تێستی پێست بۆ هەستەوەری Allergy skin test بریتییە لە تاقیكردنەوەی پێست بۆ ناسینەوە یان دەستنیشانكردنی ئەو ماددانەی كە گومانیان لێدەكرێت ببنە هۆی هەستەوەری لە كەسانی تووشبوو بە هەستەوەری. تێستەكە ئەنجام دەدرێت بە داڕووشاندنی پێست یان ژەنینی پێست ئینجا دانانی كۆكراوەیەك لە چەند ماددەیەك كە دەبنە ئەگەری هەستەوەری Allergens پاشان تێبینینكردنی ئەوەی كە هیچ نیشانەیەكی هەستەوەری لە سووربوونەوە و خورشت سەرهەڵدەدات یان نا. سەرەتا پێستی باسك بە گیراوەیەكی ئەلكهولی پاك دەكرێتەوە (هەندێك جار دەتوانرێت كە تێستەكە لە پێستی ناوچەی پشتدا ئەنجام بدرێت)، پاشان چەند شوێنێك بە قەلەم بە شێوەی بازنە نیشان دەكرێت، ئینجا بۆ هەر بازنەیەك پوختەی ماددەیەكی تایبەت بە شێوەی دڵۆپ دەخرێتە سەر پێست بۆ تێست كردن و بە ئامێرێكی تایبەت ماددەكە دەچێتە ناو چینی دەرەوەی پێست Epidermis ئەمەش هەرگیز نابێتە هۆی خوێنبەربوون چونكە هەرگیز وەكو دەرزی نییە. هەندێك جار بۆ تێست كردنی ماددەی زیاتر یان لیستی تەواوی ئەو ماددانەی كە ئەگەری هەستەوەرییان لێدەكرێت، پوختەی هەندێك ماددە بە شێوەی دەرزی لە ژێر پێست دەدرێت. پەیدابوونی سووربوونەوە یان خورشت لە هەر بازنەیەكی بە قەلەم دیاركراودا واتە ئەو ماددەی كە بەكارهاتووە هۆكارە بۆ هەستەوەری. بەم رێگایە دەتوانرێت كە نیشانەكانی هەستەوەری لە تووشبووان تا رادەیەكی زۆر كەم بكرێتەوە بە بێ بەكارهێنانی دەرمان.
