وەك پشتیوانییەك لە هێزی پێشمەرگەی كوردستان، لەگەڵ تیپی ئۆركێسترای كوردستان/ هەولێر و بەڕێوەبەرایەتیی هونەرەكانی موزیك و پەیمانگای هونەرە جوانەكانی هەولێر، هونەرمەند "خۆشەوی عەزیز" كۆتایی هێنا بە وێنەگرتنی سروودی "دەبارین"، كە بەرهەمی كەناڵی ئاسمانیی كوردستان TVـیە و، ئاوازی "جەمیل سنجاوی"، هۆنراوەی "شازاد كەریم"ـە، لە دەرهێنانی هونەرمەند "مەهدی حەسەن"ـە. بڕیاریشە لە ڕۆژانی داهاتوودا لە تەواوی كەناڵە ئاسمانی و نێوخۆییەكاندا بڵاو بكرێتەوە.
لەم بارەیەوە هونەرمەند "خۆشەوی عەزیز" ڕایگەیاند، دوای ماوەیەكی زۆر كاركردن لەگەڵ تیپی ئۆكێسترای كوردستان/ هەولێر بۆ بەرهەمهێنانی سروودێكی نیشتیمانی، بە ناوی "دەبارین"، توانیمان بە هاوكاریی دەستەیەك لە موزیكژەنە دیارەكانی كوردستان كۆتایی بە تۆماركردنی ئەو سروودە بێنینن كە پێم وایە ئێستا گڕوتێنێكی دیكتە بە برا پێشمەرگەكانمان دەبەخشێ، لەو ڕێگەیەیشەوە دەمەوێ هاوسۆزیی خۆمیان بۆ دووپات بكەمەوە، چونكە ئەوان بە خوێنی ئاڵی خۆیان بەرگریی لە مانەوەی ئێمە و خەونەكانی داهاتوومان دەكەن. بۆیەیش لە ڕۆژانی ڕابردوو، بە كامێراكانی "ئەیار عەلی، ڕێباز عوسمان، سیروان خۆشناو"، توانیمان كۆتایی بە گرتە ڤیدیۆییەكانی كلیپی ئەو سروودە بێنین و، لە ماوەیەكی نزیكدا لە سەرجەم كەناڵە ئاسمانی و لۆكاڵییەكاندا بڵاوی بكەینەوە. لێرەیشەوە دەمەوێ سوپاسی بێ پایەنی كەناڵی ئاسمانی كوردستان tv بكەم، كە هاوكاربوون بۆ لەدایكبوونی ئەو سروودە و سوپاسی هەریەك لە مامۆستا "چەتۆ نەورۆز و مەهدی حەسەن" و گشت ئەو كەسانە بكەم، كە هاوكاربوون بۆ لەدایكبوونی ئەو بەرهەمە نیشتیمانییە.