خانەكانی مێشك بۆ فرمانی دروست بە پلەی یەكەم پشت بە ئۆكسجین و شەكری گلوكۆز دەبەستن. جەلتە Stroke واتە گرفت لە بۆڕییەكانی خوێنی مێشك CVA كە دەبێتە هۆی گرفت لە گەیشتنی خوێن بە بەشێكی مێشك و مردنی خانەكانی مێشك لەم بەشەدا. 2 هۆكاری سەرەكی جەڵتە، یان ئەم گرفتە لە بۆڕییەكانی خوێنی مێشك پەیدادەكەن كە بریتین لە: یەكەم، گیرانی خوێنبەر Blockage لەبەر هۆكاری جیاواز. دووەم، دڕان، یان تەقینی خوێنبەر كە دەبێتە هۆی خوێنبەربوون Hemorrhage لەناو شانەكانی مێشكدا.ئەو فاكتەرانەی كە ئەگەری تەسكبوونەوە یان گیرانی خوینبەرەكانی مێشك زیاد دەكەن بریتین لە: بەرزبوونەوەی پەستانی خوێن، ئاستی بەرزی كۆلیستیرۆل، نەخۆشی شەكرە، جگەرەكێشان، پیربوون. نارێكیی لێدانەكانی دڵ بەتایبەتی لەرەی سكۆڵە Atrial fibrillation، نەخۆشی زمانەكانی دڵ هۆكاری ترن لەپاڵ جەلتە. لە تەمەنی كەمتر لە 50 ساڵیدا، بەكارهێنانی دەرمان و ماددە هۆشبەرەكانی وەكو كۆكائین و ئەمفیتامینەكان Amphetamines هۆكاری هاندەرەن بۆ تووشبوون بە جەلتە. هۆكارە دەگمەنەكانی جەلتە بریتین لە هەوكردنی بۆڕییەكانی خوێن Vasculitis، زیادبوونی ماددەی هۆمۆسیستین Homocystine لە لەشدا. نیشانە گەورەكانی جەڵتەی مێشك كە هەموویان لە پڕێكەوە بە كتوپڕی روودەدەن بریتین لە: شێوان Confusion یان گرفت لە قسەكردندا، سڕبوون یان تەزین یان لاوازبوون لە ناوچەی دەموچاودا، سڕبوون یان بێهێزبوونی قۆڵ و باسك یان قاچ لە لایەكی لەشدا، گرفت لە بینیندا، گرفت لە رۆیشتن و هاوسەنگی لەشدا، سەرسووڕان، سەرئێشەیەكی توند بە بێ هۆكارێكی دیار.