هونه‌رمه‌ندێكی لوبنانی سه‌ردانی به‌ره‌كانی شه‌ڕی كردو پشتگیری خۆی بۆ پێشمه‌رگه راگه‌یاند
رۆژی پێنج شه‌ممه 21.8.2014 كچه هونه‌رمه‌ندی لوبنانی حه‌سنا مه‌ته‌ر به یاوه‌ری شاندێك سه‌ردانی میحوه‌ری مه‌خمورو گوێری هێزی پێشمه‌رگه‌ی كوردستانی كردو له‌لایه‌ن به‌رپرسان و فه‌رمانده‌و پێشمه‌رگه‌كانی سه‌نگه‌ر به گه‌رمی پێشوازی لێكرا.
كچه هونه‌رمه‌ند له لێدوانێكدا سه‌باره‌ت به‌م سه‌ردانه گوتی: وه‌ك ئه‌ركێكی ئه‌خلاقی سه‌رشانم به پێویستم زانی كه سه‌ردانی پێشمه‌رگه قاره‌مانه‌كانی كوردستان بكه‌م كه گیانی خۆیان ده‌كه‌نه قوربانی بۆ ئه‌وه‌ی ئێمه له ئاسایش و سه‌قامگیری بژین، حه‌زم كرد له نزیكه‌وه بیانبینم و سوپاسگوزاری خۆمیانی پێ رابگه‌یه‌نم و ده‌ستخۆشیان لێ بكه‌م بۆ ئه‌و سه‌ركه‌وتنه مه‌زنانه‌ی به‌سه‌ر تیرۆریستان تۆماریان كردووه، راشیگه‌یاند: ئێوه رووبه‌رووی ده‌وڵه‌تێكی تیرۆریستی ده‌بنه‌وه، ئێوه له جیاتی هه‌موو جیهان دژی تێكده‌ران ده‌جه‌نگن و شه‌ڕی ئاشتی و ئازادی ده‌كه‌ن، ئه‌وه‌ش سه‌ربه‌رزییه‌كی مه‌زنه مێژوو بۆ پێشمه‌رگه‌ی كوردستان تۆماری ده‌كات.
زیاتر گوتی: من له لوبنانه‌وه هاتووم تاكو سلاوی خه‌ڵكی ولاته‌كه‌متان پێ رابگه‌یه‌نم، ماوه‌یه‌ك پێش ئێستاش سه‌ربازانی لوبنانی له ناوچه‌ی عه‌رسال به‌ره‌نگاری چه‌كدارانی توندره‌و بوونه‌وه، ئه‌وانیش وه‌كو پێشمه‌رگه‌ی كوردستان گیانی خۆیان فیدای خاك و نیشتیمان و هاولاتیان ده‌كه‌ن، بۆیه جێی ئه‌وه‌یه به‌هه‌موومان پشتگیریان بكه‌ین.
روونیشیكرده‌وه، ئه‌وه شه‌هیدانه‌ی گیانی خۆیان بۆ خاكی كوردستان به‌خت كرد هه‌رده‌م له دڵ و ده‌روونمانن و ئه‌وان زیندوون و نامرن، دوعاش بۆ برینداران ده‌كه‌ین به زووترین كات چاك ببنه‌وه‌و بگه‌ڕێنه‌وه به‌ره‌ی پارێزگاری كردن له شه‌ره‌ف و خاكی نیشتیمان.
وه‌ك پشتگیرییه‌كیش بۆ پێشمه‌رگه‌و به‌رز كردنه‌وه‌ی وره‌یان، كچه هونه‌رمه‌ند حه‌سنا مه‌ته‌ر جلوبه‌رگی پێشمه‌رگه‌ی پۆشی و ماوه‌ی 3 كاتژمێر له‌به‌ره‌كانی جه‌نگ له‌گه‌ڵ پێشمه‌رگه‌كان مایه‌وه‌و وێنه‌ی یادگاریان گرت.
لای خۆیانه‌وه، فه‌رمانده مه‌یدانییه‌كان و پێشمه‌رگه‌كان سوپاسی هونه‌رمه‌ندیان كرد بۆ ئه‌و سه‌ردانه‌و به‌لێنیان پێدا كه نه‌هێڵن به هیچ شێوه‌یه‌ك تیرۆریستان زه‌فه‌ر به بستێكی خاكی كوردستان ببه‌ن و ئاماده‌ن گیانی خۆیان به‌خت بكه‌ن له پێناو هاولاتیان و بۆ ژیانێكی خۆش و به‌خته‌وه‌ری كوردستان.
جێی باسه، هونه‌رمه‌ند حه‌سنا مه‌ته‌ر ماوه‌یه‌كه له شاری هه‌ولێر نیشته‌جێیه و چه‌ندین كاری هونه‌ری كردووه، له ئێستاشدا خه‌ریكی گۆرانییه‌كه به زمانی كوردی، هه‌روه‌ها له به‌رنامه‌یدایه له ماوه‌ی داهاتوو كۆمه‌ك و هاوكاری پێشكه‌شی ئاواره‌كانی ئێزیدی و توركمان و مه‌سیحی بكات.
