زیادبوونی كێش یان قەڵەوی تەنیا زیان بە تەندروستی دەگەیەنێت. لە لێكۆڵینەوەیەكی كۆلێژی ئەمەریكی تایبەت بە نەخۆشییەكانی كۆئەندامی دڵ و سووڕاندا هاتووە كە كۆبوونەوەی چەوری لە دەوری ناوچەی سكدا ئەگەری تووشبوون بە بەرزبوونەوەی پەستانی خوێن Hypertension زیاد دەكات. ئەمە روونە كە زیادبوونی كێش و قەڵەوی هۆكارێكی بەهێزە بۆ تووشبوون بە بەرزبوونەوەی پەستانی خوێن و نەخۆشی شەكرە، بەڵام شوێنی دابەشبوونی یان بڵاوبوونەوەی چەوری زیاد لە لەشدا ئەگەری تووشبوون بە نەخۆشی دیكە زیاد دەكات وەكو نەخۆشی دڵ و شێرپەنجە. دیسان لە لێكۆڵینەوەكاندا هاتووە كە تەنیا كۆبوونەوەی چەوری یان قەڵەوی لە سەنتەری لەشدا Central obesity یان چەوری ناو هەناو و نێوان ئەندامەكانی ناو سك بەتایبەتی كۆبوونەوەی چەور لە لای پشتەوەی بۆشایی سك و لە دەوری گورچیلەكاندا پەیوەندییەكی بەهێزی هەیە بە بەرزبوونەوەی پەستانی خوێن، هەرچەندە كە تائێستا چۆنییەتی یان میكانیزمی تەواو لەپاڵ ئەم پەیوەندییە بە تەواوی نەزانراوە. هەر پێوانەیەك كە لە 120/80 ملم جیوە بەرزتر بێت ئەوا بە پەستانی بەرز هەژمار دەكرێت و پێویست بە دابەزاندنی كێشی لەش و پارێزی خۆراك دەكات، لەوانەشە كە پێویست بە بەكارهێنانی دەرمانێك یان پتر بكات بۆ كۆنترۆلكردنی پەستانی خوێن بەتایبەتی كە بەرزبوونەوەی پەستانی خوێن باوترین و بەهێزترین هۆكارە بۆ تووشبوون بە جەلتەی مێشك و ئاوسانی لای چەپی دڵ.