سەرەڕای قەیرانی ئابووری و شەڕی داعش لە هەولێر فێستیڤاڵێكی شانۆی مۆنۆدرامی ساز كرا
رێزی لە ژمارەیەك شانۆكار و راگەیاندنكار گیرا كە لە ماوەی رابردوو چەندین كاری شانۆییان پێشكەش كردووە.
یەكەم نمایشی فێستڤاڵ لە ڕۆژی یەكشەممە ڕێكەوتی 10/4/2016 دەستیپێكرد، بە شانۆگەرییەك كە بەرهەمی نێوەندی توێژینەوەی شانۆی كەلتوریە بەناونیشانی “دەبمە ئەكتەر لە چاوەڕوانی گۆدۆ” داڕشتنەوە ودەرهێنانی نیهاد جامی و نواندنی حەمە ساڵح، كارەكانی دیكەش بەم شێوە بوون: تیپی شانۆی سالار شانۆگەری “مینا” نمایش دەكات نوسین ودەرهێنانی ئەحمەد سالار و نواندنی ماجید شكاك، یپی شانۆی تیشك شانۆگەری “زایەڵەی ئاسمان” نمایش دەكات، نوسینی سەباح عەتوان و دەرهێنانی تەها بیبانی،، تیپی شانۆی هەوار شانۆگەری “هاوارێك لە تاریكی” نمایش دەكات سینۆگرافیا ودەرهێنانی نەژاد نەجم
شانۆگەری “منداڵێك لە دایك دەبێ” كە لە شانۆگەری ڕمەكانی كارەساتی قاسم مەترود وەرگیراوە و جوتیار ڕەفعەت ئامادەی كردۆتەوەو كاری دەرهێنانی بۆ كردووە لە نواندنی ڕۆزانا فەرهاد. تیپی شانۆی حێدە كە گروپێكی شانۆیی شاری كۆیە مۆنۆدرامای “من وشێلم فرۆشەكە” نمایش دەكات، نووسینی گەزیزە و دەرهێنانی شوان حەمە سەعید و نواندنی محەمەد مەهدی. تیپی شانۆی پیرەمەگرون شانۆگەری “هیوایەك بەر لە مردن” نمایش دەكەن، نووسین ودەرهێنانی ئومێد كەمال، كۆمەڵەی هونەرە جوانەكانی كورد- مەڵبەندی گشتی شانۆگەری “خۆشەویستی هەنگاوێك لێمەوە دوور بوو” ئامادەكردن ودەرهێنانی زاهیر عەبە ڕەش ونواندنی شایی ڕەزا نەجار، شانۆگەری “رۆژمێری پیاوێكی سەیر” نمایش دەكرێت، نوسینی گۆگۆڵ و ئامادەكردنی ئازاد بەرزنجی، دەرهێنانی: عوسمان فارس و نواندنی: عوسمان مەعروف، شانۆگەری “تداعیات الوگن” نمایش دەكرێت، نوسینی قاسم مازی و دەرهێنانی د. سەیفەدین حەمدانی، شانۆگەری “هاواری شێتێك” ، ئامادەكردن ودەرهێنانی ئاوارە، شانۆگەری “تابلۆیەك ژ كوشتنێ” دەرهێنانی هەڵكەفت ئیدریس.
شانۆگەری “دوا گۆرانی” نوسینی چیخۆف و دەرهێنانی یوسف عوسمان، لە كۆتاییدا لە هۆڵی بەرێوبەرایەتی تیپی بەنگازی بۆ هونەری شانۆ، كە لە وڵاتی لیبیاوە هاتوون شانۆگەری “سۆزی شەو” كە لە نوسین ودەرهێنانی ناسر ئەلئوجەلی و نواندنی سوعاد خەلیل و سینۆگرافیای عەلا ئەلئوجەلی و میوزیكی عومەر فیتۆرەیە.
شانۆكاران چی دەڵێن؟
سازكردن و ئەنجامدانی هەر چالاكییەكی هونەری لەم ساتەدا كە وڵات بە قەیرانێكی ئابووری دژواردا تێپەڕ دەبێت و رووبەرووی دوژمنێكی توندڕەو و دوژمنی مرۆڤایەتی بۆتەوە، خۆی لە خۆیدا بە دەستكەوتێكی گرنگ دادەنرێت و جێگای رێز و ستایشە، لەم بارەیەوە هونەرمەندان را و بۆچوونی خۆیان خستەڕوو، سەرەتا د.فازل جاف كە ئەندامی لیژنەی ناوبژیوانی فیستڤاڵەكەیە بەم شێوەیە رای خۆی دەربری: بە حوكمی ئەوەی كوردستان وڵاتێكی فرە كەلتووری و فرە رەهەندییە لە هەموو بارودۆخێكدا ساز كردنی فیستیڤاڵی چالاكی شانۆیی زۆر پێویستە، چونكە چالاكییە شانۆییەكانی كوردستان لەچاو وڵاتان زۆر زۆر كەمە، بێگومان ساز كردنی لەو بارودۆخەدا كارێكی قورسە و ئەمە نیشانەی ئەوەیە كە میللەتی كوردی دەیەوێ خاوەن كەلتوورێكی زیندوو و باش بێت و لە بواری هونەریدا پێگەی خۆی هەبێت، و شانۆكارانی كورد لە ئێستادا دەتوانن هەر ئەوەندە پێشكەش بكەن و ناتوانین داوای زیاتری لێبكەین، بەڵام پێویستە ئەو كارانە پێشكەش بكەن كە گوزارشت لە واقعی ئێستای هەرێم بكات.
مامۆستا هیوا سوعاد بەڕێوەبەری هونەری شانۆ: فیستیڤاڵی مۆنۆدراما بۆ ئەوە ساز كراوە برەو بدرێت بە رەوتی شانۆیی و ئاشنابوونە بە هونەری مۆنۆدراما و شانۆیی و ئەزموونی هونەرمەندانی كوردستان و بیانی، هەر بۆیە لە كاتی سازدانی فیستیڤاڵەكان بینەری زیاتر و هەمەرنگتر لە هۆڵەكان دەبنیرێت، ئەم فیستیڤاڵەش بەرهەمێكی زۆری لە خۆ گرت و ماوەی دە رۆژ بەردەوام بوو، ئێمە لە سەرتاپای كارەكانماندا و بەتایبەتی لەو فیستیڤاڵە دەمانەوێ بڵێین هەرگیز هونەرمەندی كورد گوێی بە قەیران و ساتە ناخۆشەكان نەداوە و نادات، بەڵكو هەمیشە لەگەڵ ئازار و مەینەتییەكانی میللەتەكەیەتی.
هونەرمەند عەلی ئەحمەدیش وتی: من زۆر دڵخۆشم بەو بەردەوامی هونەرمەندان و سووربوونیان لەسەر رانەوەستانی چالاكییە هونەرییەكان لە شارەكەمان، چونكە ئەگەر ئێمەی هونەرمەند بەردەوام نەبین و بارە هەڵنەگرین باوەڕ ناكەم كەسی دیكە بێ لە جیاتی ئێمە بێ و كارەكان ئەنجام بدات، لەو كاتەی كە قەیرانی ئابووری و شەڕ لە كوردستان هەیە و سەرەڕای ئەمەش بارەكەمان لە ئەستۆ گراتووە هیوادارم هونەر گرنگییەكی تایبەتی پێ بدرێت و ناكرێ بوونی قەیرانی ئابووری بگرێتە بیانوو بۆ پشتگوێخستنی هونەر، چونكە ژیان پەیوەستە بە هونەر و ئەدەب واتە ئەگەر هونەر وەستا ژیانیش دەوەستێت، هونەر زۆر شت لە خۆ دەگرێت و تەنیا ئەوە نییە تۆ بچی شانۆگەرییەك پێشكەش بكەی یان بەرهەمێكی گۆرانی بڵاوبكەیتەوە.
سەعدون یونس: یادكردنەوە یاخود سازكردنی هەر فیستیڤاڵێك هەنگاوێكی پیرۆزە بەتایبەتی بۆ ئێمەی كورد لەو بارودۆخە هەستیار و ناسكەدا كە كوردستان نقومی قەیران بووە و میللەتی هەست بە بێئومێدییەك دەكات، گرنگترین كار كە حكومەت پێویستە ئەنجامی بدات گرنگیدان و زیندوو كردنەوەی كەلتوورە، چونكە هەر میللەتێك ئەگەر كەلتووری نەبێت یان تەنانەت وەكو پێویست نەبێت ئەوا بوونی و نەبوونی هیچ جیاوازییەكیان نابێت، لە دێر زەمانەوە دوژمنانی میللەتەكەمان بە هەموو شێوەیەك هەوڵی نەهێشتنی كەلتوورەكەمان دەدەن و زۆر بێهێز كردن و لەناوبردنی كەلتووریان لە پێش هێرش سەربازی و چەكداری داناوە، بۆیە من دەڵێم هەنگاوێكی باشە هیوادارم لایەنە پەیوەندیدارەكان گرنگی زیاتر بەم بابەتە بدەن و لە ژێر بارودۆخێكدا بێت نابێ سازكردنی ئەم جۆرە چالاكیانە فەرامۆش نەكرێت.
جیگەی ئاماژە پیدانە ئەم فیستیڤاڵە لەلایەن بەڕێوەبەرایەتی هونەری شانۆی هەولێر بە هەماهەنگی لقی هەولێری سەندیكای هونەرمەندانی كوردستان سازكراوە.
