ئازار لە بەشی خوارەوەی سك، یان ناوچەی حەوز Pelvic pain چەند رۆژێك بەر لە دەستپێكی سووڕی مانگانە حاڵەتێكی باوە لە زۆربەی ئافرەتاندا. بەڵام ئازار لە ناوچەی حەوز لەكاتەكانی تردا پێویستی بە بەدواداچوونی پزیشكی هەیە، چونكە لەوانەیە نەخۆشی لەپاڵەوە بێت، وەك لە خوارەوە ئاماژەیان پێكراوە.
یەكەم: هەوكردنی ئەندامەكانی حەوز منداڵدان، لوولەكانی فالوپ، هێلكەدانەكان كە نیشانەكانی بریتین لە ئازارێكی تیژ، دەردراوی نائاسایی زێ، پشت ئێشە. دووەم: هەوكردنی رێڕەوەكانی زاوزێ Pelvic infection كە نیشانەكانی بریتین لە ئازاری خوارەوەی سك و هەستكردن بە قوڕسایی لەسەر میزڵدان. سێیەم: گەشەكردنی خانەكانی ناوپۆشی منداڵدان لە شوێنی تر لە دەرەوەی منداڵدان Endometriosis وەكو هێلكەدان یان میزڵدان كە نیشانەكانی بریتین لە ئازار، نەزۆكی، بینینی خوێن لە نێوان كاتەكانی سووڕی مانگانەدا. چوارەم، گرژبوونی كۆڵۆن IBS كە نیشانەكانی بریتین لە ئازار، ئاوسانی سك، سكچوون، كۆبوونەوەی گاز لە ریخۆڵەدا. پێنجەم، هەوكردنی رێڕەوەكانی میزەڕۆ UTI كە نیشانەكانی بریتین لە ئازار، سووتانەوەی میز، گۆڕانی رەنگی میز. شەشەم، سیلی ئەندامەكانی حەوز بەتایبەتی زێ و منداڵدان Genital tuberculosis كە نیشانەكانی بریتین لە ئازار، پشت ئێشە، ئازار و بینین خوێن لەگەڵ میزدا. حەفتەم، دووگیانی لە دەرەوەی منداڵداندا Ectopic pregnancy بەتایبەتی لەناو لوولەكانی فالوپ كە نیشانەكانی بریتین لە ئازار، سكچوون، بەرزبوونەوەی پلەی گەرمی لەش، هەستكردن بە ناڕحەتی.