سووڕی مانگانەی رێك مانای تەندروستییەكی باش و هاوسەنگ دەگەیەنێ، دواكەوتن یان وەستانی سووڕی مانگانە نیشانەیەكە كە لە زۆربەی حاڵەتەكاندا گرفتێكی تەندروستی لەپاڵەوەیە. كە لەش دەكەوێتە ژێر فشار یان سترێسەوە وەكو ئەوەی كە لەكاتی ریجیمی هەڵە یان ریجیمی تونددا روودەدات، ئەوا گەلێك لەو فرمانانەی كە زۆر گرنگ نین لەدەستیان دەدات ئەگەر بە شێوەیەكی كاتیش بێت، بۆ نموونە لە ئافرەتدا كەمبوونەوەی توانای دووگیانبوون، هەروەها دواكەوتنی یان وەستانی سووڕی مانگانە بەتایبەتی كە چەوری لەش تا رێژەی 15- 17% لە لەشدا كەمدەبێتەوە. ریجیم Dieting بەتایبەتی ریجیمی توند یان ریجیمی هەڵە دەبێتە هۆكارە بۆ كەمبوونەوەی وزە و كەمیی ڤیتامین و كانزایەكان، ئەمەش بە چەندین شێوە لە لەشدا دەردەكەوێت وەكو: تێكچوونی سووڕی مانگانە، قژهەڵوەرین، بێهێزی گشتی، كەمبوونەوەی ئارەزووی خواردن و كەمبوونەوەی كێشی لەش. پاش گەڕانەوە بۆ خۆراكی ئاسایی و دووبارە زیادبوونەوەی كێشی لەش بۆ سنووری ئاسایی خۆی، ئەوا ریتمی سووڕی مانگانە وەكو جاران رێك و ئاسایی دەبێتەوە، خۆراكی دەوڵەمەند بە كالسیۆم و ڤیتامین B6 لەگەڵ ترشە چەورییە باشەكان گرنگی زۆری هەیە، بۆ نموونە خواردنی ماسی، تۆوەكان، كاكڵەكانی گوێز یان باوی، میوە بەتایبەتی ئاڤۆكادۆ، پاقلەمەنییەكان، گۆشتی پەڵەوەڕ، سەوزە.
