فلمێ کوردی (نامه‌یه‌ک بو پاشای) کاندیده بو خه‌لاتێ ئوسکار ل نه‌رویج
ل نه‌رویج سێ فلم هاتینه كاندیدكرن ئه‌وژی " بڵایند واته كوره، 1001 گرام، نامه‌یه‌ك بۆ پاشای" و چاڤه‌رێ یه یه‌ك ژ وان بهێته هه‌لبژارتن بۆ وه‌رگرتنا خه‌لاتێ ئوسكار یێ سالا نوو.
د فه‌ستیڤالا ئوسكار دا 9 فلم دێ ركاربه‌ریێ كه‌ن كو چانسێ فلمێ هیشام زه‌مان بهێزه یه‌ك ژ وان فلمان به.
ئه‌و سێ فلم ل 28 ڤێ مه‌هێ ژ ئالیێ په‌یمانگه‌ها فلمان یا نه‌رویج ڤه هاتینه پێشنیازكرن بۆ ئوسكار هه‌یا بریارێ ل سه‌ر وه‌رگرتنا فلمه‌كی ب نوونه‌راتییا نه‌رویج هه‌لبژێریت.
بریاره ل رۆژا 3 ئیلونێ لیژنه‌یا فیسته‌ڤالا ئوسكار یا نه‌رویجێ دێ داوی بریارا خوه ل سه‌ر تاكه كاندیدێ خوه بۆ وێ فیسته‌ڤالێ بده‌ت.
چیرۆكا فلمی به‌هسا چیروكا پێنج ئاواره‌یان دكه‌ت كو رێ ب وان هاتییه دان ژ كه‌مپێ ده‌ركه‌ڤن و دناڤا به‌رفربارینێ دا به‌ر ب ئوسلۆ بچن.
سه‌رهاتی و چیروکێن وان یێت خوشی، نه‌خوشی، ڤیان و تولڤه‌کرنێ یێت هاتینه وه‌سفکرن د نامه‌کێدا کو هاتیه نڤیسین ژلایێ میرزایێ 80 سالی بو پاشایێ نه‌رویج. دڤێ نامێدا میرزا حالێ خو بو پاشایی به‌حس دکه‌ت کا چاوا ئه‌و وه‌ک په‌نابه‌ره‌ک دژیت لوی وه‌لاتی و کا چاوا دڤێت ڤه‌گه‌ریته مالا خوه پشتی کو نووچه‌یێ شه‌هید بوونا کورێ وی دگه‌هیتێ ئه‌ڤێ بویه قوربانیێ هه‌وێن ئه‌نفالان ئه‌وێن رژێما سه‌دامی ل دژی کوردان ئه‌نجام داین.
فلم هاتیه به‌رهه‌م ئینان ژلایێ (فیلم فارمس و کومپانیا زه‌مان فیلم )، ژ سیناریو و نڤیسینا هیشام زه‌مان و مه‌مه‌ت ئه‌کتاشه.
ده‌مێ فلمی (75) خوله‌که ئانکو هه‌ر ئێک ژ پێنج چیروکێن پێکڤه گرێدای بتنێ (15) خوله‌ک هه‌نه دا که‌سایه‌تیێن وێ بهێنه نیاسین و ناکوکیێن وان بهێنه گه‌شه‌کرن و چیروکێن وان داوی پێ بهێت.
هه‌ر چ قاس ب بودجه‌یه‌كا كێم فلم هاتییه وێنه‌كرن، كه‌سێن فلم هه‌لسه‌نگاندی وه‌ها به‌هس دكه‌ن كو فلمه‌كێ ب باندۆر و سه‌رنج راكێشه.
نامه‌یه‌ك بۆ پاشای كو كاندیده نوونه‌راتییا نه‌رویج بكه‌ت د ئوسكاردا، هه‌تا نها خه‌لاتێ "دراگون" یێ بۆ باشترین فلم ل فیستیڤالا گوتبورگ ل سویدێ و هه‌روه‌ها ل ل فلمه فیستیڤالا نه‌رویج یا نێڤ ده‌وله‌تی دوو خه‌لاتێن "ئاماندا" بده‌ست خوڤه ئیناینه
هیشام زه‌مان خوه‌دیێ كومپانییا "زه‌مان فلم" ه یه‌كه‌مین فلمێ خوه ل سالا 2005 بناڤێ "باوكه" به‌رهه‌م ئینایه و زێده‌تری 40 خه‌لاتێ نێڤده‌وله‌تی وه‌رگرتینه.
فلمێ دوێ بناڤێ " وینته‌ر لاند" ل سالا 2007 و فلمێ سیێ یێ بناڤێ " به‌ری به‌فر بارینێ " ل سالا 2013 به‌رهه‌م ئینایه و ل چوار وه‌لاتان هاتییه وێنه‌كرن و خه‌لاتێ دراگون بۆ باشترین فلم ل فیستیڤالا گوتبورگ یا نێڤ ده‌وله‌تی و هه‌روه‌ها خه‌لاتێ باشترین سینه‌ماتوگرافی بده‌ست خوڤه ئینا ل فلمه فیستیڤالا ترایبێکا ل ئه‌مریکا.
نامه‌یه‌ك بۆ پاشای د چه‌ندین فلمه فیستڤالێن نێڤده‌وله‌تی دا وه‌كو " گوتبورگ ل سوید، ترومسو ل نه‌رویج، سینه‌ما ئوروپی، ئیدینبێرگ، هه‌روه‌ها فیستیڤالا ئارت فلم فیست یا نێڤ ده‌وله‌تی و ئێسپو سینی" به‌شداری كریه.
