ئەو بارودۆخەی ئێستا كوردستان پێیدا تێپەڕ دەبێت لە قەیرانی ئابووری كە بە هۆی نەناردنی بودجەوە رووی لە كوردستان كردووە و دواتریش شەڕی نەگریس و نەخوازراوی تیرۆریستانی داعش كاریگەریی نەرێنی لەسەر هەموو بوارەكانی ژیان كردووە، هونەری شانۆش یەكێكە لەو بوارانەی كە زۆرترین زیانی بەركەوتووە و كاریگەرییەكانی بە ئاشكرا بەسەر ئەم بوارەوە دیارە، چونكە نمایشەكان ئێستا دەگمەن بوون و فیستیڤاڵەكانیش وەستاون، سەبارەت بەم پرسە بە پێویستمان زانی چەند شارەزایەكی ئەم بوارە بدوێنین.

مامۆستا ئەرسەلان دەروێش بەشێوەیەكی قوڵ باس لە بنەچەی ئەم قەیرانە و كاریگەرییەكانی دەكات و دەڵێ:

دەبێت لە خۆمان بپرسین (تاك) لەكۆمەڵگەی ئێمەدا چی لە دەست داوەو چی پێویستە؟؟ بۆ ئەوەی وەڵامێكی رۆشنی ئەم پرسیارە بدەینەوە،دەبێت لەدەستپێكدا هەڵسەنگاندنی رەوشی ژیاریی كۆمەڵگەی كوردی بكەینە پێوەر،چونكە هونەر دەرهاوێشتەی ئاستی پێشكەوتن و شارستانی هەر كۆمەڵگەیەكەو لە هەمان كاتیشدا ئاوێنەو بەرجەستەی ئایندەیەتی. بە بۆ چوونی من پێش ئەوەی كەرەستەكانی بەگژداچوونەوە و ركابەرایەتی(داعش)و دوژمنانی دیكەی نەتەوەو نیشتیمان تاوتوێ بكەین، یان لە ناكۆكییەكانی نێو ماڵی كورد ورد ببینەوەو ئەگەرەكانی ئایندەی ئەم ئەزموون و هەرێمەو خەونی سەربەخۆیی راڤە بكەین ولێی رابمێنین، یان هۆكارەكانی درووستبوون و تەشەنەكردنی دیاردەی (گەندەڵی) وەك نەخۆشییەكی كوشندە لە جەستەو جومگەكانی ئەم حكومەت و وڵاتە دەستنیشان بكەین، پێویستە لە خەمی لەدەستدانی بنەماو بەها مۆڕاڵیەكانی (تاك)دا بین، چونكە ئەوە تاكە( كۆ) پێكدەهێنێت و ئاراستەی دەكات.
بێگومان (كۆ..)واتا (خێزان. خوێندنگە، فەرمانگە، مزگەوت و كڵێسا و پەرستگەكان، دەزگا جۆراوجۆرەكان، میدیا، رێكخراوەكانی كۆمەڵگەی مەدەنی، حزبەكان..تاد)، بۆیە دەبێت وەك هونەرمەندان لە خۆمان بپرسین (تاك) لە كۆمەڵگەی ئێمەدا چی لە دەست داوەو چی پێویستە؟؟
بۆ ئەوەی بزانین چی پێشكەش بكەین و چۆن پێشكەشی بكەین؟!
بەدرێژایی دەیان ساڵی دووژمنكاریی، گرتن، كوشتن، جینۆسایدكردن و ئەنفالكردن، دوژمن نەیتوانی ئارای بوونی (ناسنامەی نەتەوەیی و فەرهەنگیی)و یارای (خەون و هیوا) لە هزرو دەروون و بڕوای تاكی كورد داماڵێت و بیڕووخێنێت..ئەوەش دەیسەلمێنێت كە مرۆڤی كورد مەزن و بەهێزو خۆڕاگرە، لە ئێستاشدا ئەوەتا لەگەڵ هەموو دژواریەكاندا دەستی لەسەر زامەكانی تووند كردووە و قارەمانانە خۆڕاگرییەكی بێ هاوتا لە بەرانبەر بە دووژمنی سەر مەرزەكان ودوژمنانی تری ناو عێراق و سەختییە ئابووری و سیاسییەكانی ژیانی ناو ئەم هەرێمە دەنوێنێت، تەنانەت ئەو لێشاوی كۆچەی ئێستا لە ئارادایە بێ هیوایی نییە لە كوردستان، بەڵكو پەستی و تووڕەبوونە لە حزبە بەڕێوەبەرەكانی، توورەبوونە سەبارەت بە لەدەستدانی زۆرێك لە بەها مۆڕاڵییەكانی ئەم كۆمەڵگەیە كە بنچینەكانی ژیانی ئێمەی پێوە بەندە. بۆیە هەر بەرهەم و هەوڵ وكاركردنێكی سەرپێیی و رواڵەتی، ناكرێت هەڵكۆڵینێكی كاراو بایەخداری هەبێت لەسەر ژیانمان ئەگەر كار لەسەر گەڕانەوەی ئەو قاعیدە ئەخلاقییانە نەكات كە لە ئێستادا رووەو لەناوچوونە و هۆكاری هەموو نەهامەتییەكانی ژیانمانە...بەڵام تۆ بڵێیت كێ( سپۆنسەریی!) بەرهەمی بەو ئاراستەیە بكات..كێ لە خەمی پشتیوانی كردن و هاندانی هونەرمەندان و داهێنەرانی كوردستانە لەم پێناوەدا؟

مامۆستا كامران رەئوف بەم شێوەیە رای خۆی دەربڕی: بە نموونەیەك پێشەكی پرسیارەكەی بەڕێزتان وەڵام دەدەمەوە، لە جەنگی دووەمی جیهانی كە سوپای ئەڵمان ئابڵوقەی لینینگرادیاندابوو رۆژانە بە هەزاران بۆمب رەوانەی ئەو شارە دەكرا. شانۆكارانی ئەو شارە سووربوون لە بەردەوامبونیان لە پێشكەشكردنی شانۆگەرییەك بەو هۆكارەی كە هێرشی ئەڵمان بەو مەبەستەیە كە ئەو هونەرمەندانە نچار بكرێن نمایشی ئەو شانۆگەرییە بوەستێنن،بەڵام ئێمە تەحەددای ئەڵمان دەكەین و نمایشەكەمان ناوەستێنین.من زۆر بەداخم لەم خەمساردییەی حكومەتەكانمان ناگەم، بۆ خەمساردن، بۆ پلانیان نییە بۆ لایەنێكی گرنگی نەتەوەكەمان كەچی وڵاتانی دنیا هەیە شانازی بە هونەر و بوارەكانی فەرهەنگ و كەلتوور دەدەن تەنها ئێمە نەبێت، ئێمەی كورد نەبێت مەبەستم لە سیاسییەكانمانە ئاستی بەرزی هونەر مانای زیندوێتی ئەو میللەتەیە .

خانمە ئەكتەر مەروا محەمەد : سەبارەت بەم تەوەرە وتی: هیوادارم ئەم بارودۆخە بەو شێوەیە بەردەوام نەبێت، چونكە بە شێوەیەكی ئاشكرا كاری كردۆتە سەر هەموو بوارەكانی ژیان و ئەگەر ئاواش بێت ئەوا هونەری كوردی بەرەو قەیرانێكی قورس دەڕوات، بۆیە پێویستە هەر یەكێكمان وەكو ئەركێك كاری خۆمان بكەین و گوێ بە هیچ شتێك نەدەین بۆ ئەوەی كارە هونەرییەكانمان بەردەوام بێت و وانەبێت هونەرمەند خۆی بە هیچ لایەنێك ببەستێتەوە، چونكە ئەمە كاری هونەرمەند نییە، بەڵكو كاری ئێمە ئەوەیە لەو قەیرانەی ئێستا هەموومان پێكەوە كارێك بكەین بۆ وڵاتەكەمان.

خانمە ئەكتەری بواری شانۆ مامۆستا فرمێسك مستەفا: كە جگە لە كارە هونەرییەكەی خاوەن چەندین وتار و بابەتی هونەرییە بەم شێوەیە باس لەم قەیرانە دەكات: ژینگە و بارودۆخی ئیستاكەی كوردستان لە ساتەوەختێكی زۆر دژوار وتەنگژەدایە، تەنیا ئیرادە نەبێت كە لە شەپۆلێكی بەهێزدایە و هیچ بەربەستێك ناناسێت ئیرادەی پێشمەرگە قارەمانەكانمانە. بێ لەوەی لەهەندێ كایەی خزمەتگوزاری و پەروەردە و پێگەیاند، تا ڕادەیەك لە جموجۆڵ و بە بەردەوامیدان،و ئومێدێكمان بۆ جێدەهێڵن. وەلێ بوارەكانی كەلتوری هونەری، سستییەكی بەرفراوانی تێدا بەدی دەكرێت. هونەر لە ئێستاكەدا شوناسێكی دیاریكراوی بۆ خۆی نەخوڵقاندووە، تا سبەی وەك سەروەری و مێژوویەك باسی لێ بكات.
هونەر بە ئاوێنەی چەرخی خۆی دەبینرێت، ئێستاكە ئەو ئاوێنەیە بە شكاوی و پارچە پارچەكراوی لێرە و لەوێ پەرش و بڵاوبۆتەوە. ئەم پارچانە كۆ ناكرێنەوە و لێكنادرێتەوە تا تاكی كۆمەڵگە سیما و ئازار و ئەندێشەكانی خۆی تێدا ببینێت.
لەگەڵ ئەوەی ئێستاكە، هەستیارتیرن قۆناخە كە میللەت چاوەڕێی نوێ بوونەوە دەكات لە كاری هونەریدا. وەك ئەوەی لە هەموو قۆناخ و گۆڕانكارییە یەك بەدوای یەكەكانی ئەوروپاو ئەمریكا بەدی دەكرێت، كە لەسەر دەستی چەندین هونەرمەند و فەیلەسوف و رۆشنبیراندا، وەرچەرخانیان بە خۆوە دی. بە بەدیهێنانی چەندین قوتابخانەی نوێ و بیردۆزی فەلسەفیی نوێوە. ئێستاشی لەگەڵ بێت، بۆتە شوناسێك بۆ ئایندەی میللەت و نەوەكانی خۆیان.
بەداخەوە ئێمە نەمانتوانی ئەو سەرفرازییە لە ئێستاكەدا بەدەست بهێنین، تا لە ئایندەدا، مێژوویەك بۆ ئەم قۆناخە نوێیەمان تۆمار بكەین لە ڕووی هونەر و كەلتورەوە. ئەو هەوڵە كەموكورتانەی كە هەن و جێگای ڕیز و تەقدیرە، بەڵام بەس نییە بۆ تەعبیر لە ئێستاكە و ئاریشەكانی.