بۆچی دەنگی ئافرەتی جگەرەكێش وەكو دەنگی پیاو قەبە دەبێت؟ ئایا دەزانیت كە لە ئافرەتی جگەرەكێشدا قەبەبوونی دەنگ پێوەندی بە گۆڕان، یان گرفتی هۆرمۆنییەوە نییە؟ جگەرەكێشان دەبێتە هۆی سووتانەوە و وشكبوونی شانەكانی قوڕگ بەتایبەتی ژێیەكانی دەنگ Vocal cords، لە ئەنجامدا لەرینەوە و فرمانیان تێكدەچێت. لە لایەكی ترەوە، جگەرەكێشان هاندەرە بۆ گەڕانەوەی ترشەلۆكی گەدە بۆ ناو سوورێنچك و قوڕگ كە زۆ جار كاریگەری نێگەتیڤ دەكاتە سەر ژێیەكانی دەنگ. هەروەها جگەرە فرمانی سییەكان كز دەكات، ئەمەش كاریگەری نێگەتیڤ دەكاتە سەر توانا و دروستیی لێشاوی هەوا بەناو ژێیەكانی دەنگدا. جگەرەكێشان هۆكارە بۆ هەوكردن و پەیدابوونی گرێ لەسەر ژێیەكانی دەنگدا كە لە تیژی و ناسكی دەنگی ئافرەت كەم دەكەنەوە، دەرنجام دەنگ زیاتر نەرم و قەبە دەبێت، هەروەها ئاوسانی ئەو چینەی سەرەوە كە ژێیەكانی دەنگ دادەپۆشێت كاریگەری نێگەتیڤ دەكاتە سەر دەنگ. گەلێك سەرچاوە ئاماژە بەوە دەكەن كە كاریگەری جگەرە لەسەر دەنگدا هەمیشەییە. پلەی گەرمی لە كۆتاییە هەڵبووەكەی جگەرەدا زۆر بەرزە، بە هەڵمژینی دوكەڵەكەی تا قووڵایی 17-20 سانتیمەتر لە قوڕدا كەمێك سارد دەبێتەوە، بەڵام هێشتا ئەوەندە گەرمە كە ببێتە ئەگەری سووتانەوەی ژێیەكانی دەنگ. جگە لەمە، قەتران و ماددە خراپەكانی تری ناو دوكەڵی جگەرە هۆكارن بۆ ئاوسان و گرفت لە بەرگی ژێیەكانی دەنگدا، بۆیە بە بەردوامبوونی ئەم كاریگەرییانە دەنگ دەگۆڕێت و لەوانەیە كە قوڕگ دوچاری شێرپەنجە بێت Glottic cancer.