شەكرەكان Sugars بریتین لەو كاربۆهیدراتانەی كە لە شێوەی كریسالی سپی تواوەدان و چێژێكی شیرینیان هەیە. تەنیا 6 جۆر شەكر هەیە كە ئەمانەن: گلوكۆز(سادەترین شەكر)، فركتۆز(شەكری میوە)، لاكتۆز (شەكری شیر)، ماڵتۆز (شەكری جۆ)، گالاكتۆز، سوكرۆز (شەكری ئاسایی). شەكری سپی یان سافكراو كە بریتییە لە سوكرۆز Sucrose گەلێك جار بە ژەهری سپی، دوژمنی دڵ، دوژمنی ددان ناوزەد دەكرێت لەبەر زیانە تەندروستییەكانی بەتایبەتی ئەگەر بە رێژەیەكی زۆر بخورێت كە بریتین لە:
• شەكر بەرگری لەش دادەبەزێنێت بەرانبەر بە هەوكردنە بەكتریاییەكان.
• هاوسەنگی كانزاكان لە لەشدا تێكدەدات، بە تایبەتی كانزای كالسیۆم، مەگنسیۆم، كۆپەر،كڕۆم.
• هۆكارە بۆ زێدەبزۆكی Hyperactivity منداڵان لەگەڵ كەمبوونەوەی سەرنج و تەركیز.
• هۆكارە بۆ زیادبوونی ئاستی چەوری گلیسریدە سیانییەكان.
• ئەگەری تووشبوون بە جەلتەی مێشك زیاد دەكات.
• ئاستی كۆلیستیرۆلی باش لە خوێندا دادەبەزێنێت و ئاستی كۆلیستیرۆلی خراپ بەرز دەكاتەوە.
• ئەگەری تووشبوون بە نەخۆشی دڵ و بەرزبوونەوەی پەستانی خوێن زیاد دەكات.
• ئەگەری كلۆربوونی ددانەكان زیاد دەكات.
• هانی دەردانی ترشەلۆكی گەدە دەدات.
• هۆكارە بۆ زیادبوونی كێشی لەش و قەڵەوی لەوكاتەی كە هەر 100 گرام شەكر نزیكەی 385 كالۆری وزە لەخۆدەگرێت.
• ئەگەری تووشبوون بە نەخۆشی شەكرە زیاد دەكات.
• شەكر راستە چێژێكی شیرینی هەیە، بەڵام كاریگەرییەكی تاڵ دەكاتە سەر پێست، بۆ نموونە كرداری بەتەمەنداچوون و چرچبوونی پێست و سپیبوونی قژ تاو دەدات.
• هانی پەیدابوونی هەستەوەری بە خۆراك دەدات.
• لەكاتی دووگیانیدا، ئەگەری ژاراویبوونی دووگیانی Toxemia زیاد دەكات.
• لەوانەیە كە نەخۆشی لە جگەر و گورچیلەدا پەیدا بكات.
• هاوسەنگی هۆرمۆنەكان لە لەشدا تێكدەدات.
• پووكانەوەی ئێسك تاو دەدات.