بە بۆنەی (75)مین ساڵیادی لە دایكبوونی ئەستێرەی سینەمایی ناوداری میسری عادل ئیمام لە شوێنی وێنەگرتنی دوایین كاریدا، تامر مورسی كە بەرهەمهێنەرێكی ناوداری میسرییە دیارییەكی تایبەت و گرانبەهای پێشكەش كرد.
لە كاتی وێنەگرتنی دیمەنەكانی زنجیرەی «أستاذ و رئیس قسم» كە عادل ئیمام رۆڵی سەرەكی تێدا دەبینێت، مورسی ئۆتۆمۆبیلێكی جۆری رەنجرۆڤەر سپۆرت مۆدێلی 2015ی پێشكەشی عادل ئیمام كرد كە نرخەكەی 2 ملیۆن جونەیهی میسرییە و نوێترین تەكنۆلۆژیای تێدایە وەك شاشەیەكی 8 ئینجی و سیستمی چاودێری لە هەرچوار لاوە، ئەم دیارییە بۆ ستافی زنجیرەكە و بۆ عادل خۆیشی سوپرایز بوو، چونكە پێشتر ئاگادار نەبوون و خەریكی وێنەگرتن بوون. عادل ئیمام لە 17/5/1940 لە گوندی شەها لە پارێزگای دەقهلییە لە دایكبووە، دواتر روویان لە قاهیرە كردووە و لەوێ خوێندنی سەرەتایی و ناوندی تەواو كردووە، دواتر چۆتە كۆلێژی كشتوكاڵ لە قاهیرە و لەسەر تەختی شانۆی كۆلێژ لە چوارچێوەی پێشبڕكێی قوتابیانی كۆڵێژ لە كۆتایی پەنجاكانی سەدەی رابردوو یەكەم كاری نواندنی پێشكەش كردووە.