نەتەوەیەكگرتووەكان لە بەرنامەی تایبەتییەكانی خۆیدا هەوڵ دەدات سوود لە ناوبانگی كەسایەتییە ناودارەكانی جیهانی لە بوارە جیاجیاكان وەربگرێت بۆ ئەوەی لە پروپاگەندەكانی خۆیدا بەكاریان بهێنێت، زۆرجاریش كەسێكی ناودار بە باڵیۆزی خۆی دادەنێت لە بوارێكدا، بەتایبەتی لە هەڵمەتەكانی بۆ كۆكردنەوەی یارمەتی و كۆمەك بۆ ناوچە جیاجیاكانی جیهان جا بەشێوەی هەمیشەیی بێت، یاخود لە كاتی روودانی كارەساتی سروشتی، یان جەنگ و ئاوارەبوونی هاووڵاتیان بێت، بۆیە ژمارەیەكی زۆر لە ئەكتەر و گۆرانیبێژە ناودارەكانی جیهان ئەوانەی خاوەن جەماوەری زۆرن ئێستا نوێنەری نەتەوەیەكگرتووەكانن لە بواری جیاجیادا.
شاكیرای گۆرانیبێژی ناسراو باڵیۆزی نیازپاكیی رێكخراوی نەتەوە یەكگرتووەكانە بۆ منداڵان (یونسیف)، شاكیرا لە پەیامێكدا داوای لە سەركردە و گەلانی جیهان كرد كە دەستی یارمەتی بۆ منداڵە سوورییەكان درێژ بكەن ئەوانەی وەك پەنابەر كۆچیان كردووە بۆ وڵاتانی ئەوروپا.
شاكیرا لە كۆنگرەیەكی رۆژنامەنووسیدا كە لە نیۆیۆرك بەسترا دەربارەی سەرمایەداری لە سەر منداڵان وەك ئاماژەیەك بۆ كۆچی ئێستای سوورییەكان وتی: منداڵانی سووریا شایەنی ئەو بارودۆخە نین كە ئێستا تێیدا گوزەر دەكەن، من دەزانم دۆزینەوەی چارەسەرێك بۆ ئەم كێشەیە زۆر زەحمەتە، بەڵام هیوام زۆرە كە وڵاتانی جیهان بتوانن چارەسەرێكی ئەم جۆرە كێشانە بكەن، چونكە زۆر پێویستە بەتایبەتی لەم ساتە وەختەدا.