ئه‌م ساڵ له‌ زنجیره‌ دراماكانی مانگی ره‌مه‌زان سه‌ره‌ڕای بارودۆخی ناله‌باری سیاسی و ئابووری و كۆمه‌ڵایه‌تی میسر، به‌ڵام بازاڕی زنجیره‌ دراماكان زۆر گه‌رمه‌ و كۆمپانیاكان بودجه‌ی خه‌یاڵییان بۆ به‌رهه‌مهێنانی چه‌ند زنجیره‌یه‌ك ئاماده‌ كردووه‌.
هه‌رچه‌نده‌ به‌ ژماره‌ زنجیره‌ دراماكان به‌ ژماره‌ كه‌مترن به‌ به‌راورد به‌ ساڵی پار، به‌ڵام بودجه‌یان گه‌یشتووه‌ته‌ نزیكه‌ی یه‌ك ملیار جونه‌یهی میسری بۆ نزیكه‌ی 50 كاری هونه‌ری و ئێستا ته‌نیا 35یان نمایش ده‌كرێن، زۆربه‌ی خه‌رجی زنجیره‌ دراماكانیش بۆ هونه‌رمه‌نده‌ گه‌وره‌كان بووه‌ و كرێیان له‌نێوان 10-35 ملیۆن جونه‌یهی میسری بوون هه‌روه‌ها خه‌رجی به‌رهه‌مهێنانی هه‌ندێكیان له‌ 100 ملیۆن جونه‌یهی تێپه‌ڕ كردووه‌ له‌ نێوان كرێ و دیكۆر و وێنه‌گرتنی ده‌ره‌وه‌ و درووستكردنی شوێنی تایبه‌تی وێنه‌گرتن.
بودجه‌ی زنجیره‌ی سرای عابدین له‌ هه‌موویان زیاتر بوو و له‌ 140 ملیۆنی تێپه‌ڕ كرد، چونكه‌ باس له‌ رووداوێكی مێژوویی سه‌رده‌می خدیوی ئیسماعیل ده‌كات و كرێی یوسرای پاڵه‌وانی زنجیره‌كه‌ 6 ملیۆن جونه‌یهی میسری بوو.
عادل ئیمام 35 ملیۆنی جونه‌یهی له‌ كۆی 75 ملیۆن جونه‌یهی خه‌رجی زنجیره‌ی (صاحب السعاده‌)ی به‌ركه‌وت به‌مه‌ش له‌ سه‌رووی لیسته‌كه‌ هات.