆ لە ماڵی خۆت دانیشتوویت، وەك لە ئیسلامیشدا هاتووە و دەڵێت ئەوەی لەسەر ماڵ و موڵك و نامووس و دینی خۆی بكوژرێت شەهیدە، ئەفزەڵیەت دراوەتە خاوەن ماڵ، بەرگری لە خۆی بكات، تۆ بەرگری لەم شتانە بكە، گەر كوژرایت تۆ شەهیدیت، بەڵا لە خۆت دوور بخەوە، ئەگەر هەر لێت نەبۆوە، خۆت بەقوربانی ئەو شتانە بكە كە خودا فەرمانی پێ كردووە، نازانم بۆ ئەمە بەو شێوەیەو بەم تێگەیشتنە تەفسیر ناكەنەوە، دەڵێن بكوژانی 17ی شوبات (الشيء بالشيء یذكر)، ماكینەیەكی مەبەستداری ڕاگەیاندیان بۆ ئەمە دروست كرد، تەنیا ئەو كوڕە كە لەوێدا شەهید بووە، ئەگەر تەنیا شەهید ئەوە بێت كە لەبەردەرگای لقی چوار شەهید بووبێت ئەمە وایە، بەڵام ئەی ئەو مفەوەزەمان كە لە هەڵەبجە شەهید بووە یان ئەوەی لە كەلار شەهید بووە، ئەو ئەندامانەمان كە لە شوێنەكانی تر شەهید كراون، ئەی بە پێی وتەی وەزیری پێشمەرگە بێت ئەو دەیان سەربازو ئاسایشانەی كە چاویان لەدەست داوەو بوونەتە نابیناو كەمئەندام كراون، باشە ئەمانە كوڕی خەڵكی نین، بۆچی ئەمانە كەسێك نابێت بەرگرییان لێ بكات، بەلای ئەوانەوە ئەمانە قەینا هەرچییان لێ هاتووەو با لێیان بێت، تەنیا ئەوەی بەردەرگای لق باس دەكرێت، لیژنەی لێكۆڵینەوە كە چوو بوو، سێسەدو قسوور قەوانی فیشەكیان لەبەر دەرگای لق دۆزیبۆوە، لە دەرەوەی بارەگای لق، باشە، هەردەڵێن تەنیا هیوا ئەحمەد مستەفا تەقەی كردووەو ئەویش ڕێژوانی كوشتووە، ئەمە مەرامی سیاسەتەو مەسەلەی جینائییەت نییە، بەڵام كەسێك ناڵێت ئەرێ ئەم خەڵكە كە هاتن لە كوێوە تەقەیان لێ كرا، لەبەردەرگای ماڵی خۆیان بوون یان لە ناو بازاڕەوە یان لە باخەكەی پشتەوە یان لە ناو ئۆتێل، كەسێك ناڵێت، ئەرێ ئەمانە بۆ چوونە سەر لقی چوار، كەسێك ئەمە نادركێنێت چونكە دادپەروەری لەم مەسەلەیەدا نییە و ئەم مەسەلەیە بەسیاسی كراوە و جینائی نییە، پارتە سیاسییەكان هەمووان ئەوە دەزانن گەر مەبەستیان بێت جاری وا هەیە دەزانن چۆن كەسێك لە پارتێكی تردا بكەنە ئامانج و دەشیكەن، ئەو ڕۆژەی كوردایەتیمان ناسی و پارتی و سەرۆك بارزانیمان هەڵبژارد ئەو ڕۆژە نەماندەزانی دەبینە سەركردە یان لە ژیان دەمێنینەوە، بەڵام بە ئەكیدی دەمانزانی كە دەبینە ئارمانجی دوژمنانی كوردستان، هەروەها زۆر شت هەیە لە ڕۆژنامەكانەوە لە دەرهەق من دەووترێت، سەبارەت بە جووتیارەكانی شارەزوور، من دەزانم ئەو هەڵایە خودی جوتیارەكانی شارەزور نین، خۆ دەكرێت بڵێم جووتیاری زاخۆ، تەفسیرەكەی من وا نییە بڵێم ئەوانە نەزانن، ئەوەتا دوو سێ ئەندامی سەركردایەتیمان لە كوڕە جووتیارانی شارەزوورن، خۆشم كوڕە جووتیارێكم، بەڵام ئەوەی لە نزیكتری سلێمانییە دەزانێت چی لە سلێمانی هەیە، دەزانم جووتیارانی شارەزوور كۆنەبوونەتەوە تا بیرخەرەوەیەك بدەن بڵێن فازڵ میرانی داوای لێبووردنمان لێ نەكات فایلەكانی 2005و ئەنجوومەنەكانی جووتیاران هەڵدەدەینەوە، ئەگەر لەسەر ئەوە بێت دنیاش خراپ بێت، پۆزش ناهێنمەوە، بەڵام من بێ منەتم، ئەوانەی هانیان دەدەن بێ منەتم لێیان با فایلەكانی جەمعیاتی 2005 دەربێنن، لە زاخۆ تا خانەقین، من بێ منەتیان دەكەم، ئەگەر یەك تایەی تراكتۆر، ئەگەر یەك عارەبانە، ئەگەر یەك تەن تۆو ئەگەر یەك كەوچك پەین لە جەمعیاتی جووتیارانم وەرگرتبێت، ئەوسا لە خانەقین تا زاخۆ پۆزش بۆ هەموو جووتیارانی كوردستان دێنمەوە، بەڵام بەلای كەسێكی ناپاكەوە وا نیشان دەدرێت كە هەموو كەسێك ناپاكە، ئەگەر شانازی بە هیچی خۆمان نەكەین بە فایلی خۆمان شانازی دەكەین چونكو ئەسڵەن فایلمان نییە، لەبەر ئەوە لای من گرنگە دڵی خەڵك ڕابگرین، بەڵام هەر وەختێك گەیشتمە ئەوەی پێ لە بەرژەوەندی نەتەوایەتی و نیشتمانیەكانی پارتی بنێم، لە پێناوی ڕەزامەندی هەندێك خەڵك، ئەوە دەرگای خیانەتە لە پارتی و ڕێبازی خۆم، لەبەر ئەوە لە ڕێبازی خۆم خیانەت ناكەم، خیانەتیش بە هەموو شێوەكانیەوە لە فەرهەنگی مندا نییە..


گوڵان: هەموو ئەندامانی سەركردایەتی قسە دەكەن، بەڵام بۆچی كە جەنابت قسە دەكەی قسەكانت دەخەنە ژێر زەڕەبینەوە، بۆ نموونە ئەوەی دەربارەی كاك نێچیرڤان یان ئەوەی كە پارتی 30 هەزار چەكداری هەیە لە كاتێكدا تۆ سكرتێری حزبیت و مافی خۆتە بەرگری لە پارتی بكەی، بۆچی بەو زەڕەبینەوە قسەكانت لێكدەدەنەوە؟
فازڵ میرانی: خوای گەورە دەفەرمووێ (أتأمرون الناس بالبر وتنسون أنفسكم وأنتم تتلون الكتاب أفلا تعقلون) ئەم خەڵكانەی وادەڵێن، دەڵێت خەڵكێك نییە دەمی ئەم برادەرە بگرن و زۆری ترم لەو بوارە خوێندۆتەوە، باشە بۆچی بۆ هەموو دنیا ئازادی رادەربڕین هەبێت بۆ فازڵ میرانی نەبێت؟ من لەم كۆمەڵگایە نیم، منیش مرۆڤێك نیم، ئەمە رای منە پێتناخۆشە، بەڵام ناكرێ پێشوەختە پێم بڵێی تۆ مافی ئەوەت نییە رای خۆت دەرببڕیت، من بەرامبەر بە كاك نێچیرڤان رای خۆم دەبڕیوەو پێشم وتووە ئەمە رای منەو نازانم تا چ ڕادەیەك حزبی من ئەمە قبوڵ دەكات یان نا، وتومە ئەگەر بارودۆخەكان لەبار نەبن حەق نییە ئێمە موغامەرە بە كاك نێچیرڤان بكەین، بۆ هەژدە مانگی حوكمڕانی، برای بەڕێزم كاك عەبدوڵڵای مەلا نوری وابزانم لە لیستی گۆڕانە، لە پەرلەمانی كوردستان وتی: چۆن دەكرێت سكرتێری مەكتەبی سیاسی بڵێ من موغامەرە بە ئەندامێكی سەركردایەتی خۆم ناكەم بۆ مەسەلەیەك كە نەتەوەییەو پێوەندی بە حكومەتەوە هەیەو مەسەلەی وڵاتێك و میللەتێكە، دەبێ پارتی باشترین كەسایەتی خۆی تەرخان بكات بۆ ئەم ئەركە، وتم بە قوربانی چاوەكانت بم، من چاوەڕێی ئەم قسەیەم لێت دەكرد، دە باشە ئێوەش بڵێن، ئێمەش پشتیوانی ئەو كەسایەتییە گرنگەی پارتی دەكەین بۆ ئەوەی مەسەلە نەتەوایەتی و حكومەتەكەی خۆمان بەڕێوە بەرینەوە، لەلایەكەوە داوای ئەركم لێدەكات و خۆی لێ بە دووردەخاتەوە، بەڵام كە دێتەوە سەر ماف داوای مافم لێدەكاتەوە، ئەمە (صبق الاصرار)ی تێدایە، یاریی سیاسەتە و سیاسەتێكی زانستی نییە، ئەگینا هەموومان ئەرك و مافمان هەیە، بەڵام كە باس لە ئەرك دەكەن تەنیا پارتی و یەكێتییە، كەچی كە دێنە سەر ماف دەڵێن هەموومان مافمان دەوێ، ئەمە سیاسەتی (بە رەش لە قەڵەمدانی هەموو شتێكە) و یەكێك لە گرفتەكانی ئێمە و ئۆپۆزسیۆن ئەوەیە، نە ئێمە هەموو شتێكی ئۆپۆزسیۆن وەردەگرین بە باشەكانیشیانەوەو ئەوانیش هەموو شتێكی ئێمە بە رەش دەبینن وئەمە لە كۆمەڵگایەكی پێگەیشتوودا كە حزبی سیاسی تێگەیشتوو و پێگەیشتووی هەیە فەرهەنگێكی مەقبول نییە، خۆشیان باش ئەمە دەزانن، چونكە ئێمە و ئەوان كوردین و بۆ كوردستان و سەركەوتنی ئەزموونەكە كار دەكەین، جا ئیدارەكە هی ئێمە یان هی گۆڕان یان یەكێتی یان یەكگرتوو بێت، بەڵام حكومەت و وڵاتەكە هی هەموومانەو هەموومان یەك نەتەوەین، كەواتە هەرچی باشە بۆ ئەم ئەزموونە، ئینجا سەرچاوەكەی لە ئۆپۆزسیۆن بێت یان لە حوكمڕان، حەقە دانی پێدابنێت و بڵێت ئەمە باشە بابیكەین.
ئێستا وا خەریكی پێكهێنانی حكومەتێكی تازەین كە كابینەی حەوتەمەو هەمووتان پێتان باش بوو نێچیرڤان بارزانی سەرۆكایەتی حكومەت بكات، كەواتە وەرن با پشتیوانی لێ بكەین و وەرن بەیەكەوە پرۆژەی گۆڕان و كۆمەڵ و یەكگرتوو و پرۆژەی حزبی شیوعی و پرۆژەی سۆسیالیست ئینجا پرۆژەی پارتی و یەكێتی و پرۆژەی هەڵبژاردنی لیستی هاوپەیمانی كوردستانی كە بەدیدی من شمولیەتێكی تێدایە، واتە خاڵی هەموو لایەنەكانی تێدایە، وەرن با بیكەین بە پرۆژەیەكی نیشتمانی و بەرنامەی حكومەت، ئێمە هەموومان لەو حكومەتە بەشدار بین تا ماوەكە تەواو دەبێت و هەڵبژاردنی نوێ ئەنجام دەدرێت، بۆ ئەوەی یەكڕیزی خۆمان لە بەرامبەر عێراق و دەوروبەر و رووداوەكانی ناوچەكە بپارێزین، ئایا ئەمە ئەركی هەموومان نییە؟ كە ئەمە ئەركی هەموومان بێت دەبێت مافەكانی خۆشمان مسۆگەر بێت لەم دەسەڵات و حكومەتە و پاراستنی ئەم ئەزموونەیە، بەڵام ئێمە لەگەڵ ئەوەدا نین خەڵكانێك بڵێن ئێمە چاودێریتان دەكەین، بڕۆن كار بكەن، ئەگەر باش بوو بێدەنگ دەبین، بەڵام ئەگەر خراپ بوو، خەڵك دەهێنینە سەر بارەگاكانی ئێوە، بە بۆچوونی من ئەمە نە دادپەروەری تێدایە تەنانەت لە پێگەیشتنی عیلمانیەت و ئیسلامیشدا ئەمە نییە، من زۆر جار بە برایانی یەكگرتوو و كۆمەڵیش دەڵێم: ئێوە حزبی ئیسلامی سیاسین، بەڵام ئێوە بە لایەنی كەمەوە دەبێ هەندێك لە مەنهەجەكەتان مستمد بێت لە شەریعەتی ئیسلامەوە، لە فەرموودەیەكی صەحیحدا پێغەمبەرمان دروودی خوای لەسەر بێت دەفەرمووێت:( ویل لامە لا تقول للمحسن احسنت و لا تقول للمسیء اسأت) كەواتە ئیسحانەكەی پێشخستووە، ئێوە كە رەخنە لە حكومەت دەگرن ئەركی ئیسلامیی ئێوە و ئەركی نەتەوەیی ئێمەیە،پێویستە سەرەتا باس لە چاكەكانی حكومەتی خۆمان بكەین پاشان رەخنە لە خراپەكانیشی بگرین، چونكە پرسیار ئەوەیە ئایا ئێمە دەمانەوێت ئەم ئەزموونە بمێنێت یان بڕووخێت؟، ئەگەر دەمانەوێت بمێنێت كەواتە دەبێ باس لە چاكەو راستییەكان بكەین، بەڵام كەموكوڕییەكانیشی بخەینە پاڵ بۆ ئەوەی هەر هیچ نەبێت خەڵكانێك بڕوامان پێ بكات،
من ئەم قسانە دەكەم جا خەڵكێك پێی خۆشە ماڵیان ئاوا بێ و خەڵكێكیش پێی ناخۆشە دیسان ماڵیان ئاوابێ، بەڵام من بڕوام بە ئازادی ڕا دەربڕین هەیە، چۆن خەڵكێك هەیە باسم دەكات ئەو مافیشم پێ بدەن بەرگری لە ئەزموونەكەم و حزبەكەم بكەم.


گوڵان: رەخنەیەكی دیكە لە جەنابت دەگیرێت، ئەویش ئەوەی كە لەوەتەی ئێوە سكرتێری پارتین هەمیشە حەز دەكەن هەموو خەڵك ببێت بە پارتی، واتە لە بری ئەوەی پارتی بچێتە ناو خەڵكەوە، حەز دەكەیت خەڵك بچێتە ناو پارتی، وەڵامی بەڕێزتان بۆ ئەمە چییە؟
فازڵ میرانی: من حەز ناكەم هەموو خەڵك ببێتە پارتی، چونكە رۆڵی سەركردایەتی نامێنێت، پارتی سەركردایەتی میللەتێك دەكات ئەگەر میللەتەكە هەمووی بوو بە پارتی سەركردایەتی كێ بكات ئەمە ناكرێ و نەبووە، حزبە كۆمۆنیستەكان و حزبی بەعسیش لەوەدا سەرنەكەوتن و ئەگەر پارتی و یەكێتی و حزبەكانی دیكەش ئەو هەوڵە بدەن ئەوانیش سەركەوتوو نابن، چونكە حزب نوخبەیەك سەركردایەتی دەكات، بەڵام دۆست و لایەنگر پەیدا دەكات، سیاسەتێكی راست و دروست و بەرنامەیەك ئامادە دەكات كە خەڵكانێك پشتگیری و لایەنگری بكەن ئەمە لە لایەك، لە لایەكی ترەوە هەموو كەسێك حەز دەكات حزبەكەی گەشە بكات، ئەگینا تۆ چۆن بەرپرسی حزبی خۆتی، تۆ بڵێی ئێمە ناچینە ناو خەڵك با خەڵك بۆ لای ئێمە بێت، لە راستیدا ئەمە رەخنەیەكی پارتیانەیە زیاتر لەوەی رەخنەی خەڵكی غەیرە پارتی بێت، زۆر جار دەگوترێ كە سەركردایەتی ئێمە نایەنە ناو جەماوەر، من هەمیشە بە بەرپرسی لقەكان و پارێزگار و وەزیری ناوخۆ و پەروەردە و بەشێك لە قایمقایمەكان دەڵێم ئێوە ئەندامی سەركردایەتی نین؟ بەڵام ئەمانە مەبەستی سەرەكییان لەسەركردایەتی جەنابی سەرۆك بارزانی و كاك نێچیرڤانە، خۆزگە ئەمانەش دەرفەتیان هەبوایە دێ بە دێی كوردستان گەڕابان، كاتی خۆی كاك ئیدریسی هەمیشە زیندوو لەگەڵ سەرۆك مسعود بارزانی كارەكانی بارزانی نەمریان رادەپەڕاند، بەڵام خەڵك بە ئەوانیش رازی نەدەبوون، خوای لێخۆشبێت مەلا بێبەش و مەلا حوسێنی ماروزی لە شنگاڵ دەهاتن و تەنیا بە بینینی بارزانی نەمر ڕازی دەبوون، بارزانی نەمر دەیوت: ئەگەر كەسێكی لە من سەرووتر هەبوایە بە منیش رازی نەدەبوون، ئەمە یەكێكە لە خەسڵەتەكانی میللەتی ئێمە. رەخنەی دووەم ئەوەیە گوایە ناچینە ناو خەڵك، من دەڵێم با بەرپرسەكانی هەولێر لە پارتی و یەكێتی و حزبەكانی تریش با بێن بزانن خەڵكی هەولێر من زیاتر دەناسن یان ئەوان یان خەڵكی هەولێر زیاتر من دەناسن یان ئەوان؟ ئەمە نیشانەی تێكەڵاوییە لەگەڵ خەڵك، بەڵام ئەگەر مەبەستیان ئەوە بێت ئێمە بچین ماڵ بە ماڵ بگەڕێین خۆزگە ئەو دەرفەتەمان هەبووایە هەر هیچ نەبێت مرۆڤ بتوانێت وڵاتەكەی خۆی بناسێت، یەكێك لە ئاواتەكانی من ئەوەیە هەموو كوردستان ببینم و لە نزیكەوە شارەزای دابونەریت و جوگرافیای وڵاتەكەم بم، زۆر گوێمان لەمە بووەو گوێمان لێدەبێتەوە، حەقانییەكەی حەقەو لە تێگەیشتنی ئەم حەقە جیاوازی هەیە لە تێگەیشتنی ئێمە و ئەوان، بزانە ئێستا چەند لە ئەندامانی سەركردایەتیمان لە هەولێرن (كاك كەریم، كاك سەفین، كاكەمین، كاك نەوزاد، كاك پشتیوان، كاك عەلی حوسێن، كاك ئەحمەد كانی، كاك رێبوار، كاك ساسان، چنارخان) ئەمانە هەموو لە شاری هەولێرن كەواتە چۆن دەڵێن ئەندامانی سەركردایەتی لە ناو خەڵك نین، ئەمانە تەنیا لە ناو شارن، لە نزیك هەولێر دكتۆر ئاراس و لە مەخمور كاك نەجات عەلی لێیە، وەك وتم مەبەستیان لە سەركردایەتی سەرۆك بارزانی و كاك نێچیرڤان و كاك مەسرورە بچنە ناو خەڵك، ئەمە مافی خەڵكە، چونكە ئەمانە مەرجەعی ئێمەن و خەڵك مەرجەع بە سەركردایەتی دەزانن، بەڵام حەق نییە لە پێناو بینینی ئەمانە ماندووبوون و وجودی كەسانی تر لە سەركردایەتی كە زەحمەت دەكێشن نادیدە بگرن، ئەمەش نادادپەروەرییە.


گوڵان: بەڵام خەڵك دەڵێن ئەگەر ئەندامانی سەركردایەتی پارتی لەناو خەڵك بن، ئەوان قسە دەكەن و خەڵك گوێ دەگرێت، ئایا كاتی ئەوە نەهاتووە، خەڵك قسە بكات و ئەندامانی سەركردایەتی گوێ بگرن؟
فازڵ میرانی: ئێمە لە كۆڕەكان و كۆبوونەوەكانی حزبیدا گوێ لە خەڵك دەگرین و قسەیان بۆ ناكەین و پێم باشە لەمەودوا پەنەڵێك لە تەلەفزیۆنەكاندا بكرێتەوەو خەڵك قسە بكەن، ئەگەر هەفتانە بەرنامەیەكی ئاوا هەبێت لە پرسیارەكانی خەڵك تێدەگەیت، بەڵام ناتوانین ماڵ بە ماڵ بگەڕێین، چونكە لق و ناوچە و رێكخراو و حكومەت و ئیدارەمان هەیە رەخنەو داواكارییەكانی خەڵك لە رێگای ئیدارییەوە دێت، ئەمە یەكێكە لە مەسەلەكان كە خەڵك دەیەوێت لە لایەك هەموو شتەكان بخاتە دەست حزب و لە لایەكی دیكەشەوە دەڵێ بۆچی حزب دەست دەخاتە نێو كاروباری حكومەت، بۆ نموونە كەسێك كارێكی لای پارێزگار یان قایمقایم یان بەڕێوەبەری ناحیە هەبێت بۆچی بچێتە لای بەرپرسی لق یان ناوچە یان كۆمیتە، ئەمە هێشتا خۆ ئازاد نەكردنە لە سیستمێكی كۆن و لێك تێنەگەیشتنە، من كە لە حكومەتیش بووم هەمیشە دەمگوت هاووڵاتی ئێمە بەتایبەتی پارتی و یەكێتی بە ئاسانی فێرە حكومەتیی نابێت، چونكە لەبەر ئەوەی ئینتیمای حزبی هەیە دەیەوێ بچێتە لای وەزیری ناوخۆ یان پارێزگارو دەڵێ عەریزەیەكم بۆ بنووسەو دەچێتە لای بەڕێوەبەری دیوان و عەریزەكەی بۆ چاپ دەكرێ و دەچێتەوە لای وەزیر و بۆی ئیمزا دەكات و دەیخاتە گیرفانی و دەگەڕێتەوە، لە هیچ شوێنێكی دنیا ئەم شتە نییەو ئێستا حكومەتی ئەلیكترۆنی هەیە، بەڵام دەبێ واز لەم جۆرە رەفتارانە بهێنین.


گوڵان: بەرێزت وەك سكرتێری مەكتەبی سیاسی پارتی بۆچی لە هۆڵێكی وەك هۆڵی شەهید سەعد عەبدوڵڵا كەسایەتییەكانی هەولێر لە مامۆستایان و قوتابیان و كاسبكاران نزیكەی 2 تا 3 هەزار كەس كۆناكەیتەوەو گوێیان لێبگریت، بۆچی تا ئێستا كاك فازڵ لە شوێنێكی ئاوادا نەچووە بڵێ من قسەم نییە بۆتان و تەنیا هاتووم گوێ لە ئێوە بگرم؟
فازڵ میرانی: راستە بەس گوێ گرتن لە خەڵك ئەمەمان نەكردووە، ئێمە سەركردایەتییەكمان لە هەولێر هەیەو پێموایە كاك عەلی حوسێن كارێكی وایكردووە و گوێ لە خەڵك دەگرێت لە جیاتی قسە كردن بۆیان و پێی وتوومە ئامادەی تۆش بێی گوێ لە خەڵك بگریت؟ منیش وتوومە هەر كاتێك خەڵك كۆ بكەیتەوە من ئامادەم بێم گوێ لە قسەكانیان بگرم و وەڵامی پرسیارەكانیان بدەمەوە لە جیاتی ئەوەی قسەیان بۆ بكەم و ئەمە بیرۆكەیەكە، كاك عەلی لە هەولێر جێبەجێی كردووە، دەستخۆشی لێدەكەم و داوا لە من دەكات منیش بیری لێدەكەمەوە لە هەولێرو هەر شوێنێكی دیكە بیكەم.
ئێمە باس لە چاكسازی دەكەین، چاكسازی لە بیركردنەوەیەكی چاكسازی لەكەسێكی چاكخوازەوە (صالح) دروست دەبێت، ئیتر دەبێت بیرۆكەیەك لە نێو كۆمەڵە كەسێكی موسڵیح و بزووتنەوەیەكی چاكسازی دروست بێت و مومكینە بیرۆكەیەكی چاكسازی لە كەسێكی نا ساڵحەوە درووست بێت، بەڵام مومكین نییە كەسێكی نا ساڵح ئیسڵاح بكات.


گوڵان: جەنابت زیاتر لە 40 ساڵە لە رێبازی بارزانیدا خەباتت كردووە وەك پێشمەرگە و قوتابی و پەیڕەوی رێبازی بارزانی و هاوتەمەنی كاك ئیدریس و سەرۆك مسعود بارزانی و ئێستاش سكرتێری مەكتەبی سیاسی پارتیت، ئەگەر رێبازی بارزانی دابنێین بە رێبازی خەڵك و هەرچی كردووە بە قسە و راوێژی خەڵكی كردووە، ئێستا سكرتێری مەكتەبی سیاسی پارتی دیموكراتی كوردستان ئەم رێبازە چۆن پێناسە دەكات بۆ نەوەی تازە؟
فازڵ میرانی: ئەگەر بارزانی نەمر لە ژیان بوایە وەك چۆن رێبازی خۆی بە ئێمە نیشانداوەو ئێمە شوێنی كەوتووین دەیتوانی لە ئێمە باشتر نیشانی بدات، بەڵام دیسان لەوانەیە كەسانێك بە قسەكانی من بڕەنجێن، ئێمەمانان خۆمان وەكو دەستمان پێكردووە، بەو رێبازەوە پابەند نەبووین، بۆ نموونە كەسێكی موسڵمان لە سەردەمێكدا لە یەكێك لە فەرزەكانی ئایینی ئیسلام دووردەكەوێتەوە یان لە كاتی سەفەردا قەصر و جەمع دەكات، خەڵكانێك تەماشای ئێمەی نەوەی كۆنی پەیڕەوانی رێبازی بارزانی دەكات و دەبینە نموونەیەكی سلبی بۆ رێبازەكەی بارزانی و ئەوەی كە من دەیڵێم تەنیا وەفایەكە بۆ رێبازەكە، چونكە بە دیدی من ئەو رێبازە خەڵكێكی كۆ كردەوە، رێبازی چۆك دانان بۆ خەڵك و دادپەروەری و وەكو خەڵك ژیانە، لە بادینانەوە تفەنگ هەڵگرە بۆ پێنجوین و قەرەداغ و شەڕی توركیا و عێراق بكە و ڕوو لە رووسیا بكە و بگەڕێوەو جارێكی دیكە حزب و ڕێكخستنەكان دروست بكەوەو شۆڕش بەرپا بكەوە سەرەڕای ئەمەش رۆژێك لە رۆژان نەیوتووە من سەرۆكی حزبم و بە خەڵكیشی نەوتووە ببە بە پارتی، بەڵكو دەیوت كوردی باش پارتییە و هەموومان دەبێ كوردی باش بین باسی لە مەزڵومییەتی كورد دەكرد، نەیدەوت مەزلومییەتی پارتی، تفەنگەكەی بڕنۆ بووەو جلوبەرگی وەكو هی خەڵك بووەو خواردنیشی هەر لەگەڵ خەڵك بووە، ئەمە دەروێشی پەیدا كرد نەك تەنیا پەیڕەو، هەندێك لەم دەروێشانە ئێستاش ماون، بەڵام ژمارەیان كەمەو زۆرینەیان لەو پێناوەدا شەهید بوون بەتایبەتی ئەو نەوەیەی یاوەری بوون بۆ یەكێتی سۆڤیەتی پێشوو كە لەو 500 كەسە تەنیا 43یان لە ژیاندا ماون، لە بواری كوردایەتیدا كادیر و ئەندامانی حزب پەیڕەوانی ئەم هێڵەن، بەڵام ئەم هێڵە تەنیا كوردایەتی نەبووە بەڵكو لۆژیكێك بووە، لە بیركاری لۆژیكێك هەیە بۆ بیردۆز دواتر دێ شیدەكاتەوە، لە لۆژیكەكە ئێمە هەموومان پەیڕەوانی ئەم رێبازەین، بەڵام ئەگەر بێین بیردۆزەكە شیبكەینەوە بەرەو خوارەوە بچین ئێمە ناگەینە ئەو ئەنجامە نەگۆڕەی لە بیركاریدا هەیە، ئەمەش داخێكی گەورەیە و یەكێكە لەو گرفتانەی كە كەسانێك لێكدانەوەی هەڵەو جیاواز بۆ رێبازەكە دەكەن، بەشێكی هەر لە سەرەتاوە دژی بووەو بە هەر هۆكارێك بووبێت كە هۆكارەكان زۆرن، بەشێكی لەگەڵی بووەو لێی دابڕاوە، بەشێكیش لێی تێنەگەیشتووەو ئێستاش تێینەگەیشتووە و ئەمەش هەڵەی رێبازەكە نییە بەڵكو هەڵەی ئەوانەیە كە رێبازەكە شیدەكەنەوەونەیانتوانیوە قەناعەت بە خەڵكێك بهێنن و پێیان بڵێن بەڵێ ئەمەیە جەوهەری رێبازەكە، یەكێك دەڵێت (س) یەكسانە بە یەك و یەك دەڵێت(س) یەكسانە بە دوو، ئەمە گرفتەكەی ڕێبازی بارزانییە لەبەر ئەوە رێبازی بارزانی نەمر لۆژیكێكی یەكجار گەورەیە، بەڵام لە شیكردنەوەیدا ئەنجامی جیاوازی هەیە، هەر ئەمەشە گرفتی ئەم رێبازە، ئەگینا رێبازی بارزانی لە جەوهەری مرۆڤایەتی و نەتەوەیی و خۆراگری و دادپەروەری كۆمەڵایەتییەوە رێبازێكی یەكجار پیرۆزە، لە سەركردایەتی كردنی بارزانیدا لە شۆڕشی ئەیلوول كاروانچی و بازرگانەكان لە زاخۆوە دەهاتن بۆ ئێران و دەچوونەوە چەكیان پێ نەبوو ......
ئەگەر ئۆتۆمبێلت لە گەلی عەلی بەگ لێ تێك دەچوو، دەهاتیە هەولێرو فیتەرت دەبردو دەتدیت ئۆتۆمبێلەكەت وەكو خۆیەتی، بەڵام ئێستا بەو هەموو ئەمن و ئاسایشەو هێز و پۆلیسی هاتوچۆیە ئەگەر ئۆتۆمبێلەكەت لە ڕێگای نێوان هەولێرو سەڵاحەدین ڕابگریت تا دەگەڕێیتەوە دەبینی جامی ئۆتۆمبێلەكەتیان شكاندوەو تایەی سپێرەكەی پێوە نەماوە، كەواتە پەیڕەوانی ڕێبازەكە جاران مولتەزیمتربوون و ڕێبازەكە بڵاوتربوو، بەڕاو بۆچوونی من ڕێبازی بارزانی ئەگەر شرۆڤەی بكەنەوە ئەبێتەوە سەرچاوەیەكی ئیلهامبەخش بۆ شانازی كردن بەنەتەوایەتی كورد هەستكردن بەستەم و بەرەنگاربوونەوەی ستەم و وەدیهێنانی دادپەروەری ناو كۆمەڵگاو پێكەوە ژیانی نەتەوەیی ئایینی و ئاینزاكان، هەمووی ئیلهام بەخشن و لە چوارچێوە و لە سەرچاوەكەیەوە كە لە ڕێبازی بارزانیدایە دێت .


گوڵان: ئێستا ئێمە چۆن ئەو ڕێبازە بكەینەوە بە سەرچاوەیەك كە نەوەی نوێ ئیشی لەسەر بكات، جەنابت فەرمووت ڕێبازی بارزانی بریتییە لە سێ شت: دادپەروەری كۆمەڵایەتی و یەكڕیزی و ئینتیما، چۆن ئەمە خوێندنەوەیەكی بۆ بكەین بۆ ئەوەی ئەو ئیرادەی خێرە زیندوو بكەینەوە؟
فازڵ میرانی: قورئان شتێكی پیرۆزە، خوێندنەوەی قورئان خۆشە، بەس من قورئان بخوێنمەوە و مەلا كاوە قورئان بخوێنێتەوە كامەی خۆشترە؟ دەنگی مەلا كاوە خۆشترە، كەواتە ئەو ڕێبازە دەنگ خۆشێكی دەوێت.


گوڵان: با بێینە سەر بابەتی كابینەكەی نێچیرڤان بارزانی كە جەنابتان یەكێك بوون لەوانەی كە لێدوانی وردت لەسەردا و باسی ئەوەت كرد كە دەبێت حكومەتەكەی نێچیرڤان بارزانی حكومەتی خەڵك بێت، جەنابت وەكو سكرتێری مەكتەبی سیاسی پارتی دیموكراتی كوردستان مەبەستت لە حكومەتی خەڵك چییە ؟
فازڵ میرانی: پێشەكی حكومەت، حكومەتی نێچیرڤان نییەو حكومەتی دكتۆر بەرهەمیش نییەو حكومەتی پارتی و یەكێتیش نییە، بەڵكە ئیدارە هی ئەوانە، حكومەت هی میللەتە و حكومەت هی هەرێمی كوردستانە، لە ئەمریكاش دەڵێن ئیدارەی بۆش و ئیدارەی ئۆباما ناڵێن حكومەتی بۆش یا ئۆباما، كە دكتۆر بەرهەم ڕۆیشت خۆ حكومەتەكەی لەگەڵ خۆی نەبرد، یا لە كابینەی پێنجەم كە كاك نیچیرڤان ڕۆیشت خۆ حكومەتەكەی لەگەڵ خۆی نەبرد، بۆ نەیبرد چونكە حكومەتەكە هی ئەو نییەو هی هەموو میللەتەو هی ئەم كوردستانەیە، پێمخۆشە ئەو دەستەواژەیەو ئەو تێگەیشتنە لە ڕاگەیاندنی ئێمە وا باس نەكرێت و بەو قسەیەی من هەندێك لە برادەرانی یەكێتی بە هەڵە تەفسیریان كردو وتیان ئەدی حكومەتی پێشتر، وتم حكومەتی كابینەی پێنجەمیش هی میللەت نەبووەو كابینەی شەشەمیش هی میللەت نەبووەو بۆ ئەم حكومەتە هەوڵدەین كە هی میللەت بێت، ڕوانینی من بۆ حكومەتی میللەت ئەوەیە بەشێوەیەكی فراوان نوێنەری خەڵك لەم حكومەتە دابنرێت و ئەمڕۆ نوێنەری خەڵك زۆربەی هەرەزۆری پارتە سیاسیەكانە، جگە لە نەتەوەكانی كلدان و ئاشوری و توركمان و ئاین و ئاینزاكانی كە هەنە، بەس پارتەكانی تر تەیاری ئیسلامی و چەند حزبێكی ترن و تا ئەو پارتانە لەو حكومەتە بەشداربن بنكەی ئەو حكومەتە لەناو میللەتدا فراوانتر دەبێت، بەڵێ كابینەی پێنجەم لە شەشەم نزیكتربوو حكومەتی هاووڵاتی بوو، چونكە یەكگرتوو كۆمەڵی ئیسلامیش لە حكومەتەكەدا بەشداربوون، ئەوەندەو سەدی ئەوەندە دەنگیان هەیە، واتە ئەمە ڕێژەیەكی ئەو میللەتەیە لە ناو حكومەتدا بەشدارن، كەواتە تا ئەو ئەحزابانە بەشداربن لە حكومەت تا بنكەی فراوانی هەبێت لە میللەت نزیكترەو میللەتی بێ حزبیش نییە وەكو لیبیا بڵێت حوكم حوكمی جەماوەرییە، نەخێر، ئەوە ڕوانینی منەو ئێستاش من دەیڵێمەوە ئەو حكومەتەی دەبێتە حكومەتی هاووڵاتی، یەكەم بەرژەوەندیەكانی هاووڵاتی دابین بكات و خواستەكان و مەرجەكانی بپارێزێت، دادپەروەری ئەوەیە بەرنامەی خزمەتگوزاریی جێبەجێ بكات كە ئەویش ئەمانەن: یەكەم ئاسایشی خەڵك بپارێزێت كە ئاسایشی ناوخۆو دەرەوەیە، دووەم: بژێوی خەڵكە، و خواش دەفەرمووێت ( لایلاف قریش ایلافهم رحلە الشتاء و الصیف فلیعبدو رب هذا البیت الذی أطعمهم من جوع وأمنهم من خوف) تەماشا بكە دوو شتی سەرەكیین كە ئیمانی پێ دێنێت، ئیمان بەكێ دێنێت، ئیمان بەوە دێنێت كە ترسی لە ناو بردووە و ژیانی دابینكردووە و (اطعمهم من جوع) ئەوە ئەمڕۆ ئەوەنییە تەنیا نانی بۆ دابین بكەیت، بەڵكو ئەمڕۆ ئەوە نان و دەرمانەو خوێندنەو ڕێگاوبانەو فڕۆكەخانەیەو بیمەیەو كشتوكاڵەو خزمەتگوزاری كۆمەڵایەتییەو نەهێشتنی گەندەڵی و بێكارییەو . تاد، ئەمە هەمووی لە دەرگای بژێوی ژیانی مرۆڤەوە دێت و هەر هەمووی لە كارو ئیش و گرنگیەكانی ئەو حكومەتەیە، ئەگەر تەماشا بكەین هەر هەموو ئەوانە لە بەرنامەی هەڵبژاردنی لیستی هاوپەیمانی كوردستانی هەیە، من دەڵێم بەو شێوەیە ئەو كابینەی حەوتەم كە كاك نێچیرڤان سەرۆكایەتی دەكاتەوە دەبێت پڕۆژەیەكی نیشتمانی هەبێت و ئەو پڕۆژەی نیشتمانی بكاتەوە بە بەرنامەی حكومەتەكەدا، پڕۆژەی نیشتمانی پڕۆژەی چاكسازی ئۆپۆزسیۆنەو پڕۆژەی پارتی و یەكێتییەو پڕۆژەی پەرلەمانی كوردستانەو خواست و گلەییەكانی خەڵكە، ئەمانە هەمووی لێك بداتەوەو بەرنامەیەك و پڕۆژەیەكی نیشتمانی لێ دروست بكاتەوە، بەڵام یەكێك لە ئەولەویاتی پڕۆژەی نیشتمانی ئاشتبوونەوەیەكی نیشتیمانیمان پێویستە، ئەگەر برایانی ئۆپۆزسیۆن بێنە ناو حكومەتەوە، ئەمە دەرگایەكی گەورەیە بۆ ئاشتبوونەوەی نیشتمانی و مرۆڤ بێ ئومێد ناژیێت، بەڵام كاتێك نەهاتن من لەگەڵ ئەوەدام تا ئاستی مومكینە دەست و سینگمان لەگەڵیان كراوەبێت بۆ ئەوەی ئەو ئەزموونە بپارێزین، بۆ؟ چونكە دوێنێ خاڵێكی جیاوازی سەرەكی لە نێوان ئێمەو برایانی ئۆپۆزسیۆن هەبووە كە پێمان دەوتن هەڕەشەیەكی ناوەوەو هەرێمیی هەیە لەسەر ئەو ئەزموونە، دەیانوت نەخێر شتی وانییە، ئەوە بیانووە بۆ بەردەوامبوونی گەندەڵی و حكومڕانی خۆیان، بەڵام كە ڕووداوەكانی عیراق ڕوویداو ڕووداوەكانی مەرزی ئێران و توركیا ڕوویداو ئەمەی ئێستا لە سوریا ڕوو دەدات، هەستیان كرد كە مەترسییەك لەسەر ئەزموونەكە هەیەو جێگای خۆشحاڵیە ئێستا هەموویان لە بەغدا وەكو تیمێك ئیش دەكەن، ئەگەر گوێتان لێ بوایە لە چاوپێكەوتنەكەی مامۆستا عەلی باپیر، ئەو ڕۆژە لەكەناڵی پەیام ئەڵێت ئێمە ناچارین بۆ پاراستنی ئەو ئەزموونە وەكو یەك تیم لە بەغدا ئیش بكەین و ئێستاش یەكێك لە ئەركەكانی ئەم حكومەتە ئەوەیە بەتایبەتی كاك نێچیرڤان تیمێك یا هەیئەتێكی دانووساندن و مفاوەزات و بڕیار وەرگرتن بەرامبەر كێشەو گرفتەكانی ئێمەو عیراق دروست بكات و لەم تیمەدا ئۆپۆزسیۆنیش بەشدار بێت و ئەحزابەكانی ترو حكومەتیش تێیدا بەشداربن و قەراری ئەوان بێت، چونكە ناوەوەی كوردستان بەهێزبێت ئەوە لە دەرەوەش بەهێز دەبین و ئەمەیە پڕۆژەی نیشتمانی، بەڵام ئەگەر هاتوو برایانی ئۆپۆزسیۆن نەهاتنە ناو حكومەت و ئەوان دەڵێن ئەو سیستەمەی حكومەت بگۆڕین و خۆمان حوكم بەدەست بگرین، خۆ نێچیرڤان ناتوانێت ئەمە بكاتە پڕۆژەی حكومەتی خۆی و بڵێت با ئێمە بڕۆین و بۆ ئەوەی ئۆپۆزسیۆن بێتە جێگای ئێمە، نەخێر شتی وانییە، بەڵكو هەڵبژاردن دەبێت و بڕیار لەوێیە، بەڵام ئەوەی تر چاكسازییەو نەهێشتنی بێكاری و بەرەنگاربوونەوەی گەندەڵییەو دامەزراندنی مفەوەزییەكی سەربەخۆی هەڵبژاردنە و نەزاهەت و چاودێری داراییە. . . تاد، بەڕای من ئەمانە هەموو قابیلی قبوڵەو ئەمانە هەموو بەرنامەی و پڕۆژەی حكومەتە، ئەوسا ئەگەر برایانی ئۆپۆزسیۆن هاتنە ناو حكومەت باشە، ئەگەر نەهاتیشن، نابێت دژایەتی دروشمی ئێمەیان تا كۆتایی هەڵگرتبێت، نابێت ئێمەو ئۆپۆزسیۆن تەنیا شەڕ بكەین، نەخێر من و ئەو هەردووكمان كوردین و خەڵكی ئەو كوردستانەین بۆ لەگەڵ یەكتر دانەنیشین با ئەو ڕای خۆی بدات و منیش ڕای خۆم بدەم و مەرج نییە تەنیا مرۆڤ یەكتر بكوژێت، یا شەڕی یەكتر بكات یا چاو لەیەكتر سۆربكەنەوە، لە دنیاشدا هەر وایە حزبی دیموكرات و كۆمارییەكان كە دەچنە ناو هەڵبژاردنەكانەوە، یەكێك دەدۆڕێت و یەكێك دەیباتەوە و ناچن شەڕی یەكتر بكەن، بەڵكو پیرۆزبایی لەیەكتر دەكەن و ئێمە كە باس لە ئەزموونی ئەو وڵاتانە دەكەین یەكێك لەمانە ئەوەیە با سوودی لێ وەربگرین و یەكتر قبوڵ بكەین ئەوەی لە هەڵبژاردنەكان بردیەوە ئەوەی تر با پیرۆزبایی لێ بكات، بەڵام بڵێیت ئێستا ئێمە حكومەتێكی ئینتیقالیمان دەوێت، بۆچی بووە حكومەتی ئینتیقالی دابمەزرێنین؟ خۆ دنیا خراپ نەبووەو ئەو وڵاتە تووشی كارەساتێك نەبووە، خوا نەخواستە یا ئەو حكومەتە فەشەلێكی هێناوە لە مەسەلەیەكی سیاسی دیاریكراو یا ئێمە لە قەیرانێك داین، بەدیدی تۆ قەیران هەیە بەدیدی من قەیران نییە، وەرە من و تۆ تەفاهوم بكەین بۆچی حكومەتی ئینتیقالی، نەخێر وەرە لە حكومەت بەشداربە یا تۆ ئۆپۆزسیۆن بە من لە حكومەت دەبم تا ماوەی حكومەتەكە تەواو دەبێت و هەر كاتێك خوانەخواستە بارودۆخێك یا قەیرانێك دروست بوو ئەو كاتە جەنابی سەرۆكی هەرێمی كوردستان بۆی هەیە داوا لە پەرلەمان بكات كە هەڵبژاردنێكی پێشوەخت ئەنجام بدرێت و ئێمە داوای هەڵبژاردنی پێشوەختمان كرد، بەڵام برایانی ئۆپۆزسیۆن رازی نەبوون، كەواتە ئێمە ناكرێت دوور بە دوور حوكم لەیەكتر بكەین، بەڵكو دەبێت هەر دابنیشین لەگەڵ ی